اولاد الحكم

البارت ٣٢

#اولاد_الحكم
للكاتبة روشان (مروج الشمري)

ملاحظة مهمة / مرحبا ورداتي اتمنى تكونون مستمتعين بقرائة روايتي وعايشين ويا بيت الحكم بكل تفاصيلهم مثل ما اتمنى اني

هواي شفت تعليقات بالوتباد تسأل شلون ايمي تحجي هيج هي مو خرسة شنو فلم هندي 😅ومن هالحجي

ايمان اول ما سوت الحادث بالطفولة وخسرت صوتها ،جانت غفران كلشي متفهم عليها يعني اذا احتاجت او رادت شي الا تكتبه الها بورقة

الى ان بعد سنوات كدرت غفران تتعلم لأشارات ايمي او مثل منكول خلقن طريقة للتفاهم بينهن
بحيث صارت تفهم على اختها من الاشارة

من اجي اني اكتب الحوار بينهن تردون اكتبه بالاشارة مثلاً لو اكتبه حسب تعبير البطلات الي وصلني ؟

اني ايمان احجي وياها رسائل وماخذه منها الاحداث كلها عن طريق رسائل فسالفة فقدان صوتها ما مأثرة عالرواية بشي

بقت الحوارات مالتها ويا اختها فهاي اني لازم ارتبها واصوغها الكم حسب فهم غفران الها بكل حدث

اما بالنسبة لوضعها اني وضحت بالانستا وراح ارجع اوضح الكم حالتها هنا

ايمان بالحادث اتعرضت لأمرين ،الاول حبسة كلامية نتيجة الصدمة مال حادث وخسارة امها بذاك اليوم وهاي الحبسة راحت بعد حادث الاعتداء من صرخت بوجه بدر

الامر الثاني هي ضربة بمنطقة الرائس والفكين تسببت الها بشلل اللسان بحيث حتى على اكلها اثرت اذا تتذكرون غفران مرة كالت حتى طريقة اكلها صارت اصعب تاكل شوية شوية مو مثلنا ...

فاتمنى تكون الفكرة وصلت الكم حبايبي 🖤

البارت ٣٢

ايمان : الفجر طلعت غفران بعد ما اجوها خالة سنية وبشير
وخلو فاطمة يمي وياها ملابسها وجنطتها مال مدرسة ،دخلتها نامت لحد ما صارت ساعه ٧ ونص كعدتها بدلت وراحت للمدرسة ورجعت اني نمت
كعدنا ب١١ تقريباً سويت ريوك لزيد اتريك واني شربت چاي راسي مصدع لان نومتي تخربطت

بديت اجهز للغدة علمود فاطمة وزيد لازم تمن ومركة مياكلون غير شي ،واني بالمطبخ سمعت صوت الباب اندك بهدوء

لان الباب كلش قريب عالمطبخ كون الطرمة صغيرة ،طفيت الطباخ بسرعة وطلعت مشيت كم خطوة بالطرمة وعيني عالباب حرت شلون افتحها ،خايفة ومنا ماعندي صوت حتى اسأل منو بالباب

واعرف هاي مو فاطمة لان تطلع من المدرسة بعد ال١٢ وهسه ١٢ الا ربع

واني اتمشى انشمر شي من فوك الباب ،فزيت وگلبي انخمط لان قريب عليه وكع

باوعت للكاع لكيت وردة وردة بيضة جبيرة وساقها طويل تجنن ،شكلها بالكاع يجذب

دنكت حتى اخذها ،سمعت صوت اغنية وصلتني بصوت ناصي جاي من خلف الباب