"تعلم من اخطاء الآخرين حيث انك لن تعش ما يكفيك من العمر كي ترتكبها كلها بنفسك" .
توفيق الحكيم
°•○○○○○○○○○○○○○○○○○○○○•°
الجزائر _ عنابة
غمضت عينيها بيأس و قالت : انفال خلاص ماما من لي جيتي و نتي منعقتني ..مراحش نهرب ..تبسمت انفال و بعدت عليها ..: دوك كي نروح تتوحشيني ...كانت الام حترد سمعت تيلفون يصوني ... عقدت انفال حواجبها من نهار جات ماصوناش ...زعما زعما يكون هوا ...مجرد فكرة خلاتها طير لسابع سما ...صوطات لحماس واضح ..رفدت بلاما تشوف ...
ليديا : انفال سافا ... خبطت راسها بيدها و قالت باحباط : هادي نتي
ليديا باستغراب : مالا شكون حبيتي ..
داركت الموقف بسرعة و قالت : حسبتلي اسماء ...المهم وشراكي ...وينك مابنتيش ...
ليديا : حنولي للمقر
انفال بخوف : علاه كاشما صرا
ليديا بنفي : لالا عبدو راهو هابط ..نروح نوجد الحالة ..بصح
انفال : بصح واش ؟؟
ليديا بتردد : راهي معايا بنت عمي و تعرفي مانقدرش نخليها فالمقر ... قلت ادا معليش تبقى مع ماماك مؤقتا ...غمضت انفال عينيها ..ماتقدرش تزيد تغامر بروح تانية ...بصح بالاك هكا خير ...و تولي تطمن على يماها من خلالها و ف كلا الحالات ماتقدرش ترفض ليديا من اول طلب ليها ...خرجها من تخمامها ..صوت ليديا : انفال ادا ماشي حابة عادي نشوفلها مكان تاني ...برك حالتها ماتسمحش ...و مكاش عندمن نامن عليها ...انفال : لالا جيبيها تتونس هيا و ماما و زيد وليد خالي مهدي هنا بالاك تعجبو ههههه متعرفي
ليديا بارتياح : معلابليش كيفاش نشكرك ... صحا ...صحا بزاف ...ماننسالكش خيرك ..
انفال : مابيناتناش آ بب ...المهم انا نخليك نروح نقول لماما ...ليديا : اومبعد ان شاء الله ...كوبات و ردت التيلفون لمكانو ... عقلها مشوش بزاف ...و راهي حابة تريحو ... شافت مهدي من لبعيد داخل و شارد ... عقدت حواجبها و راحت ليه ...عيطتلو ماسمعش ... كان قاعد فلجنينة ...تقربت منو بلعقل ...غير حطت يدها على كتفو ... دارلها مخلوع ... انفال بريبة : راك مليح ...تبسم بحزن و قال : حمد الله ..اقعدي ...قعدت جنبو ... و قالت : غير لخير ...تنهد من قلبو و قال : توحشتها انفال ... توحشتها بزاف ...مكانتش ختي برك ...كانت بنتي انا لي ربيتها ...كنت نوكلها نمشطلها نقريها نوصلها لمسيد ... كانت حياتي تتلخص فيها ... حاس بفراغ كبييير كبيير بزاف ... كانو جزء من قلبي مكاش ... قدما حاولت نشغل روحي ماقدرتش ...ماقدرتش ننسى ...مسحت الدمعة لي في عينها و قالت : ماتقدرش تنسى ...راح توالف ...توالف هاد الالم ...حيتعايش معاك و يولي هوا جزء منك ...شاف فيها بتركيز ...طاحولهة زوج دمعات و كملت تهدر : شفت هاداك الفراغ هداك الجزء الناقص من قلبك راح يشغل مكانو الالم ... بالاك ...بالاك هكا خير باش ماننساوهمش ... ديما الالم هداك يفكرنا بيهم ... حاسة بيك ... حتى انا فقدت بابا ...بصح ياخسارة ماكنتش محظوظة كيما نتا ...ماعنديش معاه ذكريات نعيش على محياهم ...مانشفالوش بزاف ...خيالات ...و هاد الشي خلاني نكره روحي لاني نسيتو ... و بينت هاد الشي على اساس نكرهو ..بصح العكس ...الذكرى الوحيدة لي نشافلها مليح نهار قالي اوعديني تقراي و تنجحي و تكوني قوية ماتخلي حد يعفس عليك ...و راني نحاول نوفي بوعدي ليه ... بالاك نفرحو ...هكاك نتا دير حاول تفرحها ...دارت ليه لقاتو غايس فيها ...قال بشرود : تشبهيلها ...تشبهيلها بزاف ... ماشي غير فالشكل حتى فالعقلية لوكان جات حية لوكان تفاهمتو على راسي ...تنهد و ناض ...سمعها قالت : علابيها راك تعاون فيا ؟؟
تبسم بجنب و قال : ماقدرتش نعاونها على الاقل نعاونك نتي ...دار يدو على راسها و قال : انفاال من نهار شفتك حسيتك عوضتي مكانها شوية ... ربي شاهد عليا بلي قبل مانعرفك شخصيا ...درتك ختي و صدقيني اي واحد يخمم يأذيك لازم يجوز عليا قبل ... غمضت عينيها تبكي بشهقة ... زير عليها فحضنو و قال : شحال بكاية بصح ...مسحت دموعها و تبسمت : معنتها ولا عندي خويا لكبير هههه
خبطها لراسها و قال : طيري ترقدي ...هزت براسها و راحت
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Actionاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
