اولاد الحكم

البارت ١

#اولاد_الحكم
بارت ١

بغداد .....٧-٢٠٠٨ 

باوعت الساعة جانت ٤:٤٢ م ،باقي تقريباً ربع ساعة ويجي دكتور عماد ،كمت اشتغل اسرع حتى الحك اكمل قبل لا يوصل

مسحت الجام خانة الاخيرة مال ادوية ورحت اركض جبت سطل المي والماسحة وغسلت ارضية الصيدلية عالسريع ،احس روحي صرت طيارة وكلساع اباوع عالساعة الي بيدي وحتى گلبي يدك سريع

نشفت الارض بالوصلة ورجعت كلشي بمكانه ورجعت اسفط  الادوية الي شفتها مخربطة بالرفوف ،

دخل دكتور عماد

عماد: هلو غفران

غفران : هلا بيك دكتور
باوعت عالساعة ٥ ضبط ،مستحييل ما شفت بحياتي شخص ملتزم بمواعيده مثله

دخل وهو عيونه تفتر بكل مكان بالصيدلية
وخله ايده و اصابعه عالجام خانات والميز ويراقب اخاف اكو ذرة تراب او اني ما منظفة زين ،

شاف كلشي نظيف ومرتب ،هز راسه برضى مثل كل يوم ..

عماد: كملتي كلشي مو ؟

غفران : اي دكتور طبعاً
مد ايده لجيبه طلع محفظته وطلع منها ٥ وانطاها الي

عماد: هاي يوميتج
غفران : اخذتها منه ،واخذت جنطتي ومفتاح الصيدلية النسخة مالتي وطلعت ..

رحت بسرعة للسوك وكفت يم ابو المخضر والفاكهة ،اخذت كيلو موز بألف ،وبعدين رحت للفرن مال صمون عنده جرك بالجبن واكو بالحلقوم او تمر اخذت مشكل بالف ونص ،طلعت وحدة اكلتها بالطريق واني متجهة للاسواق

وصلت الاسواق ،دخلت وسلمت على صاحبها رجال جبير وطيب صار سنين اعرفه ،شلونك عمو

ابو محمد : هلا ابوية ،هسه جنت بطاريج كلت وينها اليوم ما مرت بعدهي

غفران : والله اتأخرت يم الفرن جان يشوي الجرك واخذتهن منه حارات
فتحت العلاكة وقدمتله ،تفضل عمو
مد ايده اخذ وحدة

ابو محمد : الف رحمة على روحه لابوج ،شكد انسان خيير جان ،وطيب گلب واخلاق والله يحبه وخله هالخلفة الطيبة من بعده

غفران : تسلم عمو الله يخليك ويطول بعمرك ،طبيت للمحل اخذت بطل عصير من الثلاجة وخليته يم ابو محمد
عمو خلي الي بعلاكة سودة ،ماشي يابه والله كمت ماجيب بس علاليك لون اسود علمودج ،

غفران : ههههه شسوي يا عمو تعرف البير وغطاه

ابو محمد : اعرف بنيتي اعرف ، انطيني هذا الباكيت مال علج وراج

غفران : انداريت ادور عليه ،وينه؟

ابو محمد : لا هياته طلع يمي ومادري

غفران : باع النسيان وما يقبل اكله صرت شايب

ابو محمد : هذا هو عمي شايب شايب ،البركة بيكم شباب هالوكت
غفران : انتو الاصل والخير كله عمو