لا تجعل طيبتك كتاب يتصفحه الجميع؛ فهناك أناس لا يستحقون منه حرفاً
°•○○○○○○○●●●●●●●●○○○○○•°
غير دخلو للكوخ ... شدتها لينا من يدها و قالت : ليديا راكي مقلقة مني .. كاشما درتلك ؟؟ من صباح و نتي تتفاداي فيا ..
نحات لها ليديا يدها بهدوء و قالت بلا ماتشوف فيها .. : مادرتيلي والو ...بصح راني حابة نبقى وحدي برك ...
عاودت شدتها لينا و قالتلها : نقعد معاك ... و نوعدك مانديرش الحس ...
طلعت ليديا عينيها و قالت : لينا ... تعيشي ماتسيفيش روحك ... مانيش في نهاري ... و مانيش حابة نجرحك بهدرتي ...
شافت لينا فيها مستغربة اللهجة لي تهدر فيها : مانسيفش روحي !! علاه راكي تهدري معايا هكا ؟وش لي تبدل بين ليلة و نهار نقدر نفهم
ليديا باستهزاء : تبدلو بزاف عفايس ... فللخر ظهر بلي انا واحدة ضعيفة ماعندهاش راي ماعندهاش شخصية ... مذلولة ... و تعرفي حاجة ... بالاك صح عندكم الحق .... كي جيت نشوف ... لقيت روحي انا برك لي ضحيت علجالكم ... انا برك لي نخاف نزعفكم ... نخاف نخسركم ... و نتوما لي يجي يعفس عليا .. واحد فيكم ماقال كاين بنادم يزعف ... كامل تجاهلتوني ... كامل اعتبرتو سكوتي و مسامحتي ليكم بلا ماتطلبو السماح ... ضعف ... كامل درتونس مانحسش ... واحد ماولا يديرلي حساب ... فالاخير وليت وحدة مذلولة ... بصح خلاص حتى انا عييت و كرهت روحي ... كرهتوني في روحي وش حنزيد نقولك كثر ...
نطقت لينا بتردد و دموعها يسيلو عكس ليديا ... لي كانو عينيها بلمعة دموع بصح دمعة ماطاحت ... : ب ... بص..بصح نننتي سمحتيلي ... ياك طلبت منك سماح ... و غغلطت ... علبالي بلي كنت انانية ...
عوجت ليديا فمها و قالت : صح سمحتلك ... بصح عييت و انا نحس في روحي مانبانش ... صح سمحتلك بصح ماقدرتش ننسى ... مانيش نلوم فيك ولا نحاسب فيك ... لالا لي صرا صرا ... بصح عييت و انا نبرر تصرفاتي ... عييت و انا نخمم في اتفه تفاصيل لي قادرة تزعفكم .... و نتوما ماشي شايفيني من اصلو .. حاسة حاجة تكسرت فيا ... و راني خايفة ماتوليش كيما كانت
مسحت لينا دموعها و قالت : وش قصدك ؟؟ ماراحش نولو كيما كنا ؟؟ ليديا تعيشي والله شوفي نوعدك نتبدل ... نتي برك ماتخلينيش والله مانقدرش نكمل بلا بيك ...
مسحت ليديا دمعة لي طاحتلها ... غمضت عينيها بضعف ... ملازمش عليها تضعف دوك ... لازم تخليهم يديرولها حساب و قالت : خليها للوقت لينا ... خليها للوقت ...
طرطقت لينا بالبكا وخرجت ... فكرة انها تخسر ليديا ... جاتها صعيبة ... ليديا جامي خلاتها ... تقبلتها بكل عيوبها ... مالغري هيا جرحتها ... جامي بينت ولا هدرت ... قعدت فالدرج تاع الكوخ حتى صونا تيلفونها ... رفدت بلا ما تشوف ... حتى سمعاتو يقول بخلعة : لينا راكي مليحة ...علاه راكي تبكي كاشما صرا ...
على كلمتو زادت فوتيرة بكاها وقالت بشهقة : انا غلطت بزاف ...كنت انانية .. حيجي نهار و نخسركم كامل ياك ...
تنهد بتعب و قال : يهديك ربي لينا ..جامي تخسرينا... ماشي مليح لبكا فهاد الوقت روحي اغسلي وجهك و ارقدي .. نحات تيلفون من ودنها و قالت : صابر يالحابس علاه البكا عندو وقت ؟؟
ضحك على كلامها وقال : ههههه نسيتيني علاه عيطتلك كامل ...
تبسمت شبه ابتسامة وقالت : سمحلنا اسيدي علاه عيطتلي ؟؟
حك صابر رقبتو بتوتر و قال : ااا والو باش نقولك برك بلي انا و زينو ولينا للمكسيك ...
عضت على شفتها التحتانية تمنع شهقتها وقالت : وشمن مكسيك ؟؟ راك تحرش ياك
صابر بنفي : لالا والله غير ولينا ...
تبسمت بألم و قالت بلعقل : راني خسرتك اصلا ...
صابر : وش قلتي ماسمعتش ؟؟
تنهدت و قالت بصوت حاولت تبينو هادي : قتلك تصبح لخير ... انا نعست هداك هوا
كوبات بلا ماتسمع ردو ... شافت فالفراغ تخمم ... ماعياش روحو حتى يعيطلها يقوللها راني رايح ... صح غلطت ... بصح تكره واحد يهملها ... هوا مدارش لوجودها قيمة ... اعتبرها مكاش ...بالاك خاف تمنعو ... يعرف مليح انو كي يتجاهلها تزعف ... انو غيابو عليها يوجعها ... هكاك و راح بلا مايودعها ... مدالهاش حساب ... فهديك دقيقة بدات تفكرت هدرة ليديا ... عندها الحق ... حاجة توجع بزاف كي ناس مايديروش حساب لزعافك ... خاصة و ادا كنتي عاطيتهم قيمة في حياتك ... كل يوم راهي تستوعب حجم الغلطة لي دارتها ... شافت في باب الكوخ و تمتمت باصرار :نوعدك حنصلح من اخطائي ...
و هادي كانت محطة جديدة في حياة لينا ... خلاتها تشوف تصرفاتها من زاوية اخرى ... و تزعم انو تغير انانيتها و انها تحكم عقلها قبل ماتاخد اي قرار و قبل اي تصرف ديرو
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Actionاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
