اولاد الحكم

البارت ١٤

#اولاد_الحكم
للكاتبة روشان (مروج الشمري)

البارت ١٤

فلة: رجعو وارث و وراه خالة للصالة وهم مبتسمين بس خالة اعرف وجها مبين الابتسامة من ورى خشمها ،كعد وارث عالقنفة بصف بدر وبدر مد ايده على ذراع وارث لزم عضلاته الي جانت واضحة وحتى القميص ضيك على ذراعه

بدر : ما شاء الله صايرين عضلات وترتيبات والكرش رايح ،شعجب مو طبعك تصير رياضي

وارث: والله رحت للنادي اسبوع واحد علمود شغلة شو وراها اخذني الواهس وضليت ملتزم وحيصير فوك السنة اني اتمرن ،

سلا: من يحجي يباوع عليه مبتسم ويرجع يكمل كلام ويا اخوه ،لان ادري بي اجه النادي علمودي هو حجالي كلشي بوقت اعترافه بسالفة نظرته

وارث: يمه صدك جذب وين الاكل وين ذيج الصواني الحلوة مالتج ،مو انمردنا من الجوع،حتعوفينا هيج ؟!!

سنية: يااااه ،سودة علية يمه دنعل ابو الجوع هسه نص ساعة والاكل كبالك
عبالي ماكلين والله

وارث:لا وين ناكل الطريق جان طويل ومخليت السايق يوكف على مطاعم الطريق ما استنظف اكلهم ،كضيناها بسكت وعصير

بتار: بيا مطار نزلتو ؟

وارث:مطار اربيل البارحة ب٩ بالليل وصلنا تعبانين كلش ،بتنا بالفندق وطلعنا الصبح على راحتنا تقريبا ب١١ هيج شي

فلة: كامت خالة تركض واني وياها رحنا المطبخ حتى نجهز الهم اكل ،حرنا شنو نسوي شي سريع ،طلعت كبة وبورك مفرزين بالمجمدة ،ومسوين بامية عالغدة حتى اللحم موجود بيها

سنية: اهم شي البامية وارث يتخربط عليها ،اذا احطها بالصينية بعد كل الاكل مو بعينه

فلة: خطية حقه غير محروم من هالاكل صار كم سنة ،حجت بحسرة

سنية : اووف اوووف يا ولدي ،الدنيا اخذتهم من حضني وسنين محرومة شوفتهم ،محرومة كعدتهم ولمتهم سوى عالسفرة

تدرين اخر مرة كعدو بيها سوى ويايه عالسفرة اربعتهم ،جانت قبل لا يطلع بتار من البيت

ومن سافر وارث بعد ما شفت حتى ثنين منهم كعدو سوى

اني الحسرة الي بگلبي بديج السنين كلش جبيرة يخالة ،ما فات علية يوم وما طبخت اكلة يحبوها ولدي الا والدمعة تجري على خدي

بس ربي جبير ورحيم باوع حالي وكسرة گلبي ورجعهم لحضني وكدام عيني بعد كل هالعذاب والسنين المر الفاتت

فلة: الحمد لله والشكر ،اكيد رب العالمين مراح يضيع تعبج بيهم ،لو وين ما يرحون مرجعهم ،مكانهم وامانهم الوحيد هو انتي والبيت هذا الي يلمهم

واحنا نحجي دخل بتار للمطبخ شاف خالة تمسح دمعتها بطرف شالها وهي يم الطباخ
باوعلي بخوف وهز راسه يتسائل