اولاد الحكم

البارت ٤٣

#اولاد_الحكم
للكاتبة روشان (مروج الشمري)

البارت ٤٣

بعد مرور خمس ايام

وارث: بشير جبت الملابس وياك

سنية: جبناهن يمة بس بالجنطة يم غفران هسه من تطلع تجيبهن وياها

ليش ما تروح للبيت تسبح هناك وترتاح واحنا هنا يمها اي شي يصير نخابرك وعود بالليل تعال

هز راسه بالرفض رد بدون ميباوع بوجه امه
وارث: لا ميحتاج ، هنا اسبح وابدل ماكدر اعوف المستشفى

سنية: وشجاي تسوي انت هنا ؟ كعدتها انطيتها علاجها حسنت حالها ؟ وجودك ميسوي شي يا يمة ،بس جاي تهلك نفسك واتعبها هم ،مو هيج حبيبي كوم شوف نفسك بالمراية ،شوف حالتك تبجي الكافر ،
اذا كعدت سلا وشافتك بهالحال شيصير بيها ؟

رفع راسه باوع لامه بقهر ،نظراته و رموشة ترجف رغم محاولته اظهار القوة والصلابة
حجى بصوت مهزوز وكلمات متعوبة

وارث: واذا ما كعدت ؟ واذا ما فتحت عيونها الحلوة وشافتني بيهن ؟ اذا ماتت ما اكول موتها المرض ،

اكول حبيبتي العبرت قارات علمود احصلها انكتلت ... انكتلت واني كتالها

سنية: لا حول ولا قوة الا بالله ، كول يا الله يمة لتفاول عالبنية تكعد بأذن الواحد الاحد تكعد
هاي الفطيرة ام گلب الابيض صح رهيفة وفاهية هي بس والله من داخلها قوية ، هسه تكعد متعوفك انت وابنها بسهولة

حلمها جنتو ،حصلتكم بتعب متفرط بيكم بيوم وليلة

اقترب وارث من امه الكاعدة عالكرسي ، كنبص (ثنى) رجله وكعد كبالها ،دنك راسه بحضنها وبجى بحركة

وارث: محروك گلبي يمممة ،والله محروك ، جاي اموت وروحي تطلع مني بكل لحظة تمر وما تفتح بيها عيونها،

حاوطته امه بعبايتها ودنكت على راسه تمسح عليه وتبجي
سنية : سودة عليه ييمة شبيدي عليك يا عيون امك شبيدي ، كافي تسوي بروحك هيج حيصير بك شي وين انطي وجهي

وارث : يا روح التحجين عليها ؟!
ولج يمة الروح لابت عليها وحق لا اله الا الله

فلة: جنت داخله ويا الممرضة بدلنا لسلا ملابسها ويا كل قطعة البسها الها دموعي تنزل اقوى ،ملايكتلها النومة ابد، روحي راحت واني اباوعلها وجها شاحب وشفتها بيضة بعد مجانت الروح كلها تدب بهالوجه الحلو

هالانسانة الي من شفتها لحد الان كلها نشاط وحيوية وضحكة وعيون تبرق ،شلون تكون هاي تاليتها ؟! معقولة يربي تحرمها فرحتها الي حصلتها بشلاع الگلب ، معقولة تحرمها ابنها ورجلها الي صارولها كلشي بهالدنيا؟!

ربي انت رحيم ارحمها برحمتك ،رجعها النا وبرد گلبنا عليها .. لخاطر الطفل الجاي يصرخ عليها بالبيت ويدور ريحتها بينا، لخاطر الرجال المكسور وانحنى ظهره عليها وهو بعز شبابه