الـحب الأعـمـى

الـبـارت 88

{ الحب الأعمي }

  الحلقه 88

انا: ههههه مشيت وانا نضحك  ولبسا عابيا متاعي وصلت عند باب المربوعا  بنخش ليوسف
وننصدم ومعش عرفت انتحرك من مكاني من الي سمعتا
وفطنلي يوسف عند باب 

يوسف: حياااه
انا: قعدت انبحت .وساكتا وكنت نحس في ريقي ناشف
هيثم: التفت عليا. بأبتسامه خفيفه .شن جوك
انا: بمجامله للهيثم . الحمد الله
يوسف: يبحت فيا .وبأرتباك. كنك جيتي هنا
انا: محوتك الكلام طلع مني . مش انت كلمتني تبيني قالولي
يوسف:  بأرتباك .اها صاح امبدري بنسأل عليك
انا: لا كويسه انا .
هيثم : كان ساكت ومطبس راسا
يوسف: يحك في جبهتا .باهي تمام
انا: كنت نعرف يوسف لما يدير الحركه هذي معناها داس او خايف من شي . كنت انتمنا الارض وقتها تنشق ونختفي
عشان الي سمعتا كان صدمه كبييره ليا . لدرجة لساني ارتبط .
خلاص انا راكبا فوق
يوسف: باهي اشويه وتو نلحقك
انا: التفتت ومشيت بدون مانرد حرف واحد ع يوسف

هيثم: شكلها سمعت الكلام
يوسف:  اووووف نفخ وقعمز ع كرسي وحط يدا علي لحيتا  يمسح فيها. مش عارف انظني سمعت
هيثم: باهي انت ماتحكيش شي عند هيا تحكي مرات اتكون ماسمعتش شي
يوسف: باهي وكان سمعت .شن اندير
هيثم:  وهو يبرم في مربوعا يمشي ويجي . والله ماني عارف
يوسف: تنهد .هذي لقطه الا مانبيهش نبيش حياه تعرف بحاجه عند انتمم ع الموضوع
هيثم: باهي اركب شوف الجو انت .ولو لقيتها تعرف هديها وفهمها بالراحه مش تنفعل اضبط اعصابك
يوسف: وهو يصبي . ماشي تمام

انا: فتحت باب الشقه . وانا نسلح في عبايا امتاعي والايشارب
وسلحت السندل وقعمزت في صاله .والدنيا نحس فيها تبرم بيا ، ونفكر في الي سمعتا هل هو صاح ولا انا انتخايل في شي هذا
وانا في عز سرحاني سمعت صوت بابا انفتح .عرفتا يوسف ومابيتش نلتفت

يوسف: فتح باب وخش .فطنلي اني  في الصاله . يمشي شور الصاله بخطوات بطيئه ،عند وصل في الكرسي الي مقعمز فيه  
تنحنح يوسف . احمم
انا: مقعمزا ع حاشية الصالون ونبحت قدامي .وكانن ايديا فيهن رعشه بسيطه
يوسف: يحاول يحكي ويكسر الصمت .مشاء الله طالعا حلوه
انا: التفتت ع يوسف. بنظره كلها عتاب واسئله
يوسف: كنك، 
انا: احقر حاجه عندي ،انك تقعد داير شي غلط وتقعد مستمر انك تستغفلني
عارف اتحسس فيا اني جاهلا ولا مانفهمش ولا انك تقدر تضحك عليا
يوسف: تنهد وحط ايديه ع عيونا
انا:صبيت .انت قولي تشوف فيا غبيه
يوسف: بحت فيا. حشاك ياحياه
انا: باهي ليش .ليش يايوسف اديرلي هكي وتعامل فيا هكي
يوسف: لان صعب عليا كنت اني نحكيلك
انا: اها صعب انك تحكي بس ساهل انك ادس وتستغفل وتكذب صاح
يوسف: لا مش صاح
انا: ها املا انت فهمني شن الي صاح في نظرك . كنت ناوي عند امتا تكون حضرتك مستغفلني ودس عليا
ولا مكنتش عابي اصلاً اتقولي
يوسف: الموضوع مش هكي مش عارف كيف نفهمك انا
انا: قطعت يوسف، ياربي انت اصلاً هذي خصلتك الكذب والتمثيل عليش مستغربه انا مش جديده عليك دايرها من قبل وداس
يوسف: فنص فيا وضغط علي يدا بالقوه . افطني كلامك ياحياه معايا
انا: والله .حاظر ياكابتن سمحني لو غلطت فيك ماهو اصلاً انت تغلطش اكيد انا الي غلط
يوسف: بصوت عالي. حياااه .
انا: بحتت في يوسف باستكراد ، معش يخوف فيا صوتك العالي
يوسف: انتي كنك ماتناقشش في موضوع تفهمي مني قبل ماتقعدي تقولي في كلام كيف السم
انا: تعرف حاجه يايوسف ، انا عرفت ليش كنت اتجيبلي في هدايا ودهور فيا وكل شي نبيه كنت ادير فيه
بس توا عرفت السبب .تحساب روحك انت هكي حتسكتني ولا تخليني نسامح
يوسف: مادرتش هكي عشان الشي هذا
انا: ها علشان شن درتا
يوسف: سكت
انا: تنهدت. والدموع نزلن من عيوني بغزاره . تعبت معاك كل مره تطلع داس عليا حاجه ونكتشفها بطريقه اعيييه 
يوسف: قدم شوري .وبيحط ايديه علي وجهي
انا: وخرت لورا . رد بالك يدك تلمسني
يوسف: حط يدا علي عيونا ونزل مسح لحيتا . والله العظيم ان الي صار كلا قبلك وانا بروحي منصدم
خليني انفهمك بعدين ديري الي يريحك بس اسمعيني وافهمي مني،  وماتبكيش بطلي ابكا ماتزيديهش عليا 
انا: تعرف الي سمعتا كلا بينك وبين هيثم  مايهمنيش. عارف شن يهمني
يوسف: شنو
انا: غبائي .اني حماره مانفهمش وساهل ان اي حد يضحك ويلعب عليا
يوسف: حشاك معش اتقولي هكي ياحياه ماتقتلينيش بكلامك
انا: باهي وانا شن اندير ماهو انت قتلتني وانتهيت
يوسف: وراس حبيبي اسمعيني بس ومعش تحكي هكي
انا: يوسف. انا اسفه بس بجد كرها حتي اني انبحت فيك
يوسف: للدرجه هذي ياحياه
انا: اها واكثر اخره
يوسف: معناها انتي ماتحبينيش
انا: ماتخليش حبي مقياس للمشكله ، حبيتك بس انت الي تبيش تقعد قد حبي لكي
يوسف: الي يحب يسمع ويفهم ويجيب مية عذر للي يحبا ويسامحا
انا: انسامحك علي شنو تبيني  ان في عندك عيل تاني من مرأ اجنبيه انسامحك علي انك استغفلتني  وكنت طول الفتره هذي تكذب ودس عليا وعادي عايش تصرف معايا عادي تهدرز وتضحك وتلعب وتبصر وتجي اتحب وتبوس وتحضن وانت عادي مش مأثر فيك شي هذا نهائياً 
اها انت قولي عادي عندك هذا الحب في نظرك انت
يوسف: كنت انموت في الف موتا وننقهر ميت مره في اليوم كلمه نضحك وترديلي الضحكه وانا كاذب عليك تحسبيها كانت ساهلا عليا كانت صعبه والي اصعب منها كان . اني نعترفلك ، كنتي وقتها حتسامحي باهي لو اعترفت
انا: عادي كنت اقل شي زعلت في وقتها بس بعدها سمحت
يوسف: شنو يعني
انا: يعني لو يحطوني في قبر مستحيل انسامحك
يوسف: يقعدش قلبك قاسي هكي افهميني
انا: وانت ماتقعدش اناني وتطلب مني انسامح ع حاجه لو انت في مكاني مستحيل ترضاها
يوسف: ماتقارنيش روحك بيا
انا: اها عشان انت الراجل وانا المرأ صاح
يوسف: اكييد
انا: مش مودرتكم الا كلمة ان الراجل مايعيبا شي
يوسف: شن دخل هذي في موضوعنا
انا: لان انتم هكي جميع اخطأكم تحطو فيها تحت مسما الراجل مايعيبا شي ،مجتمع تفكيره تافه
يوسف: صاح غلطت بس كانت بالحلال صاح دسيت عليك بس كان صعب نحكيلك ، حياه انا انحبك مانكذبش عليك ومعترف اني غالط بس اقسم بربي ماكنت نعرف وكنت ع اساس خلاص ماضي وانتهاء يعني شي هذا ماصارش وانتي معايا او بعدك
صار قبلك وقبل وااجد اخره
انا: يوسف انا تعبت كل مره يطلع شي من ماضيك داسا .شن في اخره داسا عليا
يوسف: شي واقسم بالله هنا هذينا الي عرفتيهن من قبل وتوا هذي ،وبعدين مرات يطلع مش ولدي انا ماشي بس بنتأكد
انا: وكان طلع ولدك
يوسف: سكت
انا: قعدت نبكي ونهرت بكا .
يوسف: خلاص الله يربحك اسكتي ومعش تبكي .وقدم يوسف بيقرب شوري
انا: تبعدت وخشيت للدار نبكي .ونلم في دبشي
يوسف: قعد في صاله يفكر
انا: خشيت الحمام غسلت وجهي ومكياجي . وطلعت لبست لبسا عاديه
يوسف: صبا وخش شور الدار وحق شنطه .  شن هذي
انا: فاتحه باب دولاب ونطلع في ايشارب عادي نلبسا . شيلني حوش هلي
يوسف: حياه انتي مش حتحركي من حوش
انا: بحتت في يوسف. ارجووك شيلني لهلي
يوسف: حياه ماتكبريش مشكله خليني نسافر ونشوف الموضوع ماتسبقيش الاحداث
انا: يوسف.انقولك مش طايقتك
يوسف: باهي انتي تقعدي هذا حوشك وانا الي نطلع
انا: مانبيش نقعد فيه الحوش نبي هلي
يوسف: اووف مازلت موسع بالي فكيني من تسكير راسك
انا: مانيش قاعده ياتشيلني يانكلم هلي ياخذوني
يوسف: بحت فيا اشويه .وقعد يبحت في دار
انا:استغربت من نظرات يوسف
يوسف: طلع للصاله خذا موبايلي وجا للدار ،هذا موبايلك وحطا في جيبه ،  وهلك مافيش تكليم وانتي مافيش اطلوع من الحوش مش ع كيفك
انا: بصوت عالي .ومش ع كيفك انت تغلط وتقعد تبيني غصبن عني نقعد
يوسف: بأعصاب خبط الدولاب عند اسكر بالقوه
انا: نطيت من خبطت الدولاب  
يوسف: خلالاص عرفت روحي غالط، وانتي مافيش طلوع
انا: تمام  عيط توا ، بس حنطلع وحتشوف 
يوسف : وعيونا حمر. حياه ماتعندينيش
انا: نكرهك والله نكرهك
يوسف: عادي وانا انحبك مش لازم نحنا الاثنين نقعدو انحبو بعضنا
انا:وعيوني ملينات ادموع ،حسبي الله ونعم الوكيل فيك
يوسف: بحت فيا بنظرة حزن  .وطلع من دار وسمعت باب شقه طبق بالقووه
انا: قعمزت ع سرير ونهرت بكا
ان ليش حياتي هكي بعد نفرح اشويه لازم اتجي حاجه اتزعلني وحتي لما حبيت يوسف طلعن عندا حاجات صعب انك اتسامحي بسهوله عليهن كرامتي كانت تسمحليش اني نسامح ع شي هكي مع اني شفت هدؤ يوسف الي كان ديما يتعصب بس مره هذي كان هادي ومذلول
لكن كنت كرهتا في لحظه نزل غل عليه لان استغفلني طول الفتره هذي ودايرني وقت مايبي وعلي جوا
ومافيش اي اهتمام بمشاعري وبكرامتي ولا حتي بعشرتي معاه
حسيتا اناني المهم هو والي يبيه بس وكنت نفكر لو العيل هذا ولادا طلع وقتها شن موقفي قدام الناس وهلي وهلا شن يقولو عليا من بيصدق انها من ماضي وكيف بنرضا ع روحي عيل ليوسف من مرأ ثانيه
وانا الي كنت انتمنا ان اول عيل له يكون مني كانن عرم افكار يشيلن ويجيبن فيا بس اكثر جرح هو قلبي وكرامتي
لان الحب عمرا ماكان ذل الحبيب للحبيبه
بالعكس الحب كرامه واحترام وغلطان الي يقول الي يحب يتنازل ع كرامتا
الي يحب والي يحبك صاح يحافظ ع كرامتك مهما صار مش يهينك ويذلك ويقولك لانك اتحب سامح

~~~~~~~~~~~~~~~~~~~~~~~~~~~~~~~~~~~~~~~~~~~~~