مقابل لبحر يشوف فيه كيفاش مركز فالملفات لي مدهملو ... خزر فيه و قال : كاشما فهمت ؟؟
نوح : علاش راك شاك فيه ؟؟ وشنو هيا السبة ؟؟
رؤوف : عبد الكريم شخص ماشي ساهل ...يعني اذا رتبت الأحداث حتلقى انو عندو علاقة مع كامل أعضاء الفرقة و مستحيل يدخل واحد بلا سبة و كل واحد عندو حكاية ...مثلا لينا باباها مات مقتول و عرفت عن طريق عبد الكريم.. و الجماعة لي قتلاتو هي نفسها جماعة هداك الارهابي بصح ماعلابالهاش ... يعني ماقاللهاش زيد ..زينو مثلا هوا لي كان حيشد هاد القضية كي كان ف الشرطة.. و لكن غير كانو حيمدوهالو ظهر عبد الكريم في حياتو ...حتى من انفال حكايتها كيما لينا... و اما صابر هوا وليدو و هاد الشي واحد مايعرفو من الفرقة تبقى ليديا و عبدو الوحيدين لي معندهمش حكاية و اما انا راك تعرف فالحبس تعرفت عليه ولا خليني نقول تعرف عليا ... هادا كامل فوق ماعندهم نفس طريقة التفكير ...
عوج نوح فمو يخمم و قال : يعني كي تربط الاحداث هكا تستنج 2 عفايس ...
شاف فيه رؤوف بمعنى و قال : ياإما كانو صحاب و صرا بيناتهم حاجة علابيها عبد الكريم حاب ينتقم منو ... ياإما ..
كمل نوح : الارهابي هوا نفسو عبد الكريم ..هز رؤوف راسو و قال : المهم كاين رابط بيناتهم و عبد الكريم هو المفتاح لهاد القضية ...
نوح : خلاص شريك كون هاني مدلي سمانة نجيبلك فيها كلش على عبد الكريم ...تبسم رؤوف بجنب و خبط على كتفو بمعزة ...راح نوح ... جبد رؤوف تيلفونو ... يعيطلها شوية و جاه صوتها مبحبح ...
انفال : وي روفي ..
عقد حواجبو متجاهل روفي و قال : وشبيه صوتك بايتة تزغرتي ..؟؟
ضحكت بخفة و قالت : هههه لالا برك صرا مشكل بيني و بين ماما بكيت شوية ..
طلع حاجب و قال بنبرة استهزاء : شويااا؟؟ و ياترى المشكل هادا هوا لي خلاكم تولو لدزاير بلاما تودعيني !!
غمضت عينيها تهدي في روحها ..مش معقول بين المشاكل هادو كامل ...تسمع صوتو برك تنساهم و يولي هوا أكبر مشاكلها ..و قالت : نودعك ؟؟ ..حمحم بتوتر ماشي موالف بيه و قال : قصدي تودعينا ..امم حنا الفرقة و لا لالا ؟؟
حساتو رماها من الطابق السابع ... و قالت بخيبة : كي صرالي هداك المشكل نسيت كلش ...عوج فمو و قال : انفال هاديك يماك وتقول واش تقول عندها الحق ... مرات حنا مانقدروش نشوفوه بصح كي نكبرو نفهمو ...علابيها حاولي تصلحي من علاقتك معاها ...رضا الوالدين هوا كلش في ها د الدنيا و بلاه ماتربحيش ...حكمتها غصة من كلامو ..حتى خوا باين متأتر من هاد السوجي حتى و ادا مابانش في صوتو و قالت : ماشكيتش تتصلح هاد المرة غلطت غلطة كبيرة ... واحد مراح يسامحني عليها ...تمتم تفكر هدرتها تاع اخر مرة و قال بنبرة غامضة : انفال ياك مراكي مخبية عليا والو ؟؟
بلعت ريقها و قالت : وش حنخبي عليك ... هز راسو يمين و شمال..عارفها تكذب من صوتها و قال : المهم غير غدوا الباك عيطتلك باش نتمنالك التوفيق علبالي بلي تقدريلها .. ماتعمريش راسك كلش يفوت ...و تهلاي في روحك ...غير جات حتجاوب كوبا عليها ...شافت فتلفون بيأس و قالت و عادت ريمة لي عادتها الكريمة...
مهدي : عادتها القديمة يالحابسة...قفزت في بلاصتها بخلعة و قالت و هيا تنهج من الخوف : خرااا ماشي كريمة و لا قديمة نتا وش دخلك هنا وقتاش دخلت اصلا!!
تيرا عليها بمخدة و قال : معامن كنتي تهدري ؟؟
عاودت تيراتها عليه و قالت : وش دخلك ؟؟ ..جبدها من شعرها و قال : هكا تهدري مع خوك لكبير .. رمات يدها لشعرو تجبد فيه ...خيا تان و تقول : اطلقني و جعتني ... جاوبها : كي تطلقي نتي نطلق ...انفال : صحا اطلق نطلق و هوما هكاك ...دخلت سمر شافت فيهم باستغراب و قالت : جيت ندي الشارجور ...طبع مهدي انفال بزربة حتى طاحت فوق الفراش و قال و هوا يعدل في روحو بإحراج : احم احم اهيه ...رفدت سمر الشارجور و خرجت كيما دخلت ... شاف في انفال بغيض ..هزتلو حواجبها تغزل فيه و قالت : ياخسارة الهيبة كامل راحت ..شاف فيها من لفوق للتحت بقرف و قعد على الفوتاي مقابلها و قال بجدية : ارواحي هنا تشوفي عندنا هدرة ...عدلت من روحها و قربت منو
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Actionاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
