هلو حبايبي 🖤 ردت اكلكم اني جاي اقره كل تعليقاتكم وحده وحده ومتعرفون شكد جاي افرح بيهن وبتفاعلكم الي يحسسني من صدك تستاهلون التعب والله يخليكم الي احلى متابعين وكلللش احب ارد عليكم تعليق تعليق بس والله مجاي الحك فصرت ارد بس عالاسئلة
لان ماحب اخلي اي سؤال عدكم بدون اجابة وهمات اكلكم اي استفسار عدكم عالقصة اني بالخدمة 🖤
وطبعا اكو شخص ثاني جاي يفرح بهالتفاعل وبكل كلمة منكم والي هي جيلان❤️وتوصللكم تحياتها هي وعمة فردوس وشخصية ثالثة مشاركتني وياهن بالقصة ان شاء الله تعرفوها بالبارتات الجاية ❤️
احبكم
ومتابعة ممتعة،،واعذروني بعدني ممعدلة البارت
(صغيرة ال حمدان)
للكاتبة روشان
البارت السابع والعشرون
ما تسوون واحد يتعبلكم
ولا جن بالشدايد واكفلكم
طحت عفتوني وحدي
وكلكم صرتو ضدي
وانا ب اصعب ظرف ما فاركتكم
ما تسوون كل تعب التعبته
من مال الحمل عدكم حملته
ما تسوون.....اسكت ما اعاتب
واصبر الروح واصبر ،،،عالمصايب
منكم كاطع الياس
تمشون بحجي الناس
ضيم المر علي ،،،بي غربلتكم
(فردوس)
فردوس: راحت الخيمة التلمنا وراحت ايامه الحنينة وكلشي راح جنا بظلك انام يبوي والگلب مرتاح ،هسه رحت وخليتنا جوة فياي الما يكفون ،
شمعة بيتنا وهيبته وبركته وعفتنا وانطفيت ،
كاللنا هذال الخبر وطلع يركض مثل المخبل راحلهم للمستشفى وخلانه بنوحنا وبواچينا وكسرة ظهرنا الجبيرة
اباوع لامي الكاعده وتنود بجسمها وحتى اللطم يطلع منها بتعب وزعل ،زعلانه منه شلون يروح ويعيفها
بعد كل هالسنين الجانو بيها مثل الواحد وظله هسه راح وخلاها بلايه ظل بلايه طعم بلايه گلب تشبه الموته بغيابه
شنتحمل بعد يوميه لچمة كلب يومية فركة محب،
تعبتنا دنيانا هواي وضاكت علينا ،
گلوبنا اتكطعت والدمع ماجاي يلحمها،شهكات تروح وتجي وتاخذ امن سنين العمر كرفات وما ندري بيها،
اوووف يبوي يالحيط الوسيع الجان واكف بظهرنا كلنا
يبو ضحكة الحنينة والحجاية الثكيلة الما تنوزن بميزان ،شكد جنت اشوف الدنيا جبيرة بعيونك وهسه ضاكت الواسعة علينا بعدك يبوي،
جابو الولد يمنا للبيت وكطعنا رواحنا عليه واخذو دفنوه وراحت رواحنا وياه
وبدت الفاتحة وكضيتها مكسورة وكاعده على صفحة ،خالد لچم گلبي وفراكة مثل الموس الجاي يجرح بكل مكان بگلبي وهسه ابوي بفراكة شال تچوة ظهري وخلاه ينحني من اول يوم بفراكة ،
هذال: طلعت اركض وگلبي واجعني من السمعته عمي كال راح جدك بس الي سمعته انا راح الربيت بيده وسواني رجال ،راح ابوي الحقيقي راح حمالها وسدادها ،رحت جدي وخليتني بهالحمل وحدي
جان حاسك گلبك حيصيرلك شي ،شحجي وشكول لا اعتراض على حكمك ربي ،ردته واخذته وكلنا مرجعنا الك ،،،،
طلعت كبل للمستشفى لكيت عمامي واكفين ودموعهم مبينه رحت لعمي برهان
شصار عمي مو راح وياكم مابي شي
أنت تقرأ
صغيرة ال حمدان
General Fictionيُهزم المرء بأشيائه التي يحبها يُهزم بالاشياء التي التفت روحه حولها بما كان يظن انه باقي ،لكنه رحل بما كان يضن انه مصدر قوته ،لكنه اصبح نقطة ضغف رواية عراقية حقيقية (تتراوح احداثها بين الجنوب وبغداد)عن عائلة كاملة واكثر من جيل عائلة قوية ومترابط...
