اولاد الحكم

البارت ٤٤

#اولاد_الحكم
للكاتبة روشان (مروج الشمري)

صباح الخير ورداتي ...
البارت ٤٤

سلا: دمرتني ومرضتني ،وما كلفت نفسها تعالجني بيدها ،اختارت اسهل شي عليها

اختارت اكون مجنونة حتى تنعم هي براحة البال

اختارت اكون محبوسة ،وتلتهي هي بزواج جديد

اختارت اكون موسومة بوسم المصحة ،حتى تملك هي السلطة الوحيدة على اموال ابوية بالخارج

كملت كلامي وجسمي يرجف بقوة ، رفعت ايدي امسح بدموعي دايره وجهي عن وارث ،كل كلمة كلتها وحجيتها طلعت مني بدون ما اباوع بعينه ،هو كاعد بصفي واني وجهي للامام وعيني عالحايط هيج يلا كدرت احجي بكلشي ، ادري بروحي مو مذنبة ولا مسوية غلط بس ليش مستحية ؟! ليش احس بالفشلة ؟!!
ليش كسرتي غطت على كل مشاعري !!

حسيت بكف ايده انمد لوجهي ،اتلمس خدي بهدوء وحنية ودار وجهي ناحيته ، دنكت عيوني الغركانة دموع ،شفايفي نشفت من الحجي والشهكة ويا كل كلمة ، ومن كد ما عضيتهن بألم واني اتذكر اسوء ذكرياتي

حجى بحدية وهو محاوط نص وجهي بكف ايده
وارث: باوعيلي سلا ، مو انتي الي تنزلين عيونج
مو انتتتتي .... باوعيلي بقوة مو انكسار

الكسرة للمذنب ، انتي ضحية
وقسماً بالله لا اخلي المذنب يدفع ثمن كل دمعة نزلت منج

سلا : رفعت عيوني باوعتله عيونه مليانة غضب ، حجيت بصوتي المتعوب

ماريد منها شي بس خل تبقى بعيدة عني وتجفيني شرها ، ولو شنو تريد تسوي بعد وهي كسرتني اكبر كسرة بحياتي ، سلبت فرحتي وهزت شخصيتي وصورتي كدام اهلك
شلون اباوع بوجهم بعد شلون ارجع لحياتي ولضحكتي وسالفتي وياهم ؟

مسح دمعتي الي نزلت على كف ايده واني احجي  وكال بتوسل

وارث: لا لاااا عيناي انتي ، محد يكدر يكسرج واني موجود ، محد يكدر يمس صورتج او كرامتج او اي شي يخصج واني بظهرج

اهلي يحبوج ومنتظرين كعدتج على نار لا همهم جية امج ولا الموضوع الي حجت يي

سلا : مهما يكون ... راح يبقى الحجي ببالهم وراح يفكرون بألف فكرة والف سبب

وارث: عوفج منهم سلا ، لا امج ولا اهلي هم موضوعنا هسه ، اهم شي هسه صحتج وعافيتج الي لازم ترجع بعد هالوكعة

سلا: شلون اعوفهم !! اهلك مو مجرد كلمة ولا مجرد اشخاص دخلو لحياتي بطريقة اعتيادية

اهلك عائلة فتحت احضانها الي واتقبلتني بكل نقصي وغرابتي واختلافي
عائلة احتوتني وعوضتني عن كل حنية ولمة وهوسة ومشاعر وخوة اني محرومة منها

اني وانت مو وحدنا بالدنيا حتى تكول عوفج منهم ، من وكعت منو وكف ويانا ؟ ابنا هسه ويا منو ؟لوما اهلك جان انت بمنو حرت ،بيه لو بالطفل ؟