𝙸𝚝'𝚜 𝙾𝚔, 𝚃𝚑𝚊𝚝'𝚜 𝙻𝚘𝚟𝚎〖 Completed 〗

🍑 8 🍑

// Unicode //
~~~~~~~~~~

" မင်္ဂလာကုတင်ပေါ်က အိပ်ယာဆိုတာ နှစ်ဖက်မိဘတွေပြင်ပေးရတယ်၊ ဒါမှ မင်္ဂလာမောင်နှံလည်းမြဲတယ် " ဟူသော ထွဋ်ခေါင်အမေ ဒေါ်ကြည်ပြာရဲ့စကားကြောင့် ကျန်တဲ့လူကြီးတွေမှာလည်း နှစ်ယောက်အိပ်မွေ့ယာကြီးအား ဝိုင်းဝန်းကာအိပ်ယာခင်းစွတ်နေကြသည်။ ပွဲပြီးသည်နှင့် ထွဋ်ခေါင်တို့အတွက်ဝယ်ထားပေးသော အိမ်သို့တန်းလာခဲ့ကြခြင်းဖြစ်သည်။ ရူပါကတော့ ပင်ပန်းတယ်ဆိုကာ ရောက်ကတည်းက ဧည့်ခန်းရှိဆိုဖာပေါ်မှာပဲအိပ်နေ၏။

ကိစ္စအဝဝပြီးစီးသွားမှ မိဘတွေလည်းနှုတ်ဆက်ပြီးပြန်သွားကြသည်။ ထွဋ်ခေါင်လည်း အိမ်ရဲ့ဖွဲ့စည်းပုံကို လိုက်လံကြည့်ရှုဖြစ်သည်။ အိမ်ကနှစ်ထပ်တိုက်ဖြစ်ပြီး အပေါ်ထပ်တွင် ဘုရားခန်းအပါအဝင် အခန်း ၅ခန်းရှိသည်။ အောက်ထပ်တွင် အိပ်ခန်း ၃ခန်းနှင့် ဧည့်ခန်း ၊ စတိုခန်းအသေးလေးနှင့် ထမင်းစားခန်း ၊ မီးဖိုချောင် ပါဝင်‌သောအိမ်လေးက သူတို့နှစ်ယောက်အတွက် လိုတာထက်ပိုပြီးကျယ်ဝန်းသည်။ ခြံဝန်းနှင့်ဖြစ်ပြီး ကားဂို‌ဒေါင်လည်းပါသည်။ ဆိတ်ငြိမ်ရပ်ကွက်ဖြစ်တာကြောင့် နေရတာအေးအေးချမ်းချမ်းရှိမှာ အမှန်ပင်။

ထွဋ်ခေါင်ပင်ပန်းကာ နုံးနေသောစိတ်ကြောင့် ရေအရင်ချိုးရန်စိတ်ကူးလိုက်သည်။ ရူပါလည်း ဧည့်ခန်းမှာအိပ်မောကျနေဆဲဖြစ်တာကြောင့် နောက်မှနှိုးပြီး ရေချိုးခိုင်းရတော့မည်။

ထွဋ်ခေါင် ရေချိုးပြီးထွက်လာချိန်တွင် ငဂျစ်ကောင်လေးမှာ အခန်းထဲရောက်နေသည်။ နှစ်ယောက်အိပ်ကုတင်ကြီးကို သူတစ်ယောက်တည်းနေရာအပြည့်ယူထားပြီး ခြေကားယား၊ လက်ကားယားဖြင့်အိပ်နေ၏။

" ရူပါ "

ပခုံးကိုဖွဖွပုတ်ကာခေါ်လိုက်ပေမယ့် နိုးမလာ။

" ရူပါ ထတော့ "

နောက်တစ်ကြိမ်ထပ်ခေါ်တော့ အင်း အဲ လုပ်ပြီး အနည်းငယ်လှုပ်ရှားလာသည်။ မျက်လုံးကမပွင့်သေး။

" ရူပါ.. ထပြီး ရေချိုးတော့ "

" ပင်ပန်းတယ် "