اولاد الحكم

البارت ٢

#اولاد_الحكم
البارت ٢

غفران : حسيت نفسي سمعت كلام المرة غلط بس سؤال عمة فوزية اكدلي مو بس اني الي ما استوعبت

فوزية : شنو عيني ؟ ما فهمتج اعذريني شويه سمعي مو قوي

ام حسين : معذورة عيوني ،والله اليوم جاييكم بكل خير ان شاء الله ونريد نخطب بنيتكم لأبنا ،والولد سأل الناس الخيرة والكل حمدت بأخلاقها واصلها وفصلها وان شاء الله يصيرله نصيب وياكم بفضل الله

غفران : يمكن هذا اغرب كلام سمعته بكل حياتي ،،ممكن اي بنية طبيعي يجوها خطابة وهواية هم

بس اني جنت من المستحيل افكر احد يخطبني ،شكد اختلطت بناس وشباب بشغلي وطلعاتي ولا مرة احد عبرني مو انوب يخطبوني !!! والي زيد تفكيري هذا هو الفضيحة والوضع الي اني بي هسه ،

يا مخبل يتقدم لوحدة صارلها ايام مفضوحة بالمنطقة كلها وبمكان شغلها هم !!

شكد راد يزل لساني واسأل المرة انتو منو ومنين تعرفوني اصلاً
بس طول عمري باقية على القيم والمبادئ الي رباني عليها ابوية وطبعاً مو ويا اي واحد الجان بس ويا الي يستاهلون الاحترام

فبقيت ساكته احتراماً لوجود عمة فوزية وكلت هي جبيرتي بهالكعدة وهي تسأل وتتصرف من يمها ،

بس كمية الفرحة الي بينت بملامح عمة فوزية جانت كلش جبيرة ،خطية حتى هي جانت مأيسة مني وما متوقعة هيج كلام

فوزية : والله يا عيني انتي ،شوية فاجأتونا بالموضوع ومادري شكلج

ام حسين : ما اريد منج تكولين شي ،اني راح اخلي رقمي يمج وانتو فكرو بالموضوع اذا ترضون تزوجون البنية دكي عليه
حتى اجيب الولد واجيكم بكعدة ثانية هم يتشاوفون وهم يكعد ويا رجال البيت ويحجي ،وان شاء الله ربج يكتبلهم الخير بيها

خوش حجي ؟

فوزية : هذا هو مثل متكولين حبيبة ،

غفران : اني كاعدة بنصهم اطرش بالزفة بس اباوع وكلساع اضم نفسي ورى عمة فوزية لان هي كاعده بالوجه واني بصفها عالقنفة

بس التوتر عندي يقرأ الف، والسؤال الي براسي يتردد منو هم وشلون عرفوني ! اتمنيت عمة فوزية تسألهم بس يمكن استحت

طلعوا وصلناهم الباب ،ورجعنا دخلنا
باوعت عليه فوزية من فوك ليجوة
وضربت خدها وكالت

فوزية : عزة العزاني طلعتج للعالم بهالخلقة والخربطة هاي !!!

غفران : والله حتى اني نسيت شلابسة من التوتر
صفنت لنفسي لابسة بجامة عريضة عليه كلش ستن سمائي وياها تيشيرت اسود عادي وشعري لافته كعكة بس الكعكة نفسها مفجورة رغم شعري طبيعته سرح بس هم جان مخربط

هزيت ايدي معاجبني الوضع وكلت الها

ديلا عالاساس اذا كشخت حطلع احلى !
هي نفس الجهرة الله وكيلج لو لبست فستان ذهب تبقى مجولحة