اولاد الحكم

البارت ٥٣

#اولاد_الحكم
للكاتبة روشان (مروج الشمري)

البارت ٥٣

كندا ...

وارث: اخذت سلا لأخر الدنيا حتى اعالج كليتها ونسيت اني بهالقرار اخذت وبعدت عنها گلبها،
ابنا ومدى تعلقها بي الي جان فوق الطبيعي ...
حرت ما بين اعالج مرضها لو اعالج روحها الي ما هدت ودموعها الي ما بطلت تنزل بأي يوم ،

ابني روحي واعز ما املك بس اني اب ورب العالمين منطي للاب قوة تحمل اقوى من الام بأضعاف مضاعفة ، كدرت اصبر واتحمل فراق ابني في سبيل تتعالج هي بس هي الوحيدة الي كاسرة ظهري وگلبي بهالدنيا ،

حرت مابين احترك على مراهقتها الي خلصتها بخوف وانكسار ووحدة ورعب ، لو على شبابها الي جاي يخلص بالمستشفيات والعمليات والمرض بعيدة عن روحها وابنها والعائلة الي جانت تحلم بيها العمر كله ....

اول ما وصلنا لكندا وبعد يوم استراحة ،بدينا برحلة العلاج ، والاطباء هناك كالو راح نبقى نحاول ويا كليتها احتمال بسيط نكدر نعالجها ، بس بكل الحالات انتو اتحضروا لزراعة الكلى بأي وقت

وعرفت هناك اذا اريد احصل كلى بأسرع وقت لازم اشتريها على حسابي لان اذا تبقى عالصحة فلازم ننتظر شهور واحتمال اكثر من سنة ،
ومبلغ الكلى عدهم كلش غالية ، الفلوس الي عندي ما تكفي ابد من عدى مصاريفنا هنا واني راح اكعد بدون شغل لمدة شهور والله اعلم شوكت نرجع ،فلي عندي مستحيل يكفن للكلية والعلاج والمصاريف وكلشي .... لهالسبب احسن قرار اخذناه هو بيع البيت مال سلا
وبدر باعه بأقرب وقت ودزلنا الفلوس والحمد لله لحك قبل لا تتأزم الاوضاع والا مجان انباع ابد ...

سلا : جاي اعيش فترة من اصعب الفترات الي مرت او راح تمر بكل حياتي
صراع قوي بين المرض وطاقة جسدي لتحمله وبين احتياجي لأبني وصبري على بعده
لان اني الي محتاجته مو هو الي يحتاجني
ادري بغفران مستحيل تقصر وياه ولو مقدار ذرة ، ومستحيل تخليه يحتاجني للحظة

بس الي مصبرني ومخليني اكمل مشواري بدون تراجع هو ايماني بربي وعوضه اولاً و وجود وارث بجانبي ،وحبه وخوفه عليه ثانياً

انام واكعد بالمستشفى وهو بصفي متمسك بيدي ، جسمه عالكرسي وراسه يمي عالسرير
وايده محاوطه ايدي بكل حب ،، كأنما يعرف لمسه ايده هاي هي سر تقبل جسمي للعلاج
هي طاقتي وطوق نجاني بعز هالمرحلة العصيبة ... ولهالسبب ما ترك ايدي ولا لحظة

والي زاد صبري اكثر هي ضحكة علاوي ووجهة الي ما يعدي يوم الا اشوفه واسولف وياه بمكالمة فيديو ،، حبيبي وقرة عيني الي جاي يكبر كل يوم بعيد عن حضني ...

مرت بينا الشهور والعلاج هنا اخر الفشل الي بكليتي كم شهر بس بالتالي رجعنا لنفس النقطة والي هي الزراعة ... وكلت امري لله وبدينا بالاجرائات اللازمة لحد ما لكينا متبرع وتم الاتفاق على كلشي وموعد العملية باجر