اولاد الحكم

البارت ٤٠

#اولاد_الحكم
للكاتبة روشان ( مروج الشمري )

صباح الورد والياسمين
بارت طويل لعيونكم ، لا تنسون النجمة والتعليقات عالفقرات 😍عوضوني تعبي بتفاعلكم

احبكم. ورداتي 🖤

البارت ٤٠

ضَيعتني
بكيفّك ورديت تآلي
تريد تلگاني
وحِزن روحَي تلمّه ؟
غَربتني
وچفن مارَف لك يَخايب
لا رچف گلبك واگول شويه همّه
غَيرتني
وبهَت كُل لون بخضاريّ
وآه ياذاك الربِيع الضاع حِلمه
.
.
مريم : وصلني البيت فتحت الباب ردت انزل حجى من ورى ظهري

بشير : ان شاء الله اتعلمتي الدرس ،ترى قسماً بالله مجاريج وخاطبج على عمى عيني
بس في سبيل اكسر عيونج الگوية هاي
واربيج على ايدي لان اهلج ما منطيج تربية ، فلا عبالج انتي الي تربيني ....

مريم :گلبي انمرد مرد من كلامه ليش هو شنو من البين حتى يحجي بتربيتي ، ياريت لو هو واحد بي حظ جان اتقبلت الكلام وعبرته ومشيت بس مو بشير !!

بداخلي مقهورة حيل بس ظاهري ارجف من القهر والعصبية سوى ، الموقف الي سواه بيه ما يعبر عبرة سهلة ولا الكلام الي كاله ينسكت عنه

انداريت عليه باوعتله بعصبية ورفعت ايدي احرك واشر بيها من حركة اعصابي ، ايدي ترعش وجسمي تعبان من البرد الي اتشبع بي
حجيت وشفايفي ترتجف وعيني بنص عينه

يالتحجي بالتربية ان ربيتني انت ، او ربيتك اني
حتبقى ناقص شغلة مهمة كلش ،وهالشغلة لا تنشرى ولا تباع .... راح تبقى ناقص رجولة

اقترب بأتجاهي مد ايده بسرعة لزم ايدي بقوة وجرني بعصبية هزني بكل قوته وعيونه صارت حمرة من الغضب

رد بنترة وصوت طالع بحرگة
بشير : عيدييييها بعد ، اذا انت بنت ابوج عيدي هالكلمة بعد ،قسماً بالله ابجيج العمر كللللله

اني رجال وغصباً عن شيب الخلفوج والخلف الخلفوج هم، بس انتي بصلافتج هاي متكدرين تميزين الرجال من غيره ، شفتي نفسج مسترجلة عبالج الزلم انتهى دورهم

واني اكلج الرجال موجود وراح يعيد ترتيبج من جديد يا صلفففة

مريم : عتيت ايدي وسحبتها من ايده بكل قوتي
وحجيت بصياح

عن اي رجال تحجي ؟!!! الي عافني بنص الشارع ومشى ؟ ما فكر شنو ممكن اتعرضله وحدي ؟ لا موبايل لا فلوس ولا حتى شي اتدفى بي .... ما شفت الرجال بهالموقف!!! كلي انت شفته ؟

دار وجهة عني وعاط
بشير : مريم نزززلي من السيارة .... نزلللي بسرعة

مريم : نزلت ومشيت بدون ما اباوع بوجهة وحتى باب السيارة ما سديتها .. طبيت للبيت سلمت على امي عالسريع وبوجهي لغرفتي

كل اعصابي ترجف من القهر ،،، النذل يكول مجاريج وخاطبج على عمى عيني ،ربي يعميك من صدك ان شاء الله ، عبالك اني جبرته يخطبني لو اني جبرته يكون بوجهي كل الوكت ،دمر حياتي ووكف بوجه حلمي ونهى مسيرة تعبي بيوم وليلة في سبيل يتقدملي واوافق عليه وهسه يكلي خاطبج على عمى عيني !!!!