اولاد الحكم

البارت ١٠

#اولاد_الحكم
للكاتبة روشان (مروج الشمري)

البارت ١٠

سنية: مرت الاشهر وما شفتها بعد ما التقينا والحكم يوم يمي ويوم يمها ،لحد ما ولدنا

والفرق بينا اسبوعين
اني ولدت بدر وبشير وهيفاء ولدت بتار ...

غفران : بتار مو ابنج؟!!!!

سنية : هيفاء جابته بس الواحد الاحد يشهد هو ابني حاله حال باقي اخوانه ويمكن اكثر

غفران : عيوني غوركت ،كمت اتذكر رجفتها ودمعها وعيونها من شافت بتار  اليوم

معقولة مو امه وشايلة كل هالمشاعر اله !!
زوجة اب وتحب ابن رجلها لهالدرجة ،ما شفت بكل حياتي هيج انسانة

سألتها بفضول
شنو السر الخلاج تحبين بتار هلكد ،يعني انتي هيج من الاساس حبيتي مثل ولدج لو اكو شي خلاج تتعلقين بي لهالدرجة

سنية : سودة بوجهي عليك بتار ،سودة بوجهي

غفران: ليش هيج تحجين !! شنو بي بتار ؟! عدلت كعدتي واني اسمع نبرتها المليانة حسرة وقهر من كالت اخر جملة
خلت الخوف يتغلغل بگلبي

سنية: اني من الاول من عرفت بهيفاء مجبورة على  الحكم اتعاطفت وياها وشكو حقد وغيرة جانن بگلبي عليها كلهن انزاحن

لان البنية مظلومة حالها من حالي ،ويجوز اكثر لان اني رضيت بقسمتي وماكو براسي هدف ثاني
بس هي صغيرة وحلمها تكمل دراستها واجوي اهلها والحكم حطموها بهالزواج

ومثل ميكولون اهلنا محبة الطفل من محبة امه ،يعني بتار من اجه للدنيا اني ماعندي كره لأمه حتى اكول والله هذا ابن ضرتي واكرهه
لا بالعكس طفل عادي اعتبرته

خاصة من كبروا الولد صار عمرهم سنة وشوية كام الحكم كل اسبوع الخميس يجيب هيفاء وبتار يمنا حتى يلعب ويختلط بأخوانه
لان هناك بالبيت وحده

غفران : زين يعني جنتي ترضين بهالشي؟ ضرتج تجي لبيتج

سنية : اني يوم بعد يوم اكتشف الحكم شنو من انسان ولو بيدي جان ازوجه بعد ثنين لخ بس حتى اخلص منه ،يعني ماعندي سوالف غيرة مال ضراير لان اصلاً هو بنظري ميستاهل اغار عليه

فبالعكس جية هيفاء يمي قوت علاقتنا اني وياها والجهال اتعلقوا ببعض كبروا سوى

لان هي هم خطية ماعدها مكان تروحله بس بيت اهلها وهم تضوج وتنفر منهم كامت من زوجوها للحكم فكامت كل فترة طويلة يلا تروحلهم

وهي هم حياتها كلها بين البيت وبتار الي صار روحها من الدنيا ،اجاها بتار وغير نظرتها للحياة حتى موضوع الدراسة نسته واتقبلت نفسها صارت زوجة وام

ما حبت ولا كدرت تحب الحكم ابد بس عدها بتار صار الدنيا وما بيها وهبت كل حياتها اله

غفران : عجيب هالحكم نسوان ثنين ماكدرن يتقبلنه !! شنو من شخصية هذا؟!