اولاد الحكم

البارت ٨

#اولاد_الحكم
للكاتبة روشان(مروج الشمري)

قراءة ممتعة ورداتي ،البارت نار واتمنى يكون تفاعلكم هم نار 😍

البارت ٨

بتار: ما كافي راحت مني وحدة انوب اخسر الثانية ،،تريد تاااخذ مني الثانييية ،كالها بصرخة ودفر الطباخ بكل قوته .....

غفران : اخترعت من شفته هيج عصبي واني اصلاً خرعة الطباخ والي صار الصبح بعدها بيه ،سديت البردة ورجعت للغرفة اركض ،شوية ورجعت طلعت صار هو بوجهي جان داخل من باب الهول وملامحه كلش واضحة عليها العصبية
سويت نفسي مادري شكو وسألته ..

شنو هذا الصوت ووين الطباخ مالكيته بالمطبخ ؟

بتار : شتردين منه ؟ اخاف تردين تطبخين بي بعد !!!

غفران : ما جاوبته لان جاي يحجي بأنفعال وعصبية
عفته ومشيت راجعة للغرفة

وصلت الغرفة اجه وراية لزمني من ايدي وكفني

بتار: لتاخذين على خاطرج من طريقة كلامي
بس اني فقدت كل اعصابي من اللحظة الي اتصلتي بيها عليه لحد الان

تدرين انتي الله طلعج من حلك الموت لو مجلبة النار بيج والمصيبة الاكبر انتي وحدج بالبيت جان

غفران : جان شنوو ...متت !!
بس هياتني الحمد لله مابيه شي واكفة على طولي والي صار قدر والله لطفني منه

فلا تبقى هيج متشنج واعصابك نار بسبب الموضوع ترى جاي توترني هيج

عاف ايدي وكام ياكل بشفته هالحركة انتبهت عليه يسويها من يتوتر ، مشيت وكعدت عالجرباية

بتار : محتاجة شي ؟ اني طالع اجيب اكل

غفران : لا سلامتك، طلع هو واني بقيت وحدي ظليت افكر بتصرفاته وعصبيته وكلامه الي سمعته بالحديقة

ليش كال الثانية !! معقولة امه هم محتركة وميته ؟! لا لا اخاف جان متزوج قبلي  ومرته هي الي خسرها !!!! عزة بعيني اذا صدك

وهيج اني مطفية ومادري بشي ؟ شو بديت افور فجأة والاعصاب فولت ،حتى لو ميته المرة هم مجرد فكرة متزوج قبلي خبلتني وخلتني الوب حتى الم الحرك مالتي نسيته

وفكرة تاخذني وفكرة تجيبني شوية وصفنت اتذكرت بيوم العقد بالمحكمة من اخذو منا المعلومات ، هو جان اعزب حسب جنسيته والمعلومات الي قدمهن  يعني لا ارمل ولا مطلق ،هنا يلا ارتاحت اعصابي وهديت

صفنت لنفسي ،شدعوة هلكد متت ورجفت غيرة عليه ! مو اكول عايشة وياه مودة ورحمة وبس ؟! شو گلبي يكول غير شي ..

خايفة كلش خايفة من الاعتراف بهالشي ،اخاف اعترف لنفسي اني احبه ،ماريد افشل ماريد انكسر منه كدام نفسي من اشوفه ماعنده مشاعر تجاهي ..لهالسبب دا احاول قدر الامكان اضم مشاعري حتى على نفسي