اولاد الحكم

البارت ٥١

#اولاد_الحكم
للكاتبة روشان ( مروج الشمري )

صباح الخير ورداتي
صح اتأخرت عليكم  بالتنزيل بس اطول بارت لعيونكم هذا 🖤

البارت ٥١

بشير : باعي ولج
تردين تبقين هنا ، تردين ترحين بكيفج ،بس اني مالي كعدة بعد بالمكان الي انتي
بي ....تعبتييييني ،كسرتيني هواي وطلعتي من عيني ،لهنا وانتهى كلشي وياج ...انتي طالك ....

مريم :حجايته مثل الطلقة فاتت لگلبي ، حسيت كل جسمي انفض ويا ما كال كلمة طالك ، نزلت ايدي من وجهي بعد ما ثكلت حالها حال كل جسمي ، باوعتله ادور بعيونه الصدق

سمعتها وما جاي اصدك بي كالها ،،، قبل دقايق جان يتغنى الكلام غنوة وهو يوصف حبه الي

برطمت شفايفي برجفة ،رفعت ايدي بسرعة كتمت بيها حلكي قبل لحظة من الانهيار
دموعي فاضت من جديد بس هالمرة مو خوف منه هالمرة كسرة گلب كسرها الي بلحظة وحدة بتسرعه وعصبيته

حتى الكلام انتهى ، ما منه فايده ، شكلت وشنو ردت اكول كله انتهى غصيت بحسرتي حتى الدمعة كطعتها كدامه ،هيج حسيت روحي لا شيء عنده بلحظة غضب وحده اتخلى عني وحتى ما انطاني فرصة احجيله

باوعلي ثواني وعيونه لمعت تريد تدمع ، قابض كف ايده بقوة حتى يسيطر على رجفته وعافني وطلع بس سمعت صوت الباب الخارجي انركع بقوة

اتربعت بمكاني وكعدت غطيت وجهي بيدي ، مغمضة عيوني بقوة احس راسي يريد ينفتح بالنص من الالم ...

الساعة مشت ساعات بس بقت واكفة بيه ، كاعدة بنفس المكان وبملابسي مال دوام ما لي خلك حتى ابدلهن
مكسورة كسرة ما اتخيلت بيوم انكسرها
محروك گلبي حرگة ما اتخيلت بيوم احس بيها

هو هذا الحب ؟
كضيت عمري الي اخسره انطي ضهري وما انطيه اهتمامي
الي يأذيني امحيه من حياتي مو احزن عليه

ليش حبيتك بشير ليش حبيتك واحتركت وياك الله ياخذني واخلص مننننك ،شكد اذيتني حتى بحبك اذيتني
ممقهورة عالطلاك كموقف، مقهورة منه هو ومتأكدة مليون بالمية لو ما حابته مجان اتأذيت منه هيج

كمت اسحل بنفسي ، متكسرة تكسير من كعدة الكاع ، باوعت الساعة بتلفوني جانت ٦:٠٠ المغرب ، بدلت ملابسي عالسريع ورحت لفراشي ، عيوني من كد البجي والقهر انتفخن لدرجة مابيه حيل افتحهن بعد ... وبس خليت راسي عالمخدة غفيت من التعب

مرت ساعات وكعدت على رنة التلفون ،كمت بسرعة عليه بس ملحكت افتحه
شغلت ضوة الغرفة واخذت تلفوني من الميز
لكيت بشير داز رسالة ومن ما فتحتها داك عليه

دخلت للواتس اب فتحت المحادثة

بشير : اني يم الباب راح اطب للبيت ابدل واطلع ، بهالأثناء متطلعين من غرفتج ابد ، وجهج ماريد اشوفه