شيروفوبيا

٣١-خيوط اللعبة

"الرجل يُحب الألم، يُحب من تؤذيه فبالألم يختبر رجولته و قدرته على الصبر لذا لا يتعلق بامرأة تبكي أمامه بل بامرأة تُبكيه".
أحلام مستغانمي.

تذكر هذه الليلةالمريرة و اعتصر الألم قلبه و قال بنبرة متألمة:
"أنا عرفت و افتكرتها بتخوني و شغاله مع داغر".

قال عبد الله متابعاً:
"بالظبط و بعدتها عنك بس هي بقى مستسلمتش و دخلت اللعبة و حطت خطة جديدة خالص و غيرت كل حاجه و مسكت كل خيوط اللعبة في إيديها و بدأت اللعب على كبير، قدرت توصلي ما هي عارفاني بقى و عشان عارفه إني عايز أخلص و أسيب كل حاجه أقنعتني و خدت مني الأمان و إتفقت معايا أساعدها بس إنت تبقى بره الموضوع و وافقتها عشان فاهمين دماغك و إنك مش هتصدق و مش هتثق في حد و ممكن تتهور زي ما حصل إنهارده و تروح تقتله و تقتلنا إحنا كمان".

تنهد و أردف:
"بس ساعتها داغر كان خد إحتياطه و مسح كل حاجه و بقى حذر جداً من كل اللي حواليه فمقدرتش أوصل للورق اللي يخلص سليم و وقفنا و ساعتها هي قررت تدخل سليم في اللعبة و ده كان صعب و خصوصاً إنك مراقبها طول الوقت و دي كانت مهمتي إني دخلت عمرو اللعبة و كان بيراقبها عشان يحميها و إنت متعرفش أي حاجه و عشان إنت تطمن كملت حياتها عادي و بقت تخرج و تمارس حياتها بشكل طبيعي عشان تشتتك و طبعاً كنا مراقبينك عشان نعرف تحركاتك و متكشفهاش و بقت الحراسه هي اللي بتمشيها و بدل ما إنت اللي بتراقبها بقت هي اللي بتراقبك و إنت بتشوف اللي هي عاوزاك تشوفه و طبعاً ده كان سهل لإن عمرو اللي بيحرك الحرس أصلاً".

ينظر أدهم له بعدم تصديق فيما تابع عبد الله:
"إقناع سليم كان صعب و مغامره ممكن تقضي علينا بس هي لعبتها بصياعه إستغلت كل اللي سمعته و عرفته و بدأت تبعتله و تشككه في داغر و هو ميعرفش مين أصلاً اللي بيبعتله و فعلاً دخل الشك قلبه و ساعتها قررت تكشف نفسها قدامه و قابلته و عرف إن هي طبعاً ثار و حاول يداري شكه بس هي رمت الكوره في ملعبه و قالتله كذا معلومه و سابته يدور بنفسه و فعلاً وصل و إتأكد، ساعتها بقى دخلته اللعبة لإن هو الوحيد اللي يقدر يدخل بيت داغر و شركته بكل أريحيه و بقى لينا عين جوا كمان لحد ما قدر يوصل للورق اللي يورطه، كانت كل المخازن و أي مكان لشغل داغر المشبوه بإسم سليم".

إبتسم بسخرية و أردف:
"و عشان داغر مش واخد خوانه من سليم عشان حاطه في جيبه أصلاً وقع بطريقه هبله، سليم عمل عقود بيع و شرا بينه و بين داغر و مضاه عليها في وسط ورق بتواريخ قديمه و رجعت كل حاجه بإسم داغر و بعدها جمعنا الورق و البيانات اللي وصلها سليم و اللي روسيل جمعتها و بقى كله في إيد سليم و راح سلمها للبوليس و بلغ عن داغر و عشان عارفين إنه ممكن يعرف يسلك و يخفف الأحكام خصوصاً إن مفيش دليل على جرايم القتل زودتله حته كمان بإنها سابته يوصلها و عشان ما يضغطش عليك بيها و يفكر إنها نقطة ضعف ليك كنا عاملين خطه و بنصور الطلعات بتاعتنا عشان تبقى معاها و قدام داغر تبقى بتلعب عليكم إنتوا الإتنين و سهلنا موضوع خطفها عشان يتقبض عليه مُتلبس في قضية شروع في قتل كمان و كمان كل الحاجات الخاصه بيك إتنسفت من على اللاب اللي كان مع داغر قبل البوليس ما يجي".