اولاد الحكم

البارت ٢٢

#اولاد_الحكم
للكاتبة روشان (مروج الشمري)

البارت ٢٢

فلة:مرت اول ١٥ يوم من رمضان بس رغم لمتنا سوى عالسفرة ورغم الاجواء الحلوة بس جانت اكو غصة بداخل كل شخص بينا ،سلا وروحتها عنا وبالاخص الطريقة الي فارقتنا بيها كلش مؤذية واثرت بينا ،لان سافرت وابتعدت وهي مكسورة

راحت وتركت اثر جبير بگلبنا ونفسيتنا ،الي يعرفها منا متعلق بيها ومقهور لغيابها والي ما يعرفها زين مقهور ومتأذي على حال وارث من بعدها

وارث الي ضحكته اختفت ووجهه البشوش اتبدل لوجه مليان حزن والم ،حتى وان ضحك بوجهنا فضحكته تكون كذابة ،يجاري ويجامل بيها الي يحجي وياه ،

خلال الايام الي فاتت وحسب ما عرفت من بتار ،بدر اخذ وارث دكتور زميلة اختصاص بالمستشفى الي يداوم بيها وبعد التحاليل والفحوص كايله وضع وارث ما اله اي علاج

وهالشي سبب كسرة اكبر بنفسية وارث بعد ما اخوانه خلو بداخله امل واجه هالدكتور محى هالامل ،بس الحلو الولد ما استسلموا ابد
جانو يشوفون شي بحالة اخوهم يمكن اي دكتور ثاني ما يكدر يشوفها

جان عدهم امل برب العالمين اكثر من اي طبيب بالدنيا لهالسبب ما اتوقفوا ،اخذوه لدكتور ثاني وثالث وهم سمعوا نفس الكلام ،اخر شي بشير جاب عنوان دكتور بأربيل واتفقو يرحون عليه هاليومين

اني مسوية نفسي ما اعرف شي بالموضوع حتى ما اخلي يحس بالاحراج مني ،بس ميته قهر عليه، كلما اشوف وضعه اتخيل لو خالة سنية تعرف جان شصار بحالها والله تكلب البيت عزى علينا ،

ورغم رمضان وصيام وتعب بس بشير اخذ اجازة يومين وراح هو ووارث لأربيل وما قبل ينتظر لبعد العيد ،وكالو لخالة سنية صديق بشير مسوي عملية ورايحين سوى يزوروه لان صاحب واجب ،،

ووصلو هناك لأربيل الصبح واحنا ايدنا على گلوبنا ،بتار رجع من الشغل حتى ما قبل ينام بقى طاب طالع من الغرفة وكلساع جاي للمطبخ ويفتر بالبيت

اجه يمي بالمطبخ جنت اگلي كبة قبل الفطور بنص ساعة ،وكف يفتح بالجدوره

اول مرة يسويها ،باوعت عليه مستغربة وسألته

لازم جوعان اليوم ؟!
رجع قبغ الجدر بمكانه وكف على جهة قريب مني
اتكتف وحجى

بتار: لا بالعكس كلش نفسي لعبانة وما مشتهي شي ،بس ضايج ومتوتر ماعرف وين اروح

فلة: كول يا الله ،وان شاء الله نسمع اخبار حلوة
هو شوكت الموعد مالته

بتار : ورى الفطور ،،تدرين فلة هالدكتور املنا الوحيد من بعد الله ،اذا حجى نفس حجي البقية
معناها وارث انتهى

لا خلفة ولا حيتزوج من الاساس اخوية واعرفه حساس كلش ومستحيل يظلم اي وحدة وياه حتى لو ميحبها