مساء الخير جميعاً☺️، حابه أشكركم علي ثقتكم ودعمكم ليا وأتمني تكون الرواية عجبتكم وأكون قدرت أوصلكم هدفي من الرواية وقدرت أوضح معاناة المرضي النفسيين والتأثيرات عليهم سواء بالإيجاب أو بالسلب وقد إيه المريض النفسي بيكون محتاج الدعم من كل اللي حواليه،محتاج نفهمه ونقدر ظروفه ونساعده وقد إيه مساعدتنا مهمة جداً ليه.
وزي ما قلت كلنا مرضي نفسيين بس بتفاوت وأنا أولكم ودي حاجه مش عيب ولا بتكسف منها أبداً،كلنا بنتأثر من كل حاجه بتحصل وكل تصرف بيصدر مننا هو نتاج لشئ اتعرضنا ليه وأثر علينا،كلنا بنمر بمراحل اكتئاب أو بنتعرض لصدمات في حياتنا بتأثر علينا بشكل ما فا رسالتي لكل واحد عنده أزمه نفسية أو بيعاني من مرض نفسي عاوزة أقولك إنت قوي،إنت تقدر تواجه مرضك وتقدر تعدي من أزمتك مهما كانت كبيره،حب نفسك وقدرها لإنك تستاهل تتحب هي اللي مستحملاك وشايلاك❤️ مهما كانت أخطاءك أو اللي مريت بيه خليك واعي لمرضك وأزمتك عشان تقدر تعدي،سامح نفسك واديها فرصة تانية وثالثة ومليون متبطلش تسامح نفسك،سامح الظروف أو الإنسان اللي وصلك لكده لإنه أكيد نتاج لعدم وعي أو لحاجة اتعرض ليها محدش بيتولد وحش كلنا بنتولد بقلوب نضيفة وصافية بس ساعات الدنيا بتاخدنا وشيطانا يغلبنا وساعات بنكون تحت تأثيرات نفسية ومش معني كده إنك تسامح شخص مؤذي وتسيبه يكمل في أذاه لأ طبعاً بس إبعد ومتسمحلوش يإذيك تاني وسامح جواك عشان تقدر تعدي متعملش زي أدهم🙄،اتمسك بحبايبك واطلب المساعدة،اتمسك بإيمانك بربنا إنه قادر يخليك تعدي وتكمل،لو ضعفت ووقعت في النص متستسلمش اتسند واقف من تاني ومتبطلش تحاول لآخر نفس فيك لإنك تستحق تعيش مبسوط ومرتاح،واستعين بحد متخصص وميهمكش كلام المجتمع والناس المريضه في عقولها وعيونها معمية ولا تحس بالخجل، متسمحش لحد يحسسك إنك فيك شئ مختلف ولا إنك مجنون كون إنك واعي وبتحاول تساعد نفسك ده العقل بعينه هم اللي مجانين وإذا كان ده جنان فأهلاً بيك في عنبر المجانين وسط إخواتك وعيلتك اللي هيقدروك وهيدعموك🥰 هنسميه عنبر المجانين برعاية آية الله مدحت اللي بيرحب بكل المجانين العقلاء💪😎
ونسيبلهم عنبر العقلاء يعيشوا فيه الوهم براحتهم ويقولوا احنا العاقلين ماهو الكلام ببلاش سيبهم يرغوا😉متسمعش لحد يهد فيك ويحبطك خليك مع الناس المريحه ولو مفيش هرجع أقولك عنبر المجانين موجود😁حاسه إني هعمل عنبر بجد ونتلم فيه كلنا يلا فكرة جروب أهو ممكن نعمله ونتلم فيه كلنا😂
وبجد لو أي حد محتاج مساعدة ميترددش يتواصل معايا مش هتأخر وهوصله لناس متخصصة يساعدوه🥰
وأخيراً أتمني أكون إدتلكم أمل في الحياة وساعدتكم تفهموا نفسكم أكتر وتفهموا اللي حواليكم وأخليكم واعيين وفاهمين يعني إيه مرض نفسي.
عندي سؤال أخير وجاوبوه في الكومنتات،في ناس بتبعتلي إنهم مش هيقدروا يتخطوا الرواية وحابين أكمل فيها فأنا فكرت إني ممكن أعملكم حلقات خاصة مثلا نشوف حياتهم بقت عامله إزاي،أحط حاجات فلاش باك حاجات كده يعني فلو حابين أعمل كده قولولي في الكومنتات ولو ده هيتنفذ فهيكون بعد ماخلص كتابة الرواية الجديده بإذن الله،منتظره رأيكم.☺️
شكراً مرة ثانية وإلي لقاء آخر بإذن الله عن قريب جداً برواية جديدة إسمها (إلينا)،شغل مافيا بقي وحوارات 😁هاخدكم معايا في رحلة جديدة بإذن الله تكون ممتعة،ادعولي أخلصها بقي عشان زهقت فقدت فيها الشغف كتير وتوقفت كتير🥺 بس أنا خلاص بقفل فيها وغالباً هيكون فيها حته مفاجأه هتبسطكم لسه بفكر هحطها إزاي😉،إعملوا متابعه(follow) عشان يوصلكم كل جديد وتعرفوا أول مالرواية تنزل.
تعديل:
بناءا علي طلبكم هنزل جزء تاني للروايه بإذن الله،هنبدأ فيه علطول.
دمتم سالمين أيها المجانين العقلاء❤️😘
أنت تقرأ
شيروفوبيا
Roman d'amourتصفعنا الحياة دائماً وتقسو علينا فنصبح كالموتىٰ الأحياء، نسير بأجسادنا بِلا روح، ننطفئ و نفقد بريقنا ونغرق بعتمتنا وتصبح ملاذنا الآمن وهنا نصبح أسرىٰ لهذه العتمة، نَهَاب سطوع الشمس، نَهَاب بريقها الذي يعطي رونق للأشياء فتقر العيون و يضج العالم بالحي...
