اولاد الحكم

البارت ٣٨

#اولاد_الحكم
للكاتبة روشان (مروج الشمري)

صباح الخير ورداتي قراءة ممتعة ولا تنسون النجمة ،تفاعلكم كلش يسعدني

وعندي ملاحظة كلش مهمة حابة احجيها الكم قبل البارت ، بالنسبة لشخصيات الرواية وافعالهم هم شخصياً متصالحين ويا نفسهم ومتقبلين منكم كل كلمة ان كانت حلوة او مرة لان الصح يعرف نفسه صح والغلطان يعرف نفسه غلطان ومتقبل النقد منكم

فأتمنى منكم يا ورداتي نبتعد عن الغلط والتجاوز والعركات بيناتكم انتو المتابعين بداخل التعليقات ،اذا الي معزة بقلبكم اطلب منكم احترام حرية الرأي للطرف الاخر واعبروا اي تعليق ما يعجبكم بدون كلام جارح وتجاوز
لان كلكم حبايبي ويعز عليه اخسر احد منكم وانحرم من تعليقاته الحلوة بسبب هالمشاكل

واخيراً احبكم 🖤

البارت ٣٨

رد بحدية وكأن الي جاي احجي وياه شخص ثاني
انسان مريض متعدد الشخصيات

بشير : هو هذا وِجار الثعلب ... عبالج تطلعين منه بسهولة
هاي البداية مريم ودربنا طويل صدكيني ...

مريم : رديت بحرگة ودموعي تصب
ليش هيج بشير ؟!! ليش شنو سويتلك اني حتى تاذيني لهالدرجة

لازم اكو فد جرم جبير او ذنب عظيم سويته وياك حتى تدمرني وتحرمني من اهم واغلى شي بحياتي

بشير : صدك اذنبتي وذنبج جبيييير ،الا اندمج عاللحظة الي فكرتي تتجاوزين بيها عليه

بشير ما تتصالف وياه مرة

مريم: اتنفست بعمق وكفت دموعي وحجيت بحدية واني امسح بوجهي بدي وايدي الثانيه لازمة المربايل وترجف بعصبية

وانت صارلك شهور واكف على كلام كلته الك بلحظة صدمة !! ومن الاساس انت الغلطان بتدخلك بشي ما يعنيك

اني وانت مايربطنا غير الدم ، لا بينا كلمة ولا كعدة ولا سالفة شتريد مني اتقبل منك الهمجية الي سويتها بكل رحابة صدر ؟! تريدني ابجي بلحظتها واتوسل بيك؟!!

مو اني الي اتوسل بأحد ترى ،ولا عبالك الي سويته اليوم وحرماني من دوامي وحلمي راح يخليني انكسر الك واتوسل بيك بيوم الايام حتى تروح تحاجي ابوية وتقنعه او غيرها وغيرها

بأحلامك بشير بأحلامك تكسر خشمي .... اني من زمان اكرهك وبسوايتك هاي نزلت لأسفل نقطة من رجولتك بعيني

لان مو رجال اليوكف على حجاية مرة

كملت كلامي وهو طول ما اني احجي يسوي اممم مستهزأ بكلامي لحد ما كملت

بشير : راح تشوفين الرجال الي دتحجين عنه شنو حيسوي

مريم : روووح شتسوي سوي ميهمني شي بعد
اني خسرت اهم شي بحياتي وماعندي شي اخاف عليه بعد .... كملت كلامي وسديت الخط بوجهة ، ايدي ترجف والغصة مجاي تطلع من گلبي مكسور خاطري لدرجة بديت احس بعصرات تعصر گلبي بقوة اختنكت من البجي وروحي طلعت ،فتحت شباك غرفتي الهوى بارد كام يضرب بوجهي