#__وتين__🍃
🌷الحلقة 59🌷
مريم ناضت طلعت و احمد لحقها طول وشدها من يدها وجبدها لداره وسكر الباب
~~
~~
بابا : هي نمشو نادر
ع عبدالله : تي خيركم الغدي بيحطوه
بابا : لا خلي نمشو نتغدو في الحوش العويلة قعدو بروحهم
نادر : اي هي
سراج خش : تي وييين
نادر : والله الا بنمشوها ياسيرجو
تررررن ترررن 📱
نادر : الو
اني : ايوا ندور مشيتو لحوش عمي
نادر : اي وبنروحو
اني : اعطيهولي نعيد عليك
نادر : هاك عمي لونا بتعيد عليك
سراج ابتسم لا اراديا ❤
ع عبدالله : اهلا ليولا كل سنة وانتي طيبة
اني : اهلين عمو كل عام وانت بخير ينعاد عليك بالصحة والسلامة
ع عبدالله : سلمك بنتي ربي يحفظك
~~
~~
مريم : اي هدا اللي عندي ياأحمد
احمد : اها واني نقول البنت رمضان كله لا اتصلت لا دورت وحتى نتصل ماترديش
مريم ساكتة
احمد : يعني خلاص اتخدتي قرار معاش عندك حتى امل ان تفسخو ولا ماصدقتي
مريم وجعتها الكلمة : ماصدقت ؟؟😢....لعلمك وقت انت كنت تهيج في تونس مع البنته اني نتعدب ونبكي وما عالم بحالي الا ربي وحظرتك مسكر تلفونك ومفوتها بارات ونساوين وهياجة
احمد : شن الكلام اللي تقووولي فيه😠
مريم : والله هدا هوا وتوا هدا اللي صار لا بإيدي ولا بإيدك وحتى نادر عجز واي حد مننا بيتكلم حتصير مشكلة وتكبر و....؛ سكتت مريم
احمد : و شني كملي
مريم : احمد شكله النصيب مش ناوينا لبعض😢 نستنى ونقول تو تنحل مع الايام لكن كل مالها متعقدة اكتر وخالي وعمي مقررين وكل مرة يتفقو علي حاجة💔
احمد : نفهم من كلامك ان معاش نحاول ولا نتصرف
مريم : قصدي اللي يصير بيننا توا ماليشي محل من الاعراب...اسمي خطيبة نادر ونكلم فيك انت...حسيت روحي اخي
احمد : تمام ربي يسمعنا علي بعض الاخبار الطيبة ؛ طلع احمد وقربع الباب بقوة
مريم قعدت تبكي
~~
ع عبدالله : هدا شنو
فريال : مش عارفة
جميلة : شورا ريح
°
•
°
•
°
بابا : قصدي البنت تقعد لا معلقة لا مطلقة هكي
نادر : عيد يابوي بالله عليك ماتنكدش عليا
بابا : واحد يدووله ع الجواز يقول ماتنكدش تي الناس يفرحو
نادر : اني مش زي الناس😑
بابا : اني غدوا بنمشي لانور وبنتفاهم معاه ره
نادر: علي شنوو
بابا : ع الفضانية
نادر : الصبببببر يارب
~~
ايناس : وين مشيتو لتوا😏
نادر ببرود : لحوش عمي عبدالله
مسرة وايناس نصدمو
بابا : هي حطو الغدي جعنا
ايناس : صار مشيتو لعبدالله بعد اللي داروه صغاره
بابا تشنج : نوضي حطي الغدي وماتنكديش عليا عيد😠
°
•
°
•
°
🌒
اني : منوو
نادر : اني افتحي
اني فتحتله الباب وسلمنا وخش قعمز وطمعا ديما اول ماسمعت صوته خشت داخل معاش طلعت ونادر يدور بعيونه
ماما : خود غريبة نادر
نادر : لا معبيها الحمد لله
عبسي : من وين الجية
نادر : والله من الحوش رقدت شوية وبعدين جيت
خ فاطمة : شني مزال عرسك
نادر شبحلها وسكت
اني كنت في المطبخ وبعدين جيت قعمزت جنب نادر
نادر بالشوية : لونا
اني : هاا
نادر : ماجتش
اني : جت
نادر : وينها
اني : داخل فوتها 😒
نادر ناض و خش يدور عليها
ديما كانت مقعمزة هي وشهد في دار ماما وبعدين فتح نادر الباب
ديما نخلعت : شش شن تبي
شهد تشبح وساكته
نادر : شهد خلينا شوية
ديما : تشبك فيا نبدل ولا
نادر ساكت
ديما : اصلللع
نادر قعد واقف
شهد ناضت بتطلع
ديما : شهدددد اقعدي وين ماشية
نادر اشر لشهد بعيونه يبيها تطلع
طلعت شهد وخش نادر وسكر الباب بالمفتاح
ديما : هبببببلت انت 😡
نادر قرب : اي هبلت
ديما توخر : اقسم بالله نعيط ونادي ماما زي هداكا اليوم
نادر يقرب منها : تؤتؤ ماديريهاش
ديما : ماااا...
نادر سكرلها فمها بيده : اششش يامجنونة
ديما فمها مسكر : امممممممم اممم
نادر : بنحي ايدي ولو عيطي حنسكرلك فمك بطريقة تانية....وغمزلها : فهمك كفاية
حول نادر ايده بهدوء وديما تشبحله بغل
نادر : في كلام لازم نفهمهولك ياديما
ديما : مانبيش نفهم شي ومانبيش ندوي معاك من الاصل
نادر : ماسألتكش تبي ولا ماتبيش
ديما تحركت بغل وبتطلع شدها نادر من خصرها ودفها ع الحيط بطريقة غجرية وحاصرها بيديه
نادر : كله صار غصبا عني
ديما : ماقتلكش بررلي
نادر : لكن لازم تفهمي
ديما : ع فكرة انت توا في حياتي ولا شي وامورك كلها ماتعنينيش 😏
نادر : تكدبي علي روحك ولا عليا....؛ قرب منها : استاحشتك ❤
ديما تحاول تبعده بايدها وهو يزيد يقرب
ديما : بععددد
نادر : مافي شي صار بإيرادتي علاش ماتبيش تتفهمي
ديما : شن بنتفهم وانت خطبت وفات فيك...وحتى لو بررتلي وفهمتني شن يفرق
نادر : يفرق اني مانبيكش تشوفي اني سيبتك وكدبت عليك
ديما : هه😏 لكن انت سيبتني وهدا اللي صار....بارادتك او غصب عنك مايهمنيش
نادر : كيف مايهمكش
ديما : حول بنطلع
نادر حول ايديه وخلالها طريق وطلعت ديما وهو قعد يتبع فيها بعيونه
°
•
°
•
°
☀️⛅
انور : خلاص اني بأدن الله نهدرز معاهم ونحددو موعد نديرو فضانية وتلبيسة
بابا : باهي انشالله
انور : هي نتلاقو علي خير
بابا : انشالله....بالسلامة
ايناس : هدا خو جميلة
بابا : اي
ايناس : خيره
بابا : قال بيحددو يوم فضانية وتلبيسة مع بعض
ايناس ابتسمت بفرحة : مليييح بكل
اني خشيت : شن هو اللي مليح انشالله خير
ايناس شبحتلي: فضانية نادر
اني : به كويس😑
~~
~~
اني : اي نسمع في بابا يكلم في خالك
مريم : اي اهو عندنا هو خالي
اني : ربي يقدم اللي فيه الخير
مريم تنهدت: انشالله
اني : ماتزعليش روحك كلها نصيبات
مريم غاصرتها العبرة : هدا هوا 💔
" سكرت مريم مني وتلوحت ع السرير وعيونها مليانات دموع...وتفكر كيف بتتعايش مع نادر كيف بتكمل حياتها معاه كيف بترقد معاه وبتقدر تتأقلم او لا...كيف تقتنع انه حيكون جوزها وهي اللي ماتشوفش فيه اكتر من خوها....كيف حتنسى احمد وشن بيصير فيها لما تسمع انه خطب وبعدها تسمع بعرسه...كيف حتشوف وحدة لابسة الابيض ويزفو فيها لاحمد في مكانها كيف بتمشي لعرس ضيفة في الوقت اللي كانت تحلم انها هي العروسة....سكرت مريم عيونها ونزلت منها دمعة حارة 💔
~~
مراد : السلام عليكم
انور : وعليكم السلام
مراد : اووو خالي عندنا
انور : اي في موضوع بنهدرزو فيه
مراد : انشالله خير
جميلة : خالك هدرز هو وعمك علي وبنديرو فضانية وتلبيسة مرة وحدة شن رايك
مراد : مش كانو مايبوش شي كبير حوش عمي
انور : اني هدرزت مع عمك واقنعته
مراد : به ميه ميه
انور : قلت لامك كان هدا نديروها الخميس الجاي لا اللي بعده شن رايك
مراد : اي كويس انظمو امورنا في الاسبوعين هادو
انور : خلاص تو نرد علي عمك اني
مراد : حلينا يام خيرك مقعمزة
جميلة : انت ماتفكر غير ف بطنك
مراد : يامرييييم ديري قهوة
°
•
°
•
°
عمر : اتخدت قرار وقرار نهائي
سراج : بخصوص شني
عمر : داليا
سراج شبحله : ربك يستر...شن هوا القرار
عمر : بنتجوزها
سراج : شن هيااااااا😨
عمر : نقص صوتك يا###
سراج : تي مش قلت مريضة
عمر : اي وكان مريضة
سراج : قصدي انت قاعد تحبها ولا غر سخفت عليها
عمر : نحبها....بجديات نحبها فوق ماتتصور
سراج : ومرتك وبنتك...وبتقسم روحك اهني ولا غادي وبعدين هي لما صحيحة ماتجوزتهاش توا خطرلك
عمر : علاش انت لو حبيت وحبيبتك مرضت تفوتها
سراج : اني ماقتلكش فوتها لان مريضة..لكن علاش توا...خديتها قبل ماتتجوز ولا ع الاقل قبل ماتجيب بنت
عمر : شن الفرق
سراج : الفرق ان لو مرتك عرفت توقع تطلق وتقعد بنتك متشردة
عمر : مش حتعرف مرتي...مش حيعرف حد
سراج : شن تحسابها ساهلة انت
عمر : اني بنتجوزها وهدا اللي عندي
سراج هز راسه وسكت
°
•
°
•
°
ماما : من جابك من الجامعة
اني : بابا
ماما : شن جو قرايتك ماشية تمام
اني : اي ميه ميه
تررررن ترررن 📱
كنت شادة تلفوني وشرين في ايدي اني توترت لا اراديا لان سراج يتصل وماما قعدت تشوف لملامحي...درته صامت وحطيته في الشنطة
ماما: ردي😏
اني : ااا تسنيم تو نكلمها بعدين
ماما شدتني من فنيليتي بصوابعها بطريقة استحقار : اني مش عيلة وماديريش روحك تفوتي فيه عليااا باهي
اني : قصدي ماما نرد مانردش حاجة تخصني ره
ماما : باهي حاجة تخصك واني مالياش علاقة بري خوديه ولد فريال لكن لا اني امك ولا تعرفيني وردي بالك مزال تتصلي بيا ولا ادوريني باهي...حاجة وحدة لما بتروحي طقي علي باب داري بش نطلع
مشت ماما لدارها وسكرت الباب...اني عيوني تعبو دموع وكرهت روحي
مشيت جيهة دارها وطقيت ع الباب وبعدين مشيت...طلعت من دارها مالقتنيش
~~
خديت تاكسي وروحت والطريق كلها واني نبكي ونفسيتي تعبت...حسيت روحي مالياش مكان في الدنيا هده بكل...كل ماتصير حاجة بنفرح بيها يجي حد ويخربها...كأن ربي حاطهم كلهم بش ينكدو عليا ويكرهوني في عيشتي 💔
°
•
°
•
°
مسرة : اسمعي
هيام: نعم
مسرة : البوست اللي نزلتيه امس ودرتيلنا تاق
هيام : اي خيره
مسرة : في ولد معلق فيه مركه من هوا
هيام : هههههه اللي تعاركتي انتي وياه😂
مسرة : اي شفتيها العركة
هيام : اي تعرفي قعدت نقرا وميته بالضحك😂😂
مسرة : والله الا شي يدره الكبد مش يضحك
هيام : جو كيف يلقح هوا
مسرة : تي من هوا قصدي من وين تعرفيه
هيام : مانعرفاش اني
مسرة : امالا علاش معلقلك ع البوست
هيام : ياغبو مش اني دايرة تاق حتى لبنات خالتي
مسرة : اي
هيام : هو صديق هناء بنت خالتي
مسرة : اها
°
•
°
•
°
سراج : خيرك ماترديش من الصبح نتصل😠
اني : سراج تعبانة ونبي نرقد 💔
سراج : تعبانة ؟ 😒
اني : اي...تصبح ع خير
سراج : تو اني من الصبح حارق دمي ومشغول عليك ولما تردي تقوليلي تعبانة
اني : اهو اطمنت مافي شي يستاهل انك تنشغل
سراج : باهي تمام...اسف ع الازعاج
اني : باي
سراج سكر الخط
اتكيت وغاصرتني العبرة وفي حاجة مكمودة في قلبي حاسة كأن غمه في قلبي...
قعدت نحاول نرقد وماباش يجيني النوم والافكار تاخد فيا وتجيب...ولما فكرت لقيت ان الكل يفكرو ف مصلحتهم واولهم ماما..كل همها ان فريال ماتناسبهاش وانها ماتختلطش بالعيلة تاني ومافكرتش في مشاعري ونفسيتي وماهمهاش الشي هدا
و لقيت ان الانسان الوحيد اللي مايفكرش في مصلحته هو سراج ❤...الانسان الوحيد اللي نعرف في قيمة نفسي لما نكون معاه يحسس فيا اني ليا اهمية في هالحياة ينسي فيا ف الهموم والكآبه...به اني نحبه هم علاش يتدخلو...علاش بديخربو في فرحتي في شن غلطت فيهم...ماطلبتش الا اني نكون مع الشخص اللي نحبه...ماطلبتش طلب صعب وحتى هالشي مستخصرينه فيا
قعدت نفكر ودموعي مابوش يقفو ومالقيتش روحي الا متصلة بسراج وطبعا رد طول مع انه المفروض يكون زعلان و مضايق من اللي درته
سراج : نعم 😑
اني : نحبك اني😢
سراج نبرة صوته تغيرت : مجنونة انتي ؟؟
اني : اسفة
سراج : علي شني
اني : ع اللي صار قبل شوية
سراج : خيرك تبكي
اني : تعبااانة ياسراج 😢
سراج : اششش ياعيون سراج انتي معاش تبكي
اني : بجديات تعبانة
سراج : من شني حبيبي 💔
اني : من كل شي 😢
سراج : حتى مني ؟
اني : تؤتؤ ❤ نرتاح لما نتكلم معاك
سراج : به احكيلي شن متعبك
اني : لالا خلي نحكو في موضوع تاني...
سراج ضحك: حاضر ❤
اني ابتسمت : تحبني
سراج : نموت في الارض اللي تمشي عليها
اني ضحكت
سراج : نجيهولي اللي يضحك... لونتي الدموع اللي ينزلو من عيونك غاليات ماتنزليهمش بالساهل...معاش تبكي
اني ساكتة ونسمع
سراج : تسمعي فيا
اني : امم
سراج : نحبك
اني : حتى اني
سراج : مش زيني
اني : اكتر
سراج : ماتحاوليش حتى تقارني لعلمك❤
اني : ممكن مانقدرش نقول كلام حلو زيك لكن متأكدة اني اللي في قلبي اتجاهك اكتر من اي شخص حب في الدنيا
سراج : واني متأكد ان لو في شي يقيس مستوى الحب اللي في قلب الشخص حيلقو ان اللي في قلبي اضاعف اللي ف قلبك مية مرة
اني : انت مية لكن اني ماينعدش 🙄
سراج : قد مايكون حبك اني ضعفه بمية مرة
°
•
°
•
°
☀️⛅
اني : يعني معاش مزال هلبا
تسنيم : اي تعرفي مشنوقة وكل يوم نطلع...خايفة مانلحقش
اني : تلحقي تلحقي انشالله..انتو خيركم استعجلتو فجأة
تسنيم : ماهو نبو نديروه قبل العيد
اني : ايااا علاش الاستعجال حتى بعد العيد عادي
تسنيم : عمتك وقيس يبو توا وبوه يكلم في بابا
اني : معاش قادر يصبر الاخ 😂
تسنيم : شوره😂
اني : تحشمي ياصايعة 😒
~~
~~
نادر : الخميس ؟؟
بابا : اي الخميس انشالله
نادر تنهد : باهي كويس
بابا : تقول فضانية ولد الجيران مش انت😒.....حتى ابتسامة مافيش
نادر : واخدلي وحدة بالسيف عليا وتبيني حتى نبتسم تي اني بارك الله فيا كان عاملتها كويس
°
•
°
•
°
🌒
ميرا : باهي كويس...والعرس امتى
مراد : مزال مادويناش فيه
ميرا : اها
مراد : مستاحشك اني ❤
ميرا ضحكت : حتى اني
مراد : اي وين نتلاقو هي
ميرا : نعرفش
مراد : امتى فاضية انتي
ميرا : اممممم يوم الاتنين ماعندي شي شن رايك نتلاقو....ولا انت مشغول
مراد : حتى مشغول نفضالك
ميرا : هههه ❤
~~
~~
رنا : ماتبيش تتعشى
محمد : تعشيت لوطا
رنا : به يعني كل يوم بتتعشى لوطا ؟؟...معاش نتعب روحي وندير عشي ؟
محمد : لا عادي كولي انتي
رنا شبحتله ومشت
محمد : اسمعيي
رنا : نعم😑
محمد : ماشي لتركيا التلات الجاي اني ره
رنا : به !
محمد : اي قلت نقولك ان بتقعدي يومين ولا تلاته بروحك
رنا : لا بنمشي لحوش اماليا
محمد قعد ساكت
~~
~~
أحمد كان مقعمز قدام البحر ف سيارته وتمر قدامه كل الدكريات اللي عاشها مع مريم....وكيف حتبدا مريم لغيره بيغازلها وبيدلعها وبتحبه زي ماكانت تحب احمد...قعد يفكر كيف الصغار اللي يستنى فيهم منها حيبدو صغار نادر ومريم بتبدا تنتمي لنادر وانه حيكون حتى التفكير فيها خيانة 💔
~~
~~
سراج : اي قالي مراد
اني: مش عارف كيف ماقدرتش نستوعب ان مريم ونادر مع بعض
سراج : شن رايك بنقترح عليك موضوع
اني : انشالله خير
سراج : في شخص واحد ممكن يفهم مراد القصة ويقوله ان احمد يبي مريم وتنحل من غير مشاكل
اني : بجديااات 😮...مني ؟
سراج : ....
🌷يتبع🌷
هااي فانزي استاحشتكم ، وانتو اكيد استاحشتو الرواية
لكن مع الاسف 💔 الفترة هده صعب جدا اني انزل لان قراية وضروف....مضغوطة هلبا يادوب قدرت نكتبلكم الحلقة هده
فبنقوللكم ان المدة اهيا مانوعدكمش اني نزل
انشالله كل مانلقى وقت فراغ نحاول نكتبلكم حلقة خليكم ف الانتظار😊😘 وقرآة ممتعة
.
.
#ادمونتكم_تيمو💓
