بعض الأسرار تكمن في تلك التفاصيل الصغيرة ... التافهة ... التي نهملها
°•○○○○○●●●●●●●●○○○○○○○•°
شمس جديدة طلعت ... جايبة معاها احداث جدد ... ناضت انفال كي لعادة ودارت روتينها الصباحي مع رؤوف وسوسن لي تجنبتها قدر المستطاع ... حتى كي كانت ترميلها فالكلام تجاهلتها ... حطت الملفات قدامها و تنهدت بتعب ... رؤوف حب يختبرها ... و وكلفها باختيار اول مهمة ... عوجت فمها وقالت : يعني لوكان تولي عليا نخير لي يحتوي على اقل عدد صفحات ... بففف حكمت اول ملف تقرا فيه بملل ...رماتو باهمال كي كملاتو و حكمت ورقة تكتب فيها اهم المعلومات...
جيهانغير كاد اوغلو ... رجل اعمال تركي ... 45 سنة ... عامل استثمار فالصحراء الجزائرية ...على شكل عدة فنادق ... في عام 2016 قدر العميل اسامة بن #### يتاكد من معلومة سرقة البترول ... بصح القضية تغلقت في نفس العام لعدم وجود ادلة ملموسة ... و لهاذا تحولت للتحقيق السري ...
طلعت حاجب و قالت : والله يطلع منك يالاربعيني ... بصح مافهمتش كي راهم متأكدين ... علاه خلاوه يكمل في اسثتماراتو ... محسوب ماقدروش يلفقولو كاش قضية و يحاوزوه .... دورت الصفحة الثانية تقرا ... متزوج و مطلق ...مادخلش في علاقة موراها سواء علاقة جدية او عابرة ... يقولو انو تزوجو عن حب كبير ... لدرجة لنو طلاقهم كان صدمة ... عندو ولد منها في عمرو 20 سنة .... استقر مع يماه فترك ... و حقق نجاح لابأس بيه فالغنا ...و نقدرو نقولو انو هوا نقطة ضعف باباه ... من هواية جيهانغير العزف على البيانو ...شخصية غامضة ... دورت الصفحة لقات تصويرتو ... عوجت فمها وقالت الشيب و العيب ... غلقت الملف ديالو ... و حطاتو ... شافت ليديا ناضت تجري عنقتها ... و قالت بفرحة : يابنتي توحشتك ... ضحكت عليها ليديا بخفة و قالت بمعاندة : يابنتي ماشفتينيش نهار برك ... خبطت لانفال لكتفها وقالت : الحق على الكلبة لي تتوحشكم ... سكتت شوية و قالت بقلق : وشبيهم عينيك حمورة ... كنتي تبكي ... راكي مليحة ؟؟
تبسمت ليديا ابتسامة باهتة و قالت : متخافيش فترة و تجوز ... ردتلها انفال الابتسامة و قالت : نعرفك بلي قوية ... و فترة و تجوز .. بصح ماتخليهاش تطول ... الوقت راو يجوز ...
عنقتها ليديا ... بعدت عليها تجري و خبطت راسها بيدها و قالت : نستيني علاه جيت .. رؤوف راو يسنى فينا جيبي الملف و الحقيني ... تبسمت انفال بتوتر ... و حكت شعرها ... كيفاش حتقولو بلي هيا اصلا قرات ملف واحد ... فوضت امرها لربي ... و رفدت الملخص لي دارتو و راحت ... لقاتهم كامل متجمعين حتى من سوسن لي قاعدة قدام رؤوف ... نفضت الافكار هادو عليها ... مش وقت غيرتها.. حتى هيا يجي وقتها ... و ادا ماوراتلهاش الزنباع وين يتباع ... متسسماش انفال ... حمحمت و قالت : شوف رؤوف ... خليني نكمل نشرح اومبعد باش تسقسيني علاه خيرت هاد الملف بذات ؟؟
عوج فمو و هزلها راسو بالموافقة ... نفخت على جنب ... حكمت تصويرتو و علقتها و بدات تشرح في واش كتبت ... مور ماكملت تشرح ... شاف فيها رؤوف بافتخار ... و قال : علاه هادا بذات ؟؟
حكت شعرها بغباء و قالت : اسهل قضية و مهمة بينهم ... تحطمت كامل امال رؤوف في هديك دقيقة ... عضت على شفتها بتوتر كي سمعت صوت ضحكة سوسن ... تحكمت فاعصابها ... خزر عبدو ف رؤوف و قال : وش قلت ؟؟ نبداو فيها ...
لينا : انا تبانلي وش قالت انفال وجهة نظر ... خاصة بعد فشل اخر مهمة ... على الاقل نضمنو انو ننجحو في هاد المهمة
شاف فيها رؤوف مضيق عينيه و قال : لينا مكاش مهمة ساهلة ... و القضايا كامل يكملو بعضاهم ...
قاطعاتو انفال : مانظنش انهم مترابطين..
قلب رؤوف عينيها منو و قال : انفال نتي قريتي غير هاد الملف ... من وين راح تشفاي
شافت فيه متفاجاة كيفاش عرف و قالت و هيا تلمح فضحكت سوسن المستفزة : قريتهم المرة لولة شفيت عليهم ..
هدر رؤوف بنبرة استهزاء : كيما شفيتي على الطريق ...
هبطت عينيها باحراج و قالت : شفيت على الملاحظات ديالي ...
قاطعتهم ليديا في محاولة تخفف التوتر : صحا وشنو هيا خطة العمل .. هز رؤوف راسو باستهزاء و سخرية ... فهمتها انفال سخرية من قدارتها ... لمعو عينيها بدموع و قتلت باصرار ...: مرتو
دار رؤوف مركز معاها ... تجاهلت نظراتو و قالت : يحبها و تحبو ...و عندهم ولد ... وش لي خلاهم يطلقو ... احتمال كبير يكون عندو علاقة بعالمو لي مخبيه ... مرتو هيا المفتاح للغز ديالو .. و بما انو وليدو نقطة ضعفو ... كي تتهرد كامل نقدرو نستغلوه ...
شاف فيها رؤوف بدهشة من افكارها و منطقيتها ... لازم يعترف انو بهراتو بتوقعها ... لا طالما هملو الجانب العاطفي فالقضايا ... مانتبهوش لهاد الجانب ... الصراحة هوا ليوم تعلم منها انو مرات السر يكون فالتفاصيل لي نهملوها ... و قال بتأييد : عندها الحق ... حنا نسينا هاد الحاجة ... شافت فيه سوسن و هيا عاضة على خدها بغيض و قالت : كي هكا مالا انفال هيا لي تقوم بالمهمة ...
شاف فيها رؤوف ببرود و قال : شكون سمحلك تهدري ؟؟ و للمعلوماتكم انفال ماراحش تدخل فالمهام ... راح تشارك من بعيد برك ...
سوسن : و شكون نتا باش تقرر هاد الشي ...
ليديا : رؤوف ياك هاد الشي مايدرلناش مشاكل مع عبد الكريم
هز رؤوف براسو : القيادة راهي لينا دوك ماشي لعبد الكريم ...
أنت تقرأ
كرونيك لصة قلبي 2 《خائنة و لكن ...》 باللهجة الجزائرية
Actionاول كرو في سلسلة 《قيود الحب 》 الجزء الثاني من لصة قلبي الخيانة ...خيانة وعد...خيانة ذكرى ...خيانة موقف ...خيانة مشاعر ...خيانة مبادئ خيانة العائلة ...خيانة الصديق..خيانة الحبيب...خيانة النفس... و أغظمها خيانة الوطن❗...لكنها خائنة و لكن .... ❌❌❌ممنوع...
