اولاد الحكم

البارت ٥

بارت خفيف لطيف لعيونكم ❤️

#اولاد_الحكم
للكاتبة روشان(مروج الشمري)

البارت ٥

غفران : ومن بدت تتشافى والاطباء يتناوبون على حالتها كالو عادي تكدر تحجي وتحرك حلكها بفتحة بسيطة بس مو اكثر

بهالوقت اكتشفنا المصيبة الاكبر وان هي فقدت القدرة عالكلام واختفى صوتها ليومنا هذا ...

اتخيل بتار صار ١٠ سنوات ما سماعة صوت اختي بسببها ؟ تدري شنو؟

اني انكسرت بطلعتها من يمنا اكثر من كسرتي بموت ابوية ،ابوية راح وعافنا قدره هذا من الله

بس امي عايشة ،يعني المفروض اقوى قوة بالدنيا كلها متكدر تفرقها عنا
بس هي وينها !!! لهاليوم حتى مادري بيها عايشة لو ميته بس بالنسبة الي ماتت من صعدت بالسيارة ويا اخوانها
متشوف كتلك مو كل ام تستاهل الكلام الطيب،اني اختار السكوت من يجي طاري امي

بتار صافن بوجهي يقرأ تعابير وجهي الحزينة وعيونه تتألم ويايه هيج شفتها هز راسه يأيد كلامي

بتار : صح صح ،
زين اختج ماعرفتوا سبب فقدانها صوتها ما حاولتوا تعالجوه

غفران : بالمستشفى كل واحد كال شكل
ناس تكول بسبب ضربة راسها ،وكالو حبالها الصوتية  متأثرة بالحادث وهواي اسباب شي ماله دخل بالثاني

لان هي حتى اكلها والبلع عدها صار صعب
ولحد الان تاكل قطع صغار صغار متكدر ترجع طبيعية ،اووف اوف حرگتي عليها شي ما ينوصف

باوعلي وحجى بألم
بتار: شكد شفتي وجع !! شلون كدرتي تكملين وحدج؟!!

غفران : بقدرة الله ،الله وحده الي نجاني من ذيج الايام ،صح لحد الان اعاني
بس كبرت واتعلمت هواي دروس حتى وصلت هالقوة والثبات

قبل جنت بداية الطريق ،اتخيل اول ما طلعوا ايمان من العمليات وصحت من البنج وبدت تصرخ من الالم هنا شنو صار بية واني وحدي يمها

من بديت انطيها اكل وتبجي ما تكدر تفتح حلكها وتتأذى ،من اتشافت وجانت تريد تحجي ويايه وتطلب مني شي وما اكدر افهمها والدمعة توكف بنص عينها

من بدت عمتي رحلت تعذيبها النا ومعاملتنا كخدامات ،نغسل ملابسها ونكويهن وننظف غرفتها وننضرب منها وماكو احد يكدر يدافعلنا ،

كل يوم مر عليه شكد ما اذاني وقهرني بس علمني وصنع شخصيتي 
اتعلمت اسوي كلشي وحدي وما احتاج احد والحمد لله

راح جابلي مي شربت واسولف وياه واحنا بالمطبخ سوالنا جاي ،شكله غريب هو واكف يم الطباخ واني كاعدة واسولف فجان المنظر غريب بالنسبة الي

اخذني الحجي وياه نسيت نفسي ومادري شكد مشى من الوقت هو رفع ايده باوع بساعته

بتار: خل نطلع نتمشى هم نشتم هوى وهم نوصل للشارع العام حتى ناخذ تكسي
مناك وارجعج للبيت