اولاد الحكم

البارت ٣٥

#اولاد_الحكم
للكاتبة روشان (مروج الشمري)

البارت ٣٥

فلة: رجعنا من الصالون البيت هدوء بس اني وسلا وايمي بالبيت ،اول مرة اشوف بيت عروس هيج فارغ ،ماكو اهل يمها ماكو ناس تفرحلها وتهوسلها غيرنا اني وايمي ،سلا فطيرة وفرحتها بوارث مغطية عليها هيج تفاصيل تقهر

المفروض على الاقل امها تكون موجودة او اعمامها الانذال ،اني بيوم زواجي مهما جانت حقارة اعمامي بس على الاقل طلعت من بيت ابوية او كل اسمهم اهل ابوية مو بيتي وحدي ،

كلما اباوعلها وهي بالبدلة اتمنى الزم امها واكطعها بيدي ، مثل ما حاقدة على الي اسمها امي حقدت على ام سلا اكثر بعد

ايمان جانت مسوية غداء ،جبت قطعة دجاج وتمن وكلت سلا شوية شوية حتى لا يتخربط مكياجها ،مقبلت تاكل بالاول بس جبرتها خفت يهبط سكرها وتخرب فرحتها الي مرافقتها من ايام ،
حلم جبير بالنسبة الها وجاي يتحقق كدام عينها ،لدرجة الحلك كام ما يقفل حتى هي كامت تصيح فكي يأذيني من الضحك والفرحة ...

اجه بدر قبل لا تجي الزفة بساعة اخذ الجنطة الي خلينا بيها غراض سلا الراح تاخذهن للفندق ،وكال مناك يخلون غراض وارث وياها وتتخلى باالسيارة مال زفة

وبعدها اجت الزفة طلعت اني على صوت المزيقة فتحت الباب دخل بدر بسرعة فتح الباب الثانية حتى تدخل الزفة براحتها رجعت دخلت جوة ،ايمان ماكو داخلة للغرفة والجهال يمها ، اباوع لسلا مدنكة متوترة وتعصر بكفوف ايدها ورغم توترها هم الابتسامة مفارقتها ابد
خاصة من دخل وارث وعينه عليها

البيت انخبص بيهم ،المزيقة من جهة والهوسات من جهة ،شفت عمة افراح وياهم رحت سلمت عليها بس شفايفنا تتحرك وحدة متسمع من الثانية شي ،بس شكلها جان عبالك مريضة لو ضايجة من شي حتى من يجروها حتى تهوس وتركص ،توكف تصفك شوية وتوخر.

وارث:بعد الصار اليوم كدرت اهدأ واسيطر على اعصابي بصعوبة ،حاولت اكعد واحجي ويا عمتي بكلشي صار وافهمها لان بقت شايلة بگلبها على بشير وصدكت الفلم الصار فوك ، بس للاسف ملحكت احجي شي واجت المزيقة وطلعو المعازيم للسيارات

رتبت نفسي للمرة الاخيرة على مراية غرفتي وطلعت بسرعة نزلت لكيت بدر مزين سيارته ومرتبها صعدت امي بالصدر يمه واني وراهم

عدلت رباطي بتوتر وضوجة ... ،شكد برد گلبي من السواه بشير بس بنفس الوقت بعدها نفسي لعبانة من الموقف والكلام الي كالته جنة بغرفتي ،وكرهت نفسي الجانت تحبها واتدمرت من بعدها للدرجة الخلتني اهج حتى من مكاني واهلي ...

وارجع اكول مو ذنبي ،اني اول ما فتحت عيني عالدنيا فتحتهن عليها وكلبي احتواها وحبها جنت طفل ماعرف اميز الصح من الغلط ،الزين من الشين
اتغاضيت عن كل مساوئها وفضلت حبها على كلشي