اولاد الحكم

البارت ٢١

#اولاد_الحكم
للكاتبة روشان (مروج الشمري)

البارت ٢١

بتار: احجي وارث ،انت تحبها؟
سكت دنك راسه شويه و ورجع باوع لبتار وحجى بهدوء

وارث :الحب قليل لو اكو كلمة تكفي كم المشاعر الي بگلبي  الها حتى اكولها وارتاح بس

شلون گلبي انطاني احجي  هيج حجاية ،،ولك خسرتها خسرتها بتار
جنت رايد بس لو تبقى كبال عيني بس تكون بخير
ماردتها تحبني ،ردت احميها ردت اعوضها

ردتها تكون بخير حتى گلبي يتطمن ويكون بخير ..

بتار: شنو هالتناقض الي عندك !!! قبل يومين تكول ماريد اتزوجها وماعندي شي وياها وتجاها

هسه جاي تموت وروحك تنسحب سحبه الخيط من الجرح عليها

اذا تحبها ليش حجيت هالحجي ليش وصلت نفسك ووصلتها لهالمرحلة؟!!!

كعدت وارث بالكاع دنك راسه بخيبة وجاوب

وارث: ردت اسكتكم عن موضوع الزواج ،مادري بيها راح تسمع

اخذ نفس بألم ورجع دار وجهه عن بتار وحجى بدون ميباوع بوجهه

حبيتها لدرجة جنت اخاف عليها من حبي ،جنت اتگاتل ويا عيوني حتى ما تباوعلها بنظرة حب ،عاض لساني ولازمة بالكوة حتى ما يحجيلها كلمة حب

ما اتمنيت ولا ردتها تحبني ،بديت وياها كصديق ما اكذب واكول ما عجبتني ،اساساً الي شدني الها هو
اعجابي بيها

،عيوني جبرتني اباعلها بالوكت الجنت غاضهن عن كل جنس حواء ،عجبتني وعجبني حتى الحجي وياها ،سلامها كل يوم ،ضحكتها ،فطاريتها وفرحتها بيه

مجنت متخيل كل هذن انغرسن بگلبي ونبتت جذورهن من شفتها وحيدة،امها اتخلت عنها في سبيل تتزوج ،ابوها مات واهلها بعاد كلش

من شفتها تصارع الم وحزن ووحدة بالمستشفى ،انشالت قطعة من جسمها ومحد كلها شلونج ،اني بس الجنت يمها

نبت اول جذر لحبها بگلبي ،من شفت روحي ترجف عليها بخوف ،من شفت نفسي اركض هنا وهنا بس حتى اشوفها بخير

ورغم كل هذا ما بينت ،خفت الله بيها وبگلبها ،خفت الله لا اظلمها ويايه ،ردت اوصلها لبر الامان لعمامها ،اتطمن عليها وانسحب منها قبل لا ااذيها

بس الي جنت باني امالي عليه خاب وخابت كل ضنوني ،جنت مستعد اصارع حبها وفراگها بوحدي المهم هي تكون بخير

بس كأن رب العالمين كاتبلنا نبقى سوى ،ورجعت ويايه لهنا ورجعت لنقطة الصفر (حجاها وضرب كف ايده بالكاع بضجر)

فلة: جنت يم باب المطبخ بس صوتهم مسموع وجاي اسمع كل نقاشهم ،كمل وارث كلامه ويتار عقد حواجبه بعصبية بعد الي سمعه منه رد عليه بعصبية