اولاد الحكم

البارت ١٦

#اولاد_الحكم
للكاتبة روشان (مروج الشمري)

البارت ١٦

سلا: وصلني وارث للباب ،دكيتها ورى شويه طلعلي شاب عمره بالعشرينات ،بقى صافن بوجهي شوية بعدين كال

-انتي سلا بت عمي مو ؟!

سلا: هزيت راسي بأبتسامة ..اي

استقبلني استقبال حلو ،دخلني للبيت عفت جنطتي بالكراج ودخلت وياه
البيت جبير وبنائه حديث ،كراج واسع وحديقة جبيرة وصلني للباب الداخلية ،فات جوة واني وراه شفت مجموعة جهال يلعبون والبيت هوسة ،ما استغربت لان وارث كال اليوم متجمعين كلهم

اني عندي ٤ عمام و٣ عمات ،وسلت يمهم بالهول او الصالة اول مشافوني كامو كلهم يستقبلون
الي اتذكرته اتذكرته والي ناسيته هم عرفوني عليه ،خاصة اولادهم وبناتهم

اكو شباب بكدي واكبر هذولي عرفتهم بسرعة لان كل طفولتي جانت وياهم بس الاصغر مني لا ما اعرفهم

عمامي موجودين منهم ٣ والرابع مسافر،وعماتي موجودات ،كلهم متفاجئين بوجودي رغم معرفتهم بجيتي

كل واحد من جهة يسأل ويستفسر ووينكم وشنو صار وشوكت ابوج مات ،ووين امج

حجيتلهم عن وفاة ابوية وان امي بعد كم سنة اتزوجت لهالسبب مكدرنا نرجع

ما كدرت احجي الحقيقة ،اعرفهم ناس صعبين والاصعب منهم هم اهل امي ،اذا يعرفون امي هيج مسويتها بلا ملح بالزواج يگلبون الدنيا

صار العشاء والتمينا كلنا جان عدهم هول جبير بي ميز طعام كلش جبير واكو بالمطبخ هم ميز طعام احنا الكبار كعدنا نتعشى بالهول والصغار بالمطبخ ،

تعاملهم ويايه جان زين بس حسيتهم متخوفين مني ماعرف من شنو، بعد العشاء صاحوني عمامي يردون يحجون ويايه،رحت وياهم لغرفة التمينا بيها
عمامي و ياهم وحدة من عماتي ،اتوترت  ماعرف شنو يردون مني ،كعدنا عمي علاء الجبير فتح الموضوع وكال

علاء: باعي عمو ماردت احجي كدام الكل كبار وصغار جانو كاعدين بس هسه بيناتنا احسن ،تصرف امج غلط بغلط ،الزواج مو حرام  خل تتزوج بس على اي اساس تكطع كل هالفترة

تدرون شصار بينا وشكد ضلينا ننتظر منكم ولو خبر صغير ،،،جدج اتوفى بعد طلعتكم بسنة بس جديتج ضلت سنين تلوب روحها على خبر من ابوج وماتدري بي ميت عايش لحد ما ماتت بقهرها،،

سلا: مو بيدي عمو ،اني حتى رقم الكم ما عندي ،والا جان اتواصلت وياكم من زمان بس امي منعتني من التواصل ومن كلشي

علاء: امج تريد تبقى على حل شعرها ،شلون ترجع هنا وارملة غير بيت جدج يحبسوها حبسة الجلاب بين اربع حياطين هي من الاساس اخذت ابوج رغم فارق العمر البينهم بس حتى تطلع من خنكة اهلها وتسلطهم