اولاد الحكم

البارت ٢٤،

#اولاد_الحكم
للكاتبة روشان (مروج الشمري)

البارت ٢٤

بتار: اشششش اشش هدي هدي ،يحجي ويمسح على راسها
قسماً برب العزة الا اخليهم عبرة لنفسهم گبل اي احد وكولي بتار حجاها.

فلة: رديت من بين دموعي
وشراح يرجع ؟!! شنو يرجع لأختي روحها الي سلبوها ،شنو يرجعلها تقبل نفسها،شنو يرجع احساسها بالامان
الي راح ما يرجع ،ايمان منتهية منتهييية بتااااار

بتار: كافي فدوة كاافي ،انفاسج جاي تنكطع لا تكطعيني وياهن ،باعيلي بس باعي

فلة: يحاجيني واني ضامه راسي بين كفوفي وكل جسمي يرجف من البجي ،حاوطني بذراعه بقوة وضغط عليه حتى يحسسني بالامان

رفعت راسي باوعتله وعيوني غركانة ،حجى بتوعد

بتار: وحق لوعة گلبج هاي ،،راح اريح گلبج وگلبها ،،مرح تنسى الي مرت بي بس راح اخليها كلما تتذكر نجاستهم تتذكر عقابهم بنفس اللحظة وترتاح

فلة: هزيت راسي بالموافقة،دنكت وابتعدت عنه ،
باوعت عمة فوزية على كعدتها بالكاع
ايدها فوك راسها وتنوح بمكانها ،دخلت للبيت ورجعت للغرفة يم ايمان ،لكيتها على حطتها كاعدة بالزاوية وحاضنه نفسها وترجف

اتقربت كعدت كبالها ،مديت ايدي امسد على راسها وشعرها ،ساكته هي وعيونها ماعرف وين بس ما تباوعلي ...بقيت شوية وياها بدون ما احجي اي كلمة ،بعدها كلت بهدوء

اجيبلج شي تاكلي ؟هزت راسها بالرفض القاطع
ميصير تبقين بلا اكل

ايمي: عوفيني بلكت اموت

فلة: لزمتني العبرة ،وبالكوة سيطرت على دمعتي
ليش هيج تحجين يعيوني انتي
ان شاء الله هم يموتون

ايمي: اذا ماتوا مراح انسى الي صار بيه ،اني اموت احسن...

فلة: دنكت راسي وبديت امسح بدموعي بسرعة ماريد انهار كدامها
اجه ابنها من برة اتقرب يمها مد ايده يتلمس بوجها بخوف

زيد: ماما اواااه

فلة: دارت وجها على ابنها ،باوعتله بنظرات غريبة مو مثل كل مرة،وكأنما جاي تتذكر ابوه من خلال عيونه

كلشي بي راح يذكرها ان هو ابن واحد نذل وعديم شرف وغيرة واحد ديوث اعتدى على ام ابنه وشاركها ويا ابن عمها

صفنت هواي بوجه زيد بدون متحجي اي كلمة ،ورجعت دفنت راسها بحضنها ،،كمت جبتلها كلاص مي ،حاولت اشربها ،دفعتني بقوة بدون متباوعلي ورجعت تكطك برد

كمت بسرعة جبتلها چاكيت صوت ولفيته على كتفها وظهرها ...رفعت نفسها ورجعت مددت بالكاع بنفس مكانها واتقوقعت على نفسها ...
الكاع جانت مفروشة زولية وهي نامت عليها مباشرة