اولاد الحكم

البارت ٥٦

#اولاد_الحكم
للكاتبة روشان ( مروج الشمري )

البارت ٥٦

وارث: يمعودين عوفو السوالف القديمة خل نفهم منو راح يعرس .. احجي بدر

بدر : اي عفية نرجع لموضوعنا
اكو عريس متقدم لياقوت وهالحجي حيصيرله فوك السنة وعرضه قائم لحد  هاللحظة ومنتظر مني اردله خبر بأي وقت
الولد شاريها وشارينا كلنا هم ومجلب بهالقسمة رغم كل الظروف والصد الي حصله مني ...

وارث: ومنين هذا ؟ اعرفه ؟!

بدر : اي تعرفه ... الدكتور وائل دكتور القلبية مال امي

هز وارث راسه ورد بشير بسرعة
بشير : منين هذا شو ما اعرفه !

وارث:منين تعرفه هو انت صارلك جم يوم من رجعت

بدر : هذا الدكتور الي سوة القسطرة لأمي من ضربتها الجلطة، ومن وكتها احنا نراجعها عنده لان اختصاص ويفهم بالقلبية

وارث: زين هو وين شايفها لياقوت ؟!

بدر :بالمستشفى من اتخربطت امي ، جانن ياقوت وغفران وياها وبعدها هم وحدة من المراجعات من اخذت امي اله جانت هي ويانه

وراها بفترة طلب رقمي واتصل بيه وكال اريد اكعد واحجي وياك بموضوع وصادفت وحدة من اجازاتي التقيت بي وطلبها مني بس اني سديت الموضوع وياه بسبب وضعنا المخربط وفقدان بشير والهجولة الي احنا بيها ،يعني الوكت نهائياً مو مال خطوبة وزواج
وكتله ما نكدر وعدنا ظروف بس هو اصر عالموضوع وبقى كل كم شهر يتصل ويسألني اذا انحلت ظروفنا او بعد لان هو بعده مُصر على طلبه ، اخر شي خله امانة برگبتي بس تتحسن عدنا الاوضاع اردلة خبر حتى يجون يتقدمون

وهو بصراحة الولد طيب وخلوق ما شايف عليه شي مو زين ، والصراحة هالكم يوم وقبل لا افتح وياكم الموضوع اني رحت سألت عنه بالدوام وبمنطقتهم هم والناس كلها مدحتلي بي

وهسه كلت نتناقش بالموضوع بيناتنا واشوف رأيكم  واكيد رأي ياقوته حتى ارد الجواب النهائي للولد

فلة:  ياقوت كاعدة بصفي وماطول بدر يسولف هي بدت شوي شوي تزحف ورايه تريد تضم نفسها من الخجل  ، انداريت عليها وحجيت بهمس ... ولج هو اني كل عرضي شبرين عبالك جاهل وين تختلين وراية ؟!!

ياقوت : هااا !!! لا بس جاي ادور هاي

فلة:احلف عليج هسه حتى (الهاي)  الي تكولبن عليها متعرفيها شنو اصلاً

صاح بشير بنترة ، متعمد يوترها
بشير : ياقووووت

فزت ياقوت وكعدت عدل باوعتله و وجها احمّر من التوتر ... ردت بمتمتة

ياقوت : ها ااا ؟

بشير : وين ضامة نفسج لخاطر الله ، اذا متردين تتزوجين بس كولي ، واني اخوج وعد عيناج ، الا اچبسج يمي هنا حالج حال الطرشي