اولاد الحكم

البارت ٢٣

#اولاد_الحكم
للكاتبة روشان (مروج الشمري)

البارت ٢٣

في غابة انا ،تحت عتمة الليل
خرجت اجري هاربة من ظلماتها
حتى وجدت الشمس تشرق من بعيد
فمشيت امضي في طريقي مسرعة
ابحث عن ضوء ليمحي ظلمتي
فوجدت نفسي واقعة في بئر عميق
.
.

فلة: ساعة ١ الظهر تقريباً ،جنت ارتب بالمطبخ بعد ما كمل الطبخ واستوى الغداء ،،اتصلت عمة فوزية ،نشفت ايدي بالخاولي وفتحت الخط ..الو
اجاني صوتها تبجي وتحجي بسرعة

فوزية: الحكي لأختج غفران ،الحكي عليها راح يصير بيها شي

فلة:عقدت حواجبي بقلق والخوف اتملكني حسيت بمصيبة جبيرة صايرة ،الموبايل على اذني وخالة سنية بالمطبخ يمي ،اخذت الموبايل وطلعت من المطبخ بسرعة ورحت لغرفتي وسديت الباب

الوووو الو عمة ششبيها ايمان ،،حجيتها واني الهث انفاسي بصعوبة من الهبطة،،ردت عليه بكلام متقطع بالكوة فهمته

فوزية : رحت للسوك وعفتها وحدها ..

فلة: اييي وشنوو؟ احجي عفية ايمان شبيهاا
اختي شبيييها عمممة؟!!

بجت بأنهيار ،وكملت كلام
فوزية: رجعت لكيتها فاقدة و ووو ملابسها مكطعة
(كملت كلامها بسرعة )اكو احد مسويلها شي ،
معتدي عليها معذبها ،جسمها مشطططب مشطب غفران

فلة: ذبت الكلام كله بأذني مرة وحدة ،،اريد ابلع ريكي ما كدرت ،النفس وكف بقصباتي رافض يتحرك ،اذاني تراجع كل كلمة سمعتها
الي سمعته صح ،لو توهمت بقيت ثواني صافنة

فوزية: غفران سمعتيني ؟!

فلة: اخذت انفاسي بشهكة ،شهكة تعلن عن جرحي والمي ،تعلن عن حدادي وحريق ما تحت اضلاعي

رفعت ايدي كتمت بي صوتي وشهكتي
وبديت ابجي بكل قوتي ،،حجيت وبالكوة طلعت الكلمات

منوووو هذااا منووو ، ابنننج الكواااااد مووو
احجييي لتسكتين حمييد سوووواها حمييييد

فوزية: مادري مااادري وروح ابوية مادري اني هم اشك بيييي بس تعالي هسة بسرعة
ايمان حابسة روحها بالحمام صار ساعة

مجاي تحاجيني ولا باوعت بوجهي ،حالتها مو طبيعية اخاف سوت بروحها شيي،اروحلج فدوة لحكيلها

فلة : كمت اصرخ ،،دكي البااااب هجميها عليها
اذا اضطر الامر فلشيها كسريها
لتخليها وحدها ابد ابببد

سديت الخط ،طلعت رقم بتار بسرعة ،اريد اطب على رقمه ماكدرت من رجفتي ودموعي ،،بالكوه لازمة التلفون ،شددت قبضتي عالجهاز اخذت نفس عميق

ياااارب منك القوة ومنك الصبر ،اتصلت برقمه واتذكرت بتار بعيد صارله فترة يشتغل بأطراف المحافظة واذا يريد يجي يرادلة ساعة او اكثر حتى يوصلني ،،بس شنو بيدي ومنو الي غيرة