حتى معانقتك بالخيال تربك قلبي💓💓
°•○○○○○○○○○○○○○○○○○○○○•°
لينا : اووف ليديا خلاص نتي درتي الصح ... هيا كانت حتعرف حتعرف ..
خزرت فيها ليديا بحزن و قالت باعتراض : بصح جرحتها ... الانكسار لي ترسم في عينيها انا سبتو لينا بالاك هوا يحبها و كان ناوي ...قاطعتها لينا كي قالت : ليديا ماشي قلتي بعظمة لسانك انو وافق تقربو العرس وشمن حب هادا اهدري !! و هيا كانت حتعرف حتعرف دوك خير من لي تزيد تغرق ... ديجا فهميني نتي وش ذنبك راكي ضحيية كيما هيا ...
قالت و دمعات يطيحو من عينيها: قلبي وجعني عليها ...ايماجيني مالغري جامي زينو مدلي امل في علاقتنا و مالغري كنت نعرف احساسو مليح اتجاهي بصح هكاك و توجعت كي شفتكم كيف كيف ...حسيت قلبي مزير ...مغموم ...حسيت انو مراحش نزيد نفرح في حياتي ...و هيا مسكينة اعطاها امل و راح خطبها تقدري تتخيلي كمية الخذلان لي حست بيها .... ندمت 20 الف مرة ...الحقيقة كانت حتبان حتبان ..هكا ني حاسة روحي انا السبة ... تقربت منها لينا و مسحتلها دموعها و قالت : بوزينو الحساس ديالنا .. ضحكت ليديا بخفة و قالت : هههه قول والله !! كي كنا في تونس و ماكنتيش تهدري هكا تخلطولك لي باراماتر ههههه ...ضحكت لينا و عنقتها ...سرعان ما كتمت ضحكتها و هيا تشوف في صابر داخل مع وحد الطفلة ...و شادها من يدها ...شافت في وجها ثبت فيه ...لالا ماشي ختو ...
دخل عبدو موراهم ...توجهو عينيه ديراكت ل لينا ... عاود شاف في صابر لي شاد لونا من يدها ... عقد حواجبو كأنو الزمن يعاود في روحو ...نفس المشهد تاع زينو و لينا مع ليديا تعاود مع لينا ...سبحان الله كما تدين تدان ... نفض هاد الافكار من مخو ...و تقرب يشاهد ...
لينا :
هبطت يديا على ليديا ...حاولت نخطي الخطوة لولة بصح ماقدرتش ...حسيت روحي فشلت ... حاولت نظم دقات قلبي ... و ندخل اكبر قدر من الهوا ...حسيت الجو ظغط عليا كي شفتو يطمن فيها بعنيه ... ضحكت بسخرية ... و قلت : ههههه خفت عليها مني ؟؟
ماحسيتش بدموعي كيفاش سالو ...حابة نكذب وش جا في بالي ...تفكرت اخر مرة كي قالي ماتتسرعيش ... مسحت دموعي و رسمت ابتسامة بسيف و قربت منو نهدر بهدوء عكس الحرب لي نايضة داخلي : شكون هادي ؟؟ طلعت يديا ف سما و كملت : هاا شوف ماشي نتا قتلي ماتتسرعيش في حكمك هاني جيت نسقسيك ...شكون هادي ؟؟ عقد حواجبو ...حسيتو مستغرب و قال بثقة : نهدرو وحدنا خير ...
شفت في ليديا لي حتى هيا دموعها غطاو عينيها و زدت شفت في عبدو لي كان يشوف فيا بحسرة كانو يفكرني بواش درت في ليديا ...هزيت راسي بهدوء و خرجت ...حسيت الكلام مراحش يساعفني ... غير ضربني الهوا ... شهقت بالبكا ...حسيت بيه كي جا ... ماحبيتش ندور ليه .. عارفة غلطت و خلصت و مازال نخلص ...بصح علاه ...مور ماقررت نتبدل ...مي الله غالب هادا هوا قانون اللعبة اي حاجة نديروها ندفعو ثمنها ... سمعت صوتو كي قال ببرود : نظن انو حنا ناس واعيين .. كنت نكنلك نشاعر بكري و كنتو كامل عارفين هكاك و رحتي وليتي مع زينو و هوا قبل ... رغما عن وش نحس انا ... مرانيش نحاسب فيك ...حكاية جازت ... بصح حاب نطلب منك كيما انا تفهمتك و خليتك تعيشي حياتك بلا مشاكل ... نتمنى تتفهمي انو راني دوك مع لونا و علاقتنا راهي جدية و بالاك نديرو العرس هاد الشهر ... بالاك تشوفي فيا نقسى عليك مي راني تسمعي مني انا لول باش ماتتصدميش اومبعد ...
درت شفت في عينيه ... قربت منو نخبط فيه و نعيط حابة نخرج وش راني حاسة : علاااه اهدرر علاه مديتلي امل و موراها جايبلي خطيبتك ... كي نويت هكا من لول علاه خليتني نتبدل علجاالك ... سكت شويا و مخي يربط فالاحداث ..طبعتو حتى تزحزح خطوة للور .. رفدت يدي على طولها و هبطت بيها على وجهو ...شاف فيا مصدوم ...وليت للور نسفق و نضحك و دموعي راسمين طريقهم على خدي : برافو برافوو الدكتور صابر برافووو ...شوف راني نسفقلك ... حبست مانسفق و قلت بهدوء : من لول كان كلش لعبة ياك من لول !! درت هاد الشي كامل باش تنتقم مني رغم اني قتلك علاه درت هكاك و نالغري نعرف بلي غلطا بصح نتا وش درت رحت اوهمتني بلي سامحتني و بلي نولو اصدقاء و مديتلي امل و عرفتني على ختك لي تخرج من فمها غير السم ...ههههه ادا ماشي حتى هيا داخلة فاللعبة ... و موراها جايبلي نص بنادم تقولي خطيبتي ...بعد ماخليتني نآمن انو الدنيا بدات تضحكلي ...بصح انا لي حمارة كان لازم نعرف انو لي كيما انا حرام عليهم الفرحة ... زير على يدو و اعطاني بظهرو رايح ...كملت نهدر مش مهتمة بتجاهلو : اشفى مليح رح يجي نهار و تندم على وش درتلي ... نتا طلعتني لسابع سما و عاودت ارميني حسبي الله ونعم الوكيل... حبس في بلاصتو و عاود و لا ليا يجري ... كانو ماتقبلش اني وكلت ربي عليه ... جبدني من يدي حتى خبطت في صدرو ..سبقتو قبل مايهدر و قلت و انا نشوف في عينيه : تحبها ؟؟ حسيتو تفاجئ من واش قلت ..رخف يدو عليا و قال : تعجبني ... و حاب نكمل حياتي معاها ...حاب ننساك و ننسى وش جوزت معاك ..مراحش ننكر وحدة مراح تدي بلاصتك عندي ... مكاش لي راح نحبها كيما حبيتك و مزال نحبك بصح بيناتنا كرهت هاد الحب و كرهت قلبي لي حبك ... حاب ننسى اي تفصيلة تفكرني بيك ... تبسم بقهر ...دفعني شويا و راح ... طحت فالرض حاسة بفراغ رهيب في قلبي ... نشوف في نقطة وحدة ... مانسمع في حتى حاجة ...مخو يعاودلي هدرتو لي قالها ... و قلبي يحس فيها كلمة بكلمة ... و كأنو يحتضر كلما يعاود كلامو ... حطيت يدي عليه نزير عليه ...صوت دقاتو ضعافوو فمضت عينيا مستسلمة لظلام لي حاوطني من كل جيهة .. و الهدوء لي استكان في في قلبي و داخلي عموما
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Açãoاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
