اولاد الحكم

البارت ٩

صباح الخير ورداتي
اعتذر عالتأخير جان عندي شغل  وخطار هاليومين بس مكدرت انام الا اكتبلكم بارت حتى لو الفجر ينزل

#اولاد_الحكم
للكاتبة روشان(مروج الشمري)

البارت ٩

غفران :المرة جانت تباوع علينا ثنينا بس فجاة عافتني وصفنت بوجه بتار مشالت عينها منه ابد وكأنما لكت شي ما لكته بالنظرة الاولى

وعيونها كامت تحجي مو لسانها

حجى بتار بشفة ترجف ودمعة معلكة بجفن عينة ورمشه

بتار : شلونج يمه ...

غفران : من كال كلمة يمه انداريت عليه بسرعة فكيت حلكي وعيوني سوى مصدومة كل حيلي

يمه ؟!!!! يعني امه عايشة !!! مو كال اهلي ميتين ،مدري مصدومة مدري مهبوطة من الكلمة

رجعت درت وجهي عالمرة ،واكفه بمكانها عيونها كامت ترمش احسها ما مسيطرة عليهن والدموع تنزل

مدت ايدها تتلمس بوجه بتار واكتافه وتشهك
ما شفت بحياتي مثل منظرها

الدموع تجري وايدها ترعش رعش ،وكامت تصيح

سنية: يمه بتاااار!! بتاااار !!
عيووون امك عيون سنية

غفران : عاف ايدي بسرعة وحضنها كامت تشك
وتصيح

سنية: يممممه يمه ويييين عفتني وين عفت سنية وموتتها عليك

غفران: بتار حاضنها ويبجي مثل الطفل وامه تبوس بأكتافه وتشمشم بريحته وترجع كلساع تباوع بوجهه بخوف وقلق

سنية : شصااير بيييك يمه ،وين عينك الحلوة وينها ؟!! يا عين امك واهلها

بتار: مابيه شي لتخافين

سنية : ليش هيج وجهك شصاير بيييك امي !
شصاير بيك وماعرفتك اي والله من سودة بوجهي شلون ماعرفتك شلوووون من امداااني امداني

جر بتار ايدها وباسها

سنية : منو سوة بيك هيج ،من الله كسر ايده ولا عافاه ابد

بتار:محد يمه محد ،وكعت بالشغل والحمد لله على كل حال

غفران : اني لازمة الباب مستندة عليها واباوع عليهم وابجي وياهم ،منظرهم حرك گلبي حرك ،منظره وهو راجع طفل بحضن امه خلاني انسى ليش احنا هنا وانسى حتى اني ضايجة منه من الاساس

بس استغربت من كال لأمه على وجهه والي بي بسبب حادث ،واني اليوم عرفت من هذول الجماعة هم السبب بسالفة عينه ووجهه معناها ميريد امه تعرف وديضم عليها مثل ما ضم عليه

واحنا واكفين اجتي طفلة يطلع عمرها ٦ او ٧ سنوات بقت تباوع علينا من بعيد
وكأنها مستغربة من منظر بتار وامه ، وصاحت من مكانها