اولاد الحكم

البارت ٤٨

#اولاد_الحكم
للكاتبة روشان ( مروج الشمري )

لا تنسون نجمتي 😍
بارت تغيرون بي النفسية بعد صراعكم البارتات السابقة علمود مريم وبشير 😅بس كثرولنا تفاعل

البارت ٤٨

فلة : بقيت صافنة استمع لكلامة بكل جوارحي ، گلبي انفطر من شفته شكد مقهور وحاس بغلطه وندمان بشكل مو طبيعي ، خليته يحجي كلشي بگلبه لحد ما كمل ورحع عاد عليه نفس الجملة وحجاها بأصرار وتأكيد

بشير : ام حربة ... سوي اي شي ولتخليها تعوفني

فلة: ماشي ،بعيوني والله

رجع شغل السيارة و وصلنا يم بيتهم ، الجهال كاعدين بحضني كل واحد بجهة
نزل هو بسرعة اخذ محمد مني ، وهو بسرعة كمز عليه ، حمودي يعرف عمامه كلهم ويصيحلهم عمو من يشوفهم

الا بشير يسمي تير ويعرف يفرق بينه وبين بدر شلون ما ادري ، بس هالعائلة بيهم رس مال ذكاء حتى جهالهم فطنين واذكياء ما شاء الله

نزلت اني شايلة علاوي ،وقبل لا يفتح بشير الباب اندار عليه وكال

بشير : باعي ، احجي وياها وقنعيها تبطل من سالفة الطلاك ، بس نهائياً متجيبين طاري كلامي الي صارحتح بي ،ماريدها تعرف شكو بگلبي

فلة: انداريتله مصدومة ... شنو هالخشم اليابس بشير ؟!! ليش تطولها وهي كصيرة
البنية اذا عرفت نواياك ومشاعرك تجاها احتمال تبرد وتنطيك فرصة ، ليش متريدها تعرف ؟

بشير : اببببد ديربالج والله اذا حجيتي نخرب للتالي ، اني حجيتلج لان ادري مراح يطلع الحجي ، ماريدها تلزم علية لزمة

شدراج اذا سمعت راح تبرد وتلين ويايه ،اصلاً احتمال جبير راح تحد سنونها عليه اكثر  من قبل 

فلة: لا تحد سنونها ولا شي بس انت متنزل راس وياها ادري بيك ، وتخاف تبادر

بشير : طبعاً ما انزل راسي لا الها ولا لأي بشر بالدنيا ،

فلة: لعد شلون بهالحالة تريدها هي تبادر مثلاً ؟! زين شلون تخليها تلين الك ؟بالعناد والمكابرة

بشير : مادري هي بس خل تبقى ويايه والايام بينا تحكمنا

فلة: ترى مابيها شي اذا بادرت وشرحتلها مشاعرك ، انت تدري بدر شسوة حتى يخلي ايمان تحبه ، الرجال سحل روحه سحل عليها لما خلاها تهيم بي مو بس تحبه وهذا عود الفقير والمؤدب، وانت ابو النسوان مكضيها هوسة ومتعرف تتصرف ويا مرتك

بشير : اي هذاك بدر يسويها مو اني ....

فلة: والله شايف نفسك فد شوفة خرب حظها لمريم

رفع حواجبه حركهن بخباثة، ضحك وجاوبني

بشير : والله هنيال حظها بيه