#__وتين__🍃
🌷الحلقة 16🌷
مؤيد : انت ولد عم رنا صح
مراد : اي صح
مؤيد: في صور نبي نوريهملك لازم تشوفهم
مراد : صور شنو ؟؟
مؤيد : لو عندك ايميل ع الفيس اعطيهولي ويوصلوك الصور توا
مراد : اي عندي ايميل اسمه $$$$
مؤيد : به تمام شوية ويوصلوك
مراد : به ماقتليش تقولي انت مني وصور شنو اللي بتبعتهم🤔
مؤيد سكر الخط وبعت صورتين لايميل مراد
مراد : تي مني هدا😞
وقعد يتصل ويعاود لين وصلوه الصور
مراد كان واقف ويساوي في شعره ع المرايا ولما فتح وشاف اول صورة من الصدمة قعمز : هده رنا 😨 اي اي رنا تي منو هدا ومن وين يعرفها وشن يديرو عنده صورها😮 معقولة رنا هكي رناااا تبعت في صورها رنا #### لالا اكيد هدا واحد امسخ ويبي يشوه سمعتها لكن علاش هيا بدات معناها اكيد ليها ايد و طايحة في يكون واحد فاسد "
°
•
°
•
°
رنا مقعمزة وجنبها سراج وبوها وتحاول تجمع قوتها وتقوللهم لكن مش قادرة حتى تتكلم وكل مايكلمها حد ترد بصوت يادوب طالع
رنا : سراج 😳
سراج يتفرج ع التلفزيون: نعم
رنا : بنقولك حاجة
سراج منسجم مع التلفزيون : فوتيني شوية رنا
ناضت رنا بكل هدوء واستغرب سراج لانه كان يستنى فيها تناقره وتتعارك معاه لان ماباش يسمعها يستنى فيها تكشخ وتعلي صوتها زي كل مرة لكن ناضت بكل هدوء وبدون اي ردة فعل لدرجة ان لفتت نظر سراج
سراج : تي غر وين ماشية استني
رنا : لالا بنرقد 💔
سراج : مش كنتي مش عارف شن بتقولي
رنا تلخبطت : اا لللا خلاص فوت
سراج : ادوي شن في
رنا : خخ خ خلاص فوت
سراج : تي خيرك
رنا توترت ووجها ولا احمر : ااا
علا : بتقولك علي اقدار
سراج : خيرها
علا : علي خاطر مش معدل عليها وهكي....تعرفها اقدار ديما وهي تشكي
سراج صدق لان ليه ايام ماكلمش اقدار وتتصل مايردش : معاش تفتحولي سيرتها باهي
رنا : به ؛ ومشت خشت لدارها
علا لحقتها : هبلتي انتي هببببلتي
رنا تبكي : شن تبيني ندير شني😭 مليييييت والله مليييت😭
علا : وياريت عمر ولا احمد ع الاقل يتفهم شوية مالقيتي الا سراج اللي ماعنده الريح وين يدور اقسم بالله يقتلك في ارضك
معتصم : خيرها تبكي😮
علا : اششش سكر فمك
معتصم : به خيرها
رنا : اطلع عصومي
معتصم : مبردكم😒
°
•
°
•
°
اني : انستوني ياحنة
رتاج : الله يآنسك يامنة
تسنيم : خيرها اختك تسلم بروس صوابعها
اني : تسألي فيا😂
تسنيم ورتاج :😂
تسنيم : يابنات اتخدت قرار
رتاج : واو وشن هو القرار
اني : اتحفينا
تسنيم : بنبعت لسراج اخر رسالة
اني : شنوو
رتاج : هكي بديتي تتلصقي عليه
تسنيم : في الاخير هو مش عارفني اني مني حنبعتله رسالة اخيرة
رتاج : وشن بتبعتي
تسنيم : اسألي لولو لان هي اللي بتكتب 😁
اني : اسمعي كان تفكيني
تسنيم : علاش
اني : هكي المواضيع اهيا طلعيني منها بالله عليك اني من لما سألني علي رقمك مش عارف شن صالرلي
رتاج : غريبة قصة السؤال متعه
اني : اي وقصدي انتو عارفين ان ماعنديش بيه خلطة هلبا ومانبيش يطيح القدر زي مايقولو فهمتوني
رتاج : اسمعي تسو عندها حق لولو ره تخايلي انتي الموقف وبعدين تو لو هو صديقك ولا تهدرزي معاه ممكن
تسنيم : به علاش ماتتقربيش منه لولو
اني : اياااا علينا
تسنيم : علاش اديري هكي انتي اكتر وحدة ممكن تساعدني ياليال ويخي انتي الوحيدة اللي تقدري والله الا نموت الف موته في اليوم انتو مش حاسين بيا ومش حتقدرو تحسو
اني : تسنيم مالقيتيش من تحبي قصدي الموضوع معقد هلبا كانك ملاحظة
تسنيم : مش معقد انتو تعقدو فيه
اني : واحد مرتبط واماليه حرف سود ويكرهوني ويشوفو فيا شبه عدوتهم علي قصة امي وهو اكتر واحد في خوته ماعنديش بيه خلطة ولا صاحب خوي ولا شي وزيادة اختي شكلها تحبه وتقوليلي الموضوع مش معقد
رتاج وتسنيم : تحبه😮
اني : اي الفترة الاخيرة ملاحظة عليها دوا وحركات وهكي
تسنيم : الدنيا كلها ماشيا عكسي الهم
اني : علي خاطر ولد الدنيا ماشيا عكسك بدل ماتفوتيه وتشوفي غيره
تسنيم: قتلك مش حتقدري تحسي بيا بكل
رتاج : به غر خلينا في موضوع الرسالة اللي بتبعتيها
تسنيم : به عبرولي حاجة نبعتها....ولا نقلكم عرفت شن نبعت
°
•
°
•
°
ع عبد الله: ماكلمكش خوك
سراج سارح وماردش عليه
ع عبد الله: سراااج
سراج نخلع : ها نعم
ع عبد الله: وين سارح
سراج : كلمني الصبح عمر
ع عبد الله: شن اموره ماشية
سراج : اي جوه مليح
تن تن 📲🗨
فتح سراج لقي رسالة من نفس الرقم
_________________________________________
تسنيم : مش كان عندك فضول تعرفني اني مني
_________________________________________
سراج : كان عندي فضول
_________________________________________
تسنيم : وتوا
_________________________________________
سراج : توا ياريت تمسحي رقمي من تلفونك وتخطيني.....سلام
_________________________________________
~~
تسنيم :😶شوفو شن بعتلي
اني ورتاج: ترااا
رتاج : طبيعي حيدير هكي
اني : لان واحد يكلمه شخص مجهول مرات فكر انك ولد مش بنت
تسنيم: به كيف ندير اني كيف
°
•
°
•
°
تررررن ترررن📱
مسرة : واااك شن يبي هدا مبرده😑 ؛ دارت تلفونها صامت ومابتش ترد
~~
مؤيد : خيرها ماتردش زعما قتلها حاجة رنا 😓 ولا زعما ولد عمها قال وهيا سمعت 🤔 باهي اني خيرني درت هكي شن استفدت.....مفروض لما هددتني مسحت الصور وفت الموضوع خير مانخسر مسرة
°
•
°
•
°
تررررن ترررن 📱
رنا : الو
اقدار : اهلين رنوش شن الجو
رنا : اهلا اقدار شن اخبارك
اقدار: تمام وين مغطسة
رنا : قاعدة
اقدار : سراج في الحوش ولا العمل
رنا : لا اهني في الحوش
اقدار: اممم
رنا : شني شكلك انتي وياه مش تمام
اقدار : بالله فكيني منه خوك هدا يعامل في الناس بمزاجه
رنا : علاش خيركم
اقدار : امتا مايبي يكلمني ويهدرز وجوه مليح وامتا مايبي مايردش وشايف روحه يحسابني علي مزاجه لكن اني معاش حنتصل بيه نهائي لين هو يكلمني
رنا : 😑 به اقدار تصرفي كيف ماتبي اني والله اللي صاير فيا سادني بش حتى نحل مشاكل غيري
اقدار : خيرك شن في
رنا : مافي شي لكن قصدي انتي وياه في بعضكم ماحد دخله ولعلمك سراج اكتر حاجة يكرهها لما حد يتدخل في مواضيعه وطبعه صعب تعرفيه يعني لانقدر نكلمه لا ندوي معاه
اقدار : واني ماقتلكش كلميه غر متصله نحكيلك بس
°
•
°
•
°
⛅☀️
مسرة : بابا ارفعني لحوش عمي عبد الله اليوم
بابا : علاش
مسرة : هكي وفي شيتات نبي ناخدهم من رنا
بابا : باهي غر بسرعة عندي ماندير
اني : امالا وصلني في طريقك لحوش عمي عادل بابا
ايناس : تو سمعتيه قال عندي ماندير نضتي تبي تمشي حتى انتي
نادر : تو نرفعك اني لونا وتي روحك
اني : به
بابا : خيرك تعاملي فيها هكي
ايناس : لانها تجاكر في مسرة
بابا : لا تجاكر فيها لاسو في حالها غر انتي ربي يهديك
°
•
°
•
°
مريم : انستينا انستينا
اني : الله يآنسك شكله مافي حد
مريم : ماما في حوش خالي مروح من المستشفى اليوم ومراد في الخدمة
اني : اها...شن مدايرا
مريم : طلعت نتيجتي حقاا
اني : الله...نقبلتي ؟؟
مريم : اي قبلوني
اني : به الحمد لله العقباليا
مريم : انشالله
اني : شن جوك انتي واحمد
مريم ابتسمت : يهببببل
اني : ههههه واضح واضح من عيونك اللي يلمعو
مريم : حقاا😂
اني : ربي يعقد عسلكم
مريم : وانتي شني
اني : اني خليني في الطب اللي بديت نهلوس بيه
مريم : مش عارفة امتا بتحبي يابنت
اني : امتا مايحن ربي
مريم : معاش تكلمي فيه مروان
اني : تؤ تؤ
°
•
°
•
°
مسرة : سيرجو شن الجو
سراج : تمام....علا حدديلي سوريتي بسرعة
مسرة : وين ماشي
سراج : للخدمة
مسرة : خيرك شكلك جوك مش مليح
رنا : سراج الفترة هده اشبح خيره
سراج مشي من غير مايرد
مسرة : ماروحش عمر
رنا : غدوا انشالله
مسرة : به ربي يوصله سالم
~~
تررررن 📱
سراج : ايوا
مراد : الو سراج شن الجو
سراج : تمام
مراد : وين انت
سراج : كيف ماشي للعمل
مراد : باهي بنجي في الليل نهدرز عليك في الحوش
سراج : باهي نتلاقو
مراد : سلام
°
•
°
•
°
ماما : شن قالك الدكتور
عبسي : قال حالته تاعبة هلبا
ماما : ربي يستر
عبسي : انشالله خير.....انتي روحي لخدمتك واهو قاعد معاه اني
ماما: زعما
عبسي : اي اي روحي واهو اني معاه
ماما: هو اللي مشجعني نروح ان حتى خوك محمد جاي
عبسي : خلاص احجزي طايرة وتوكلي
ماما : به انشالله
°
•
°
•
°
مراد : السلام عليكم
اني : وعليكم السلام شن الجو
مراد : تمام شن جوك انتي
مريم : نحطلك غداك
مراد : لالا امك وين
مريم : في حوش خالي
مراد : اسمعو بنسألكم علي موضوع
مريم : انشالله خير
مراد : ليال عندي فيك ثقة نلقى الدوا طالعة تشوفي
اني : لالا والله ماتطلع وكان ماتبيش تدوي قدامي عادي
مراد : لالا عادي....رنا بنت عمي عندها في جو الولاد وهكي
اني ومريم شبحنا لبعض واستغربنا
مراد : قصدي تكلم هلبا وعندها في المواضيع هده
مريم : الحق اني ماعندهاش معاي كترة تهدريز وهكي
اني : علاش تسأل
مراد : غر جاوبيني
اني : في رأيك حتى لو نعرف حندوي عليها
مراد : وعلاش ماتقوليش
اني : لانها بنت عمي وزي اختي
مراد : اني مش قصدي ان حد يبيها ولا تكلم فيه هدا عادي اي بنت تحب وتكلم لكن اللي نقصده هيا في عليها شبهات
مريم : به علاش سألت علي رنا بالدات
اني : شكلك تبيها😅
مراد : اني ندوي في موضوع وانتو في موضوع تاااني ؛ وناض
°
•
°
•
°
🌘
مراد : السلام عليكم
الكل : وعليكم السلام
مراد : كيف حالك مرت عمي
فريال مرت عمي: اهلين ولدي كيف حالك
رنا مدت ايدها : شن الجو مراد
مراد مد روس صوابعه من غير مايدوي ؛ استغربت رنا من طريقة سلامه
مراد : وين سراج علا
علا : يدير في دوش شوية ويجيك
مراد : شني عمي مهناش
فريال : لا طلع بكري
مراد : عصووم شن الجو
معتصم : مليييح
مراد : قريب المدرسة عاد
معتصم : اي مبردها
مراد : شن خاش السنة الجاية
معتصم : بنخش خامس
مراد : مشااالله كبرت
معتصم : مزال ماكبرتش اللي يكبر يولي عنده شنابات ويبدا يتكلم في التلفون مع البناويت
مراد : 😂
فريال : ريته 😂
مراد : عادي كانك ع البناويت كلمهم من توا
معتصم : تي كل ماتعجبني وحدة تجي تقولي تعالا بابا تحسابني فرخ 😑
مراد : انت كلم وحدة في عمرك بش لما تكبر تلقاها حتى هي كبيرة
معتصم : يععع شينات
فريال : وكيف تبيها يامفعوص
سراج : السلام عليكم
مراد : وعليكم السلام
معتصم : نبيها حلوة وبيضاء
سراج : من هيا 😂
فريال : حبيبته 😂
مراد : صار تبيها بيضاء😂
معتصم : اي زي ليال
سراج : اووو تضرب ع القوي
فريال : نهار حرف هدا ماناقصني😒
مراد : هههههههه
سراج شبحلها : ديرينا قهوة امي
سراج : شني شكلك عندك ماتقول
مراد شبح لمعتصم : هوينا شوية
معتصم : شنو😶
سراج : برا العب يانفخ
مراد : شن جوك
سراج : والله تمام شن بتقول هيا
مراد : غر اصبر علينا شوية😂
سراج : شوقتني الحقيقة
مراد : والله ماني عارف شن بنقولك
فريال : تفضلو هي
سراج : صحيتي
تن تن📲🗨
مراد فتح ايميله لقاني باعتتله
_________________________________________
اني : لو قتلي شن هوا اللي انت سامعه علي رنا ممكن نفيدك بحاجة
_________________________________________
مراد : كيف بتفيديني ؟؟ اني نبي نعرف هي عندها في المواضيع الغلط ولالا بس
~~
سراج : تي ادوي شن حشيت راسك في التلفون😒
مراد : شوية بس
سراج : امالا خلي نصلي المغرب انت معطل ع التلفون شكلك
مراد : به برا صلي
قعد مراد يفكر : تو اني جاي لخوها بنقوله علاش ندس علي ليال وهو الموضوع بيطلع خلي نقوللها ومرات تفيدني بحاجة ونعرف شن نقول لسراج وبعدين ليال عاقلة مستحيل تطلع منها الدو
_________________________________________
مراد : اني سامع عليها حاجة ونبي نتأكد صح ولا غلط
_________________________________________
اني : بكري مابيتش ندويلك قدام مريم لان مرات تغير نضرتها علي رنا ولا حاجة ومرات تطلع منها الدوا
اسمع مراد لو تعرف حاجة قولي لان اني شاكه في حاجات لكن مش متأكدة
_________________________________________
مراد : تبي الحق اني في واحد بعتلي صورها ع الفيس وصور الله لا يروعك لين نصدمت
~~
جتني صدمة معقولة رنا اللي نحسابها اعقل وحدة معقولة تبعت صورها وبعدين ربطت الاحداث لما خشيت عليها وهي تبكي ولما شافتها رتاج تبكي به معقولة الشي هدا مع حبيب مسرة ولا زعما مع اكتر من شخص
_________________________________________
اني : من هو الشخص هدا
_________________________________________
مراد : ماباش يقول اسمه والايميل مش مكتوب اسم وشكله الايميل جديد
_________________________________________
اني : به علاش بعتلك انت بالدات......ولو يبي يفضحها علاش مابعتش لخوتها طول
_________________________________________
مراد : وين نندري مرات يبي القصة تطلع ولو قال لخوتها بيدسو....اسمعي بعدين نهدرزو سلام
_________________________________________
اني : باي ورد بالك تقول لخوتها لين تفهم الموضوع كويس
_________________________________________
مراد قري رسالتي الاخيرة وسراج يقوله ادوي شن عندك....معاش عرف كيف يتصرف وندم لانه تسرع وجي بيقول لسراج
مراد : اا بنقولك
سراج : تي ادوي الزح
مراد : والله فكرت بناخد قطعة ارض شن رايك
سراج استغرب : اي كويس
مراد : قلت ناخد رايك انت تفهم في المواضيع هده
سراج : هدا هوا الموضوع
مراد : تي خيرك عششت في كلمة موضوع اني قتلك بنجي نهدرز عليك بس
سراج : اها اي والله هكي رايي خود قطعة تقعدلك ماتندريش ع الدنيا
مراد : شني بديت تكمل فيه حوشك
سراج : اي لقي عمال كويسين
مراد : مليح والله
سراج : شني شكلك ناوي تتجوز
مراد : تي تسمع في كلام امي هده تحش مسكينة😂
سراج : قصدي شن اللي خلاك تفكر في موضوع الارض
مراد : زي ماقلت انت ماتندريش ع الدنيا
سراج : لكن امك ناوياتك😂
مراد : اي 😂
سراج : به كان هي حاطة وحدة في راسها برا اعطي فيها كلمة واجل موضوع الجواز
مراد : تي لالا المواضيع هده اني منحيها من راسي بكل
سراج : ااه يعني هي في بالها بنت ؟؟
مراد : شكلها داويتلك في حاجة😒
سراج : ههههههه
مراد : ماتقوليش قالتلك علي ليال
سراج : اي
مراد : واااك امي هده تحرق الدم
سراج : تي سكر فمك ياراجل
مراد : المشكلة تدويلي في مواضيع اني مش مفكر فيها بكل
سراج : قصدك ليال ولا الجواز بصفة عامة
مراد : التنين
سراج : اني نحسابك تبيها
مراد : من عقلك تدوي تي ليال نشوف فيها زي اختي ياراجل وبعدين مستحيل نفكر ناخد وحدة من العيلة
سراج ضحك من عيونه : علاش
مراد : هكي
سراج : لكن ليال اللي تشوف فيها زي اختك مش اختك
مراد : تي خيرك بديت تدوي زي امي انت....تعرف حتى لو فكرت نخطب حنخطب من جيهة بعيدة ولسبب واحد بش امي تفوت ليال
سراج : باهي علاش
مراد : تي نقولك نشوف فيها زي اختي ومتأكد زي مانشوف فيك انها تحسب فيا زي خوها
سراج : اها باهي فهمه لامك الكلام هدا لانها مش منحيا البنت من راسها
مراد : ماتبيش تفهم
°
•
°
•
°
اني قعدت نفكر زعما هيا باعته صورها ولا حد محصلهم من غير علمها وزعما حبيب مسرة عنده ايد
لكن حتى لو هيا باعته اني مفروض نكدب علي مراد اي كدبة بش ينحي الموضوع من راسه....لكن اني شن دخلي نكدب وندخل روحي في المشاكل....لكن رنا طيبة ماتستاهلش مفروض نساعدها مرات مش بإرادتها الموضوع صار
~~
نادر لقي مسرة وايناس في المطبخ خش وقف جنبهم وناداني: يالونااا
اني في داري : نعععم
نادر : تعالي عندي ليك بشرى
ايناس : بشرة شنو
نادر : تو تسمعي
اني : شنووو
نادر : عندي ليك خبر
اني : خبر شنو
نادر : نقبلتي في الطب
اني حطيت ايدي علي فمي 🙊 : الله
نادر : والله
طبعا ايناس ومسرة وجههم مايتفسرش.... مسرة طلعت من المطبخ من غير كلام
ايناس : تو بتقدريه انتي هدا
نادر : تقدره بإدن الله
ايناس : انشالله مادابينا تولي دكتورة
اني قعدت نضحك: بشرك بالخير يانادر
°
•
°
•
°
احمد : شن جوه الحلو
مريم : تمام
احمد :قالو جي خوك مراد بكري خيرك ماجيتيش معاه
مريم : مانندريش عليه ماشيلكم وبعدين حتى لو جيت ع اساس انت قاعد يعني
احمد : انتي غر جيتي وكلمتيني تو نجي
مريم : اصلا كانت عندنا لونا بنت عمي
احمد : اها
°
•
°
•
°
_________________________________________
مراد : رقدتي
_________________________________________
اني : لالا
_________________________________________
مراد : علاش قتيلي ماتقولش لخوتها
_________________________________________
اني : لان اني فاهمة القصة وهي رنا مضلومة ومش متع الكلام هدا _________________________________________
مراد : والله بكري كنت مع سراج وكيف بنقوله .....به فهميني ترا
_________________________________________
اني : خو صاحبتها يبيها وهي مش معدلة عليه مشي بدي يهدد فيها وشكله واخد الصور من تلفون اخته
_________________________________________
مراد : وانتي كيف عرفتيه الكلام هدا وشن الدليل عليه
_________________________________________
اني : شن قصدك اني نكدب
_________________________________________
مراد : ماقلتش تكدبي لكن من قال ان هو خو صاحبتها ومن قال ان مش واحد باعتتله صورها
_________________________________________
اني : رنا مش هكي يامراد و اني متأكدة من كلامي 100%
_________________________________________
مراد : انتي متأكدة لكن اني مش متأكد اكديلي
_________________________________________
اني : لو هوا صاحبها زي ماقلت فحيكون في بينهم حاجات تانية غير الصور زي الرسائل زي المكالمات لكن بش تعرفه كداب هو محصل هالصورتين ويبي ايديرلها مشاكل بعتهملك وحاجة تانية هو ماباش يقول اسمه لان لو قاله حتمشي اخته في داهية معاه
_________________________________________
مراد : دوختيني
_________________________________________
اني : واضحة القصة زي عين الشمس ومافي شي يدوخ
_________________________________________
مراد : تصبحي علي خير
_________________________________________
اني : وانت من اهله
°
•
°
•
°
☀️⛅
اني : صباااح الخييير
رتاج : صباح الورد شن تحلمي بيا
اني : ههههههه لالا عندي ليك دوا هلبا
رتاج : شني
اني : اول حاجة نقبلت 😊
رتاج : حقااااا😀 يعمرررري وليتي دكتورا
اني : ماتبالغيش 😒
رتاج :😂
اني : في الحوش انتي
رتاج : اي تعاليلي
اني : تو نشوف كان قدرت
رتاج : وردي عليا اكديلي
اني : تمام
رتاج : مبروووك مرة تانية يالحب😙
اني : الله يبارك فيك توجتي
~~
ترررن ترررن 📱
اني : الو
ماما: صباااح الخير لونا
اني : حي رووحتتتي🙊😀
ماما: اي اليوم الفجر
اني : الحمد لله ع السلامة كيف حاله جدو
ماما : تاعب يالونا
اني : لا حول ولا قوة الا بالله
ماما : شن جوك انتي
اني : ماكلمكش نادر
ماما : لالا
اني : نقبلت في الطب😀
ماما : روروروري مبروووك مبروووك
اني : الله يبارك فيك
°
•
°
•
°
فريال مرت عمي: صباح الخير
سراج : صباح النور
فريال: شني طالع
سراج : اي
فريال : ماتبيش تفطر
سراج : لالا وقت عليا
فريال : به زينة وليدي
~~
علا : معاش كلمك الحقير
رنا : صبح فكيني من سيرته
علا : عيشنا في كابوس ربي ياخده انشالله
رنا : ااه كان نسمع بيه ميت
علا : انشالله اليوم قبل غدوا
رنا : معاش كلمني تعرفي ربي يستر وخلاص
°
•
°
•
°
رتاج :😮 امتا صار هدا كله
اني : امس
رتاج : وانتي علاش ادخلتي فوتيهم فكيك من المشاكل
اني : سخفتني وقلت مرات تطلع مضلومة
رتاج : هه😏 مادير شي مايجيك شي
اني : قصدي حتى لو عندها مشكله مرات تنحل من غير مايعرفو خوتها
رتاج : قصدك خو مريم عرف ومش حيقول هده حاجة مستحيلة
اني : لكن حاولت نقنعه انها ماليهاش علاقة وحسيته بدي يقتنع نوعا ما
رتاج : وتوا كيف بديري
اني : بنكلمها هيا ونفهم منها
رتاج : لكن حوش عمك صعبين كان سمعو تمشي فيها
اني : والله تندفن وهيا حية ...اسمعي حتى تسنيم مش لازم تعرف باهي
رتاج : به
اني : فكينا من التشهدير اصلا انتي قتلك لان نبي نتأكد لما شفتيها في المطعم كانت تبكي ولالا بس
رتاج : زي ماحكيتلك هي تحسيها تبكي وواضح عليها متوترة هلباااا وهو يكشخ عليها تحسيه
°
•
°
•
°
ترررن ترررن 📱
سراج دار التلفون صامت وحطه
هنادي : اا لو ماتبيش تتكلم قدامي انوض عادي
سراج : لالا تلفون مش مهم
هنادي : اها....نسألك سؤال
سراج : تفضلي
هنادي : مرتبط انت
سراج : هههههههه
هنادي : هههههه علاش تضحك
سراج : ضحكني سؤالك
هنادي : لو ماتبيش تجاوب براحتك
سراج حط يديه ع طاولة الكتب وابتسم: لا مش مرتبط
هنادي : اها
سراج غمزلها : علاش سألتي
هنادي : فضول بس
°
•
°
•
°
فريال مرت عمي: الحمد لله ع السلامة
عمر : الله يسلمك
علا : وينها مرتك
عمر : ركبت بترتاح تو تنزل بعدين
فريال ضحكت: شني جوكم باهيين 😉
عمر غير الموضوع : اا رنا وين
علا : في الجامعة
عمر : به بنركب اني بنرتاح
فريال لحقاته : شني كل شي تمام
عمر : ااا بنركب نرقد تو بعدين نهدرزو
فريال : مقنينته المتحشم 😂
°
•
°
•
°
ترررن ترررن 📱
رنا : الو
اني : اهلين رنا كيف الحال
رنا : تمام شن جوك انتي
اني : الحمد لله...اسمعي رنا وين انتي
رنا : في الجامعة علاش
اني : الحق نبي ندوي معاك في موضوع
رنا : موضوع شني انشالله خير
اني : مايجيش ع التلفون
رنا حطت ايدها علي قلبها : موضوع مهم شكله
اني : كيف نتلاقو
رنا : والله يالونا مانعرف تو نقول لاحمد يجيبني عندكم كان قدرت
اني : لالا في حوشنا مش حناخدو راحتنا
رنا : به تعالينا انتي
اني : اممم تو نحاول
رنا : به قوليلي موضوع شني ماتخلينيش علي اعصابي
اني : موضوع يخصك
°
•
°
•
°
فريال مرت عمي: افتحو البااب
علا : منووو....اهلا 😊
اني : اهلين علا شن الجو
علا : تمام شن جوك انتي
اني : كويسة
علا : تفضلي
فريال : اهلين كيف حالك
اني : تمام كيف حالك انتي
رنا : جيتيي
اني : اي جيت
رنا : شن هوا الموضوع هيا طيحتيلي قلبي
اني : .....
🌷يتبع🌷
شن حتكون ردة فعل رنا...وهل حتعرف امها او حيقعد الموضوع سر 🔐
انشالله تكون عجبتكتم الحلقة وتابعو باقي الاحداث في الحلقة الجاية
نفس الشي مش حنرضى بأقل من 600 كومنت
.
.
#الكاتبة_تِمار
