اولاد الحكم

البارت ٣

#اولاد_الحكم
البارت ٣

غفران : دخلت الصالة وشفته كاعد ،
من الصدمة بشكله ،رجلي جمدت بمكانها
بقيت بحيرة انصدم من رجعته وكعدته كدامي لو وضعه وشنو صاير بي !!!

لفظت اسمه برجفة ...ب بتتار..!!!! دنك راسه بسرعة يحاول يضم وجهه ،انتبهت لعبد الله كاعد بصفه
عمة فوزية واكفة بصفي كالت

فوزية : مخابر على عبد الله يريد يجينا وعبد الله جابه واجه

غفران :كعدنا اني وعمة فوزية ،كتله الحمد لله عالسلامة
بتار: الله يسلمج

غفران : يحجي وهو مدنك ،شكد جنت ضايجة منه ومتحلفة اذا بيوم من الايام شفته او اجه لببتنا الا اطرده
بس من شفته بهالحالة كلشي اتغير اصلاً انقهرت عليه وگلبي انمرد

عينه اليسرى مغطاية بلاصق طبي واثر جروح عميقه وخياط على خده وكصته فوك عينه

حجيت بتلعثم ،شنو صاير ؟!!
وجهت كلامي لعبد الله استحيت اوجهه اله

ديحجي عبد وهو قاطعة وحجى وهو مدنك ويهز برجله مبين متوتر

بتار: سويت حادث بالشغل ،وعلى اثره فقدت عيني اليسرى

غفران : من كال اخر كلمة رفع راسه وباوعلي مركز بعيوني
واني من الصدمة فتحت عيوني بقوة ،وكلت بصوت ناصي لاحول ولا قوة الا بالله ،متت قهر عليه خطية بعده شاب والعين ماكو اغلى منها

بتار: بسبب الي صار التهيت بحالتي الصحية وماكدرت اتواصل وياكم وبصراحة اني هم منعت ام حسين منكم ،ما ردتها توصل الكم الي صار خاصة اول فترة لان جانت حالتي النفسية والجسدية كلش تعبانة

و وراها بقيت رافض اصلاً تشوفوني بهالحالة ،ففكرت ابقى بعيد لحد ما الكي حل بس الي صار صار وللاسف هذا وضعي هسه مثل متشوفون وماكو شي يتصلح بعد

فيا بنت الناس اني بعدني طالب ايدج بس هذا وضعي وهذا شكلي الي راح تكابلي العمر كله ،اذا انتي قبلتي احطج على راسي واذا رفضتي فهذا حقج واني احب الناس الحقانية ووياج بكلشي ترديه ولا عبالج راح انقهر،

وهاي للمرة الثاني اطلبها منج واكلج  فكري على راحتج ورديلي الجواب

عبد الله : حجى وهو يطبطب على كتف بتار ،الحمد لله من طلعت سالم ،لا تفكر ولا تقهر روحك كلشي يتعوض

رد بقهر
بتار: العين ما تتعوض بس الحمد لله على كل حال قدر الله وما شاء فعل

غفران : ماكدرت احجي اي شي ،اكتفيت بالسكوت ،بقى يحجي هو وعبد بس كلامه كلش ثكيل بالكوة تطلع الكلمة منه مادري السبب صحي لو بسبب الصدمة ونفسيته التعبانة هم الله يساعده

بعدها طلع هو وعبد الله ورجع عبد الله كعد ويانا
اني كاعدة بمكاني ولا تحركت صفنة تاخذني وصفنة ترجعني