اولاد الحكم

البارت ٥٧

#اولاد_الحكم
للكاتبة روشان (مروج الشمري)

صباح الورد لاحلى الوردات
وهذا بارت طويل لعيونكم تعويض اليومين الفاتت
لا تنسون النجمة والتعليق عالفقرات لان تفاعلكم جداً يسعدني🖤

البارت ٥٧

سلا : بعد ما تم فسخ خطوبة ياقوت بقينا ملتمين بالصالة نسولف بالموضوع وكلنا فرحانين بالفسخ عكس هواي ناس لو بدالنا يمكن ينقهرون لان يدورون دائماً عالشكليات اكثر من المضمون اما احنا فالحمد لله دورنا راحة بتنا اكثر من اي شي ثاني ...

ياقوت جانت ما موجودة ويانه عافتنا قبل نص ساعة وبعد ما رجعت ،اشرلي وارث يسأل عنها من بين الهوسة كلها

كمت طلعت من الصالة ادور عليها وشفتها بالغرفة مالتهن الي نفسها غرفة غفران القديمة ، جانت كاعدة بالكاع يم الخانة السفلية مال كنتورها مطلعة غراضها وجاي تسفط وترتب بيهن ببطئ ومبين عليها عقلها بغير مكان بس جاي تدور على شي تلهي نفسها بي

دخلت كعدت يمها بالكاع واني مبتسمة محاولة مني حتى الطف الجو ... شجاي تسوين

ياقوت : هيج ضايجة ماعندي شي كلت التهي اعزل كنتوري

سلا : شمريبي ذيج الكومة مال ملابس خل اسفطلج وانتي رتبي بالكنتور

ياقوت : لتعبين نفسج هسه اني اسويهن

سلا : ماعندي شي خل التهي وياج شوية ... انطتني الملابس وبديت اسفطهن الها وهي ترتب بالكنتور ...فجأة حجيت

عادي اسألج شي يخص الصار اليوم ؟
لو متحبين تحجين بالموضوع

ياقوت : عادي ياگلبي اسألي ليش ماحب احجي بالعكس

سلا : هم انقهرتي لان فسختو ، يعني اني بنية مثلج واعرف مشاعرنا شكد لينة وهشة وتتأثر بسرعة احتمال حبيتي وائل بهالفترة الي جمعتكم بحديث ورسائل ، لهالسبب راح تنقهرين

ياقوت : مراح اجذب عليج صحيح اني انقهرت ، بس مو علموده لان حتى ما لحكت احبه ،جنت هستوني بديت اتعرف عليه واحنا حتى حجينا بالتلفون جان قليل بسبب دوامه وانشغاله ليل نهار

الي قهرني كلامهم وخستهم ،والي يقهر اكثر ان مثل ماكلتي اني بنية وعندي حياتي الخاصة ومشاعري اللينة والهشة واتأثرت بهالخطبة وجان براسي تخطيط مختلف عن الواقع الي هسه صحيت عليه
بس ما اكول غير الحمد لله اكيد ربنا كتبلي الي بي صالح الي واني كلش راضية بكتبة ربي

سلا : ونعم بالله ...

ياقوت : صدك سلا ، شعجب من رجعتي للعراق ولحد الان ما دورتي على شغل لو وظيفة ، مو مثل غفران يعني جاي اشوفها كلش تتمنى تتعين ، احسج ممهتمة لهيج امور او يمكن انتي متحبين الدوام والشغل مو صح ؟

سلا : لا بالعكس تدرين اني جنت بكندا اشتغل شغلتين سوى وجنت ناوية اول ما ارجع هم فترة وادور على شغل مناسب و وارث هم ما جان معارض ابد ، بس من رجعت صادف زواجنا وبعدها مباشرة حملي وولادتي والي بعدها بكم شهر بدت تنتكس حالتي الصحية وانتي بعد تعرفين الي مريت بي
وبسببه وارث هم بعد رفض فكرة اي شغل او حتى وظيفة ،يعني هسه الشغل صار ممنوع منعاً باتاً