اولاد الحكم

البارت ٦

#اولاد-الحكم
للكاتبة روشان(مروج الشمري)

البارت ٦

غفران : من شفت الحربة انخلست بمكاني ،ايدي الي لازمتها بيها رجفت بخوف ،المشكلة مو بوجود حربة بالبيت
المشكلة بالمكان الي مخليها بي !

ليش جوة راسه معقولة يريد يسويلي شي بيها؟!صافنة عليها ،باب الغرفة جان مفتوح عالنص دخل بتار صار بوجهي ،فزيت اكثر من شفته،و عينه بسرعة صارت على ايدي

فتح عينه متفاجأ واجه بكل سرعته جرها من ايدي وخلاها بجيب الشورت مالته وعافني ومشى طالع من الغرفة

صحته من مكاني
بتار شنو هاي ؟ ليش مخليها جوة راسك!!
اندار عليه وبينت عليه علامات الانزعاج

بتار : شي خاص بيه ما احب التدخل بي

غفران : رديت بجرأة وعصبية
هالبيت صار خاص بينا مو بيك وهالفراش صار يجمعنا اني وانت سوى ،يعني من اشوف اداة حادة على فراشي من حقي اعرف السبب ،ماكو شي اسمه خاص بيك انت هسه عندك شريكة حياة ولازم تفهمها وتوضحلها كلشي

دنك راسه يهز بي وايده بجيبه قابض عالحربة بيها

بتار :اشاركج بكلشي واي شي الا هاي
الا هاي ..

غفران :صوته انهز فجأة وهو يحجي ،كمل كلامه وطلع من الغرفة

خلاني بحيرة وشك فضيع ،تصرفاته ويايه تحجي شي وعيونه ونضراته تحجي شي ثاني

بقيت بالغرفة مرة كاعدة ومرة افتر ،افتح والم بشعري ،رجعت خربت الميز ورتبته من جديد ،وضايجة كلش

طلعت من الغرفة الدنيا بدت تضلم والجو برد كلش ،
افتريت بالبيت مالكيته يمكن طالع ،رحت المطبخ حميت الجاي وكعدت اشرب بالهول واني مطكطكة من البرد ماعرف ليش هيج صار بيه يمكن من القهرة والتفكير ،مدري الدنيا بردت فجأة ومنا ارضية البيت ما مفروشة

دكت عليه عمة فوزية تسأل عن وضعي وتتطمن وسدته

كملت الجاي ورحت اغسل الكوب، سمعت صوت الباب انفتح سويت نفسي طبيعية وماكو شي،اجه للمطبخ شافني

بتار: السلام عليكم
غفران: عليكم السلام ،انداريت شفت بيده علاليك خلاهن عالميز الي بالمطبخ

بتار: جبت اكل اكيد جعتي هسه ،تعااي خل نتعشى

غفران : اي صح جوعانة بس انتظرتك تجي واسوي شي ناكل سوى ماعرف حتجيب من برة

بتار: لا مردت اتعبج اليوم اول يوم الج بالبيت

غفران : وكفت بصفة فتحنا الاكل وحطيناه بالصينية ورتبت الصينية ونحجي بس بدون ما اركز بوجهه ،اتصرفت مثله هو اساساً اجه يتعامل كأن شيء لم يكن واني سويت مثله رغم كلامه قهرني وبعده لغز الحربة براسي معلك بس كلت اتماشى وياه