اولاد الحكم

تكملة البارت ٤٨

#اولاد_الحكم
للكاتبة روشان ( مروج الشمري)

ورداتي اني اشبعكم بشير ومريم وانتو شبعوني نجمات😍

احبكم

تكملة البارت ٤٨

مريم : من سمعت اخر كلامه قررت اسكت لان لو حجيت وبررت منا لسنة مراح يصدك بيه بسبب المشاكل الي بينا ، ولان بعده ميعرف اني شكد ما لسان وياه ومبينه كرهي اله بس من اقل موقف ابرد وانسى نفسي لا اريد انتقام ولا غيره ،

صار اكبر همومي اعيش بهدوء وبعيد عن المشاكل سواء ويا بشير او اي بشر بالدنيا ،

رحنا للمستشفى وكملنا دوامنا بشكل طبيعي ، للظهر رحعنا للبيت ، اول ما طبينا حجى هو بعد مجان ساكت النهار كله

بشير : اكو شي اكله قبل لا انام

مريم : استغربت سؤاله لان متعود يتغدى من وكت برة البيت ، جاوبته
اي عندي كلشي، واذا ماكو هم اطبخلك عادي

باوعلي بطرف عينه مستغرب ، عوج حلكه وحجى

بشير : هاي من شوكت صرتي ام بيت ؟

مريم : والله شكلك ما تريد تمشي الامور بسلام

بشير : شكلت يمعودة! قابل سبيت العنب البنفسجي ؟!

مريم : درت وجهي عنه ومشيت للثلاجة بسرعة طلعت منها حافظة مركة عندي مرات اسوي واضم لان احب من ارجع من دوامي اكل تمن ومرگة ، ،اتمشيت بالمطبخ طلعت جدر وحميت المركة واكو حدر صغير تمن الصبح طابخته على كدي هم حميته

هو كعد صافن عليه ، شافني سكتت على كلامه رجع حجى

بشير : ترى احجي صدك ، اني مادري بيج تطبخين غدة وهالسوالف ، هو العشى وبالدفرات كمتي تسويه

مريم : ترى اعرف اطبخ كلشي

بشير : شبي حظي وياج لعد ، هي مخلمة وسويتيها سم علية،صار بيه فوبيا من المخالم كلها من وراج والله

مريم : جنت متقصدة اسممك

بشير : حقيرة مو بيدج

مريم : سكتت حقناً للفتنة والعراك بينا ، صبيتله الغدة ورتبت الميز مقابيله ، كل هذا واني بعدني بملابس الدوام
عفته ومشيت اريد اروح للغرفة ، صاحني بسرعة وحجى بعصبية

بشير : اكلج ، شنو اني بية جرب ؟

مريم : انداريت باوعتله بتعجب ورديت ، لييش ؟!!

بشير : ليش متكعدين تاكلين ويايه ؟اعض اني ومادري بروحي

مريم : لا بس ما اشتهي اكل هسه

بشير : جذابة ، مو كل يوم تكعدين هيج وكت تثردين بالغدة ثريد ،، اليوم اني هنا معاجبج تاكلين

مريم : عفية شبيك شو صاير تدور مشاكل ، مو صار كم شهر كل واحد ياكل وحده وساكتين شنو الجديد