كرونيك لصة قلبي 2 《خائنة و لكن ...》 باللهجة الجزائرية

《خائنة و لكن ... 》البارت93

غيل لوميت بكلي

وجوه العائلة عبارة عن مرايا سحرية. بالنظر إلى أوجه الأشخاص الذين ينتمون إلينا، يمكننا معرفة ماضينا وحاضرنا ومستقبلنا.

°•○○○○○○○○○○○○○○○○○○○○•°

تمشي تايهة ...حتى فالمسيد دينا شاردة ...جازت سمانة على هاديك الحادثة ...ماهدرت مع حتى واحد عايلتها كلمة زوج ...حتى من انفال تعيطلها ماترفدش  ...حاسة روحها غريبة وسط الناس .. ولا مرة حست بالانتماء لعايلتها ... كانت ديما تحس روحها مهمشة ...ولا مرة سمعوها و لا اهتمو برايها ... كل لي يعرفوه يجرحوها ... ديما هيا بالنسبة ليهم كيس الملاكمة لي يفرغو فيه غضبهم ... كانت مقهورة من عدم ثقتهم بيها ... بصح ولا مرة اشتكات بالعكس ديما تحمد ربي لي اعطاها عايلة ... كي تلاقات بيه ... ماحست بوالو ...استاذ و تليمذتو عادي ... مع ليام حساتو حاب يخرج شخصيتها الحقيقية ...يستفزها و يحكم عليها و يحاسبها ...حتى نظراتو ليها كانت ديما تحسهم عكس شخصيو و وش يحاول يبين ليها ... نهار اعترفلها باعجابو حست روحها طير ... مالغري كانت خايفة من هاد الشعور بصح عينيه خلاوها تغرق فيهم بلا حساب ... هي هربت ليه ...حبت تكون العايلة لي ماقدرتش تنتمي ليها ... بصح حتى هوا خانها ...بعدما خلاها تبدا تحس بكيانها و تفرضو ...و تبين شخصيتها بلا خوف ...خانها و كسرها ...ياربي هيا حباتوو وثقت فيه ...متاكدة انو لي يخزر كيما هوا مايخونش ...كان يشوف فيها بحب ... العنين مايكذبوش متاكدة و عينه كانو يقولو بلي يفنى عليها .. و لا هوا ممثل بارع لهاد الدرجة ... ماحستش بروحها كي لحقت للدار ...غير شافها خوها راح يجري يضرب فيها و يعيط : وين كنتي ؟؟ اااهدريي ماتسكتيش.؟؟ حسبتلك مكانش رجال فدار ...حتى من خطيبك فسخ يادراااا وش شافك ديريييي ..راني نهدر معاك ... استسلمتلو تبكي ماشي من وجع الضربة ... من وجع قلبها لي كل مرة يكون جرحو اعمق ... بعد عليها كي حس روحو عيا ... قربت منها يماها و قالت : ماتزعفيش منو خوك لكبير و خاف عليك ...اصلا كلو من راس هاديك الستوتة تاع مرتو ... طلبت منو الطلاق كي ماحبش يسكنها وحدها ماتبكيش يا بنتي ... و ماديريش على هدرتو ... تعرفيه يهدر برك كي يكون مقلق ... شافت فيها بقلق كي لقاتها ماجاوبتهاش و مادافعتش على روحها كي لعادة ... جات مرت باباها تضحك بخبث ... و قالت : قالك باباك وجدي روحك يدوك يكشفو عليك العذرية يادرااا وش كن حالة لقاك باش فسخ الخطبة ... خزرت فيهم بضعف و ناضت خارجة من دار متجاهلة اصواتهم لي ينادو عليها

عيطتلها وحد 20 مرة يصوني و ماترفدش ... و ماتقدرش تخرج و يماها مكاشها ... ماتقدرش تخلي خوها و حدو ... غير سمعت صوت الباب ناضت تجري ... قابلتها يماها وجها مقلوب ... شافت فيها بقلق و تمشات ناحيتها بلعقل ... كي لحقت ليها قالت بصوت متردد : ماما ؟؟ مزال ما كملتش هدرتها فاجئها كف من عند يماها .. حطت يدها على خدها مخلوعة و مكذبة ... و دموعها خداو مجراهم ... نطقت الام بصوت قاسي : معنديش طفلة لي تخون بلادها ... نتي خرجتي طبق الاصل عليه ياخسارة تربيتي ... شكون نتي ... كان لازم عليا نعرف ...من نهار زدتي و حنا من مشكل لخوه ... وجه الشر ... و ماكفاش تزيدي تخوني بلادك ... كلبة رخيصة و ماتسوايش ... راني متبرية منك ليوم الدين وجهك مانحبش نزيد نلمحو .. من ليوم ماعندك ني ام ني أخ ني عايلة ...  راكي تسمعي ؟؟ حتى عمومك و خوالك تبراو منك ... الله يلعنك و يلعن النهار لي جيتي فيه ...