اولاد الحكم

البارت ٣٩

#اولاد_الحكم
للكاتبة روشان( مروج الشمري)

صباح الخير ورداتي
لا تنسون النجمة وتعليقاتكم الجميلة الي تفرحني 😍

خليتلكم شبيهة ياقوت بالاخير

احبكم

البارت ٣٩

الرجل: اني ما رايد شي يابه بس عندي امانة كاسرة ظهري من سنين واجه اليوم الترجع بي لأصحابها

وارث: اتقدمت اكثر وكفت كبال الرجال بصف بدر ... سألته بتوتر وقلق ،شنو الامانة ؟!!

اندار عالبنية حاوطها بيده وقدمها ناحيتنا صارت قريبة علينا وحجى بصوت مهضوم
الرجل : هاي الامانة
ياقوت الحكم سلمان .... اختكم

وارث : بلحظة الي كمل جملته ،حسيت جسمي اختض برجفة باوعت لبدر بنفس اللحظة والصدمة استحلت كل اركان جسمي

يمكن اني اهون بهاللحظة والا بدر ،حسيت روحه راحت ،حلكه انفتح وعيونه ذبلت فصل عنا ونظراته راحت عالبنية واجفانه ترجف ممصدك الي سمعه

رجعت باوعت للرجال وحجيت بتوتر وگلبي احسه حينشل .... عمي شتحجي انت ؟!
يا اختكم ؟ شلون وشوكت وين جانت
منو يكول تحجي صدك

ود بكسرة وصوت حزين
الرجل: يابوية قابل ارد اجذب عليكم واني الشيب مغطي راسي وگلبي سوى ، والله عيب من نفسي وشيباتي قبل لا عيب منكم

هاية بت اختي ربيتها على ايدي وكبرت ويا اولادي ما عزيت احد منهم بكدها ،يتيمة كبرت بلايا ابوها ،اني صرت ابوها وشلتها هي واختي بنص عيوني لما ربك اخذ امانته وماتت اختي السنة الفاتت ،وبقت امانتها بركبتي داريتها والله وما متعاجز منها روحي هاي

بس اني رجال موات والمرض جاي ينهش بيه ،ماريدها تتبهذل بعدي محد يحن عليها ويشيلها من بعدي غيركم انتو اهلها واخوتها

وهاي اذا متصدك

وارث: مد الرجال ايده بحيب قمصلته ،وايده ترجف المرض والتعب مبين عليه
طلع اوراق مطبگة فتحهن بتاني وهدوء وقدمهن الي

مديت ايدي اخذتهن بسرعة .. اول وحدة عقد زواج ابوية من وحدة اسمها انتصار
عقد محكمة موثق وكامل بتاريخ سنة ١٩٨٩ يعني بعد موت ام بتار بسنة

فتحت الورقة الثانية بسرعة ،بيان ولادة ياقوت الحكم سلمان بسنة ١٩٩٠ بنفس السنة المات بيها ابوية وتاريخ ولادتها قبل وفاة الحكم ب٦ اشهر

ويا الاوراق جنسيتها وجنسية الحكم مستنسخة ومكبوسة بنايلون يعني عدهم مستمسكات كاملة .... كلما اقرا شغلة ايدي ترجف وگلبي يرجف اكثر عيوني بالاوراق رفعت راسي على صوت بشير الواكف بصفي

بشير : شكو ؟ شنو السالفة

وارث: مديت ايدي انطيته الاوراق بيده بسرعة
وعيوني انرفعت عالبنية ... يا الله شنو من شعور اتغلغل بصدري واني اباوعلها