"ربما كان السكوت جواباً"
°•○○○○○○○○○○○○○○●○○○●●•°
أنفال
تبسمت بنصر... و طلعت فطونوبيل ....شفت غيه بنص عين ...قالك زعما زعما خويا ... هاوليك وجهي .... ادا ماوليتش تحبنيي ... مايسمونيش أنفال ادا مارجعتلكش وش درت فيا ثالت و مثلت ... و ليام بيناتنا يارؤوف ...دورت راسي نشوف لبرا وهو يسوق في صمت ....كسر هاد الصمت صوت تيلفونو ... عقدت حواجبي بتركيز نسمع بدقة ... نحاول نفهم صلب الموضوع
رؤوف : وي
.....................
رؤوف : ماشفت حتى ميساج
........................
رؤوف : صحا ...
كوبا وشاف فيا و تنهد ... قدرت نفهم انو راهو على الميساج تاع صباح ...حمحمت نحاول نخرج صوتي و قلت : وشبيك ..كاشما صرا ؟؟
جاوبني و هوا يشوف فطريق : ظهرلي شغل ...نحطك و نروح كي تكملي عيطي لشوفور ...
هزيت راسي و سكت ... مور 10 دقايق كنا لحقنا للمكتبة ...
رؤوف : للمكتبة و غير تكملي للمقر ... ياك مادوريش من و من
قلبت عينيا منو و هبطت ...غير غلقت الباب تاع طونوبيل ... قلع مخلي الغبار موراه ... شردت فطريق لي راح منها نخمم كيفاش راح تخلاص علينا ... لازم عليا نختار ... عايلتي أو الفرقة ... لازم نخير واحد برك ... و نتحمل مسؤولية القرار لي خديتو ... من جيهة لي نحبو وخاوتي لي مدتهوملي الدنيا ... ومن جيهة عايلتي ... لي معندهم حتى ذنب ... و انا خيرت عايلتي ... بالاك قراري أناني ... بصح هادي هيا الدنيا ... ماتمدلكش كلش ... بالاك راح نندم على قراري ... بصح لازم نقسي قلبي و نحي كلمة خوف من قاموسي ... لازم نكمل بالخف ... جبدت تيلفوني و بعث ميساج لعبد الكريم ... تنهدت بتعب ... غير جيت ندور حسيت بأسماء عنقتني ... صح ماعنديش بزاف ملي نعرفها مي متأكدة انها الوحيدة لي راح توقف معايا كي تبان الحقيقة ...
أسماء : يااااا شحال توحشتك ...
بادلتها العناق : ياااا تشوفي انا ...
شدتني من يدي و قالت : عندي مانحكيلك ... عقدت حواجبي و تبسمت : لالا ماتقوليليش !! ... حطيت يدي على فمي كي شفتها تبسمت مأكدة شكوكي ...و قلت بصدمة : قبلتي بشيخ أدم ؟!! كيفاش ...
عضت على شفتها التحتانية بحشمة و طلعت يدها ... غير شفت الخاتم حليت عينيا على وسعهم و بديت نعيط بلا ماجبت خبر ... حطت يدها تجري على فمي تسكت فيا و تضحك ... نحيتلها يدها و قلت بعدم تصديق :سيك نتي دوك وليتي مخطوبة ... ياعمريي مانيش مآمنة ... شحال كيوت ... تتوالمو
ضحكت أسماء بخفة و قالت : هههه فرحتي كثر مني ... امشي امشي نروحو نقراو
شديتها من يدها و قالت : لي قرا قرا بكري ... خلبنا نروحو نحتافلو بهاد المناسبة
اعترضت أسماء و قالت : وشمن احتفال يهديك ربي ... راكي حابة خويا يقتلني ... و زيد وين تحتافلي امشي قدامي تشوفي ...
تفكرت فهديك دقيقة رؤوف و تحذيرو ... بصح بيناتنا هو وش دخلو ... يروح يخراا ... اياه مليحة هادي .. شفت في أسماء لي سبقتني و رحت لحقتها و قلت : بصح نتي راكي مخطوبة ... شاوري خطيبك ...ماشي خوك ..
تنهدت اسماء و قالت : انفال .. الموضوع ماشي شكون نشاور ... انا خرجت على اساس حنقرا ... و كي خرجت نروح نقوللهم بدلت رايي ...
ذبلتلها عينيا ... نفخت بيأس وقالت : نقراو شوية قبل اومبعد ساهل ...
ضيقت عينيا فيها و رقدت صبعي و قلت : بالاكي تحشيهالي
قلبت عينيها و دخلنا للمكتبة
_____________________________
احم احم ... وش رايكم في شوية حزن ؟؟ 🙄🙄😁
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Actionاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
