__وتين__🍃
🌷الحلقة 63🌷
هيام : لابسة عريااان 😨😳
مسرة : اي 😭
هيام : غر خلاص معاش تبكي تو نكلم هناء بنت خالتي تكلمه
مسرة : ايااا والله هدا الا واحد حقير شكله ماينفع معاه كلام
هيام : احني نكلموها شن خاسرين
°
•
°
•
°
جي سراج وجايب معاه وجبات ، مد لرتاج وتسنيم كيسة والكيسة التانية جي قعمز ع حاشية السرير وقعد يفتح فيها
اني : مش حناكل اتعب في روحك ع الفاضي 🤢
سراج : خيرنا عاااد
رتاج وتسنيم يشبحوله ومبتسمات
اني : اففف
سراج شبحلهم : تفاهمولي معاها كان تقدرو😑
تسنيم : اني نقنع ايهودي يستسلم ومانقنعش ليال بحاجة ماتبيهاش😂😂
رتاج : 😂😂😂حتى اني
سراج غمزلي : اهو اني قنعتها بهلبا حاجات😜....معناها نقدر نخلي الكافرين كلهم يستسلمو😂
رتاج : لا من الناحية هده عندك حق في هلبا حاجات كانت تكرهها 😂😂 اولهم انت
اني : ههههه 😂
سراج: ضحكاتك😒
تسنيم : خلاص كولي قبل ما يبرد
اني : نبيييش😷
تسنيم : هيااا عاد بلا ببي و دلع زايد
سراج شبح لتسنيم : هييي خيرك تكشخي عليها😒
تسنيم : مش تبينا نقنعوها
سراج : بلاش منها اقناعاتك...تو نوكلها بطريقتي
رتاج : معناها نطلعو احني😂😂
سراج ضحك : لا غر الهو ف روحكم بس
اني قعدت نضحك
°
•
°
•
°
☀️⛅
ماما : صباح الخير
احني : صباح النور
ماما : شن حالك اليوم
اني : احسن
رتاج : لا صحصحت اليوم مشالله عليها
ماما: باهي الحمد لله.....تسنيم وين ؟
رتاج : كيف روحت
ماما تلفتت وراها شافت الطاولة فوقها الماكلة اللي جابها سراج لبارح : شني هدا 😞
رتاج : ااا هه هدا احني طلعنا جبنا عشي البارح
ماما : اه
الدكتورة : صباح الخير
الكل : صباح النور
الدكتورة : شني الباين احسن اليوم 😊
اني : اي الحمد لله
ماما : طلعو التحاليل دكتورة ؟
الدكتورة جت جنب ماما وكلمتها بالشوية
ماما : به تمام
~~
ترررن تررررن 📱
اني : الو
بابا : كيف حالك بنتي
اني : باهي الحمد لله
بابا : شني احسن اليوم
اني : اي
بابا : تو بعدين العشية نخطم عليك انشالله
اني : به تمام
°
•
°
•
°
مسرة : كلمتيها بنت خالتك
رهام : اي كلمتها...طلع هو حاكيلها عليك
مسرة : الله 😵شن قايلها😭
رهام : مابتش تحكيلي بالتفصيل لكن قتلي هو دماغه مسكر وعنايدي وهي مفروض مااستفزاتاش
مسرة: حتى هو استفزني التافه هذا
رهام : ياحمارة هدا ولد ومهما يكون مفروف مااديريلاش هكي...الولاد ماتعرفيش شن يفكرو 😒
مسرة : كيف ندير توا 😢
رهام : تو تكلمه هي
مسرة : بنت خالتك ؟؟
رهام : اي...لان قتلي صديقي هلبا
مسرة : عليك صديق والله 😑
°
•
°
•
°
اني : بتروحي
رتاج : اي لولو ضروري نمشي
اني : به باي...تعبتك معاي😘
رتاج : تعب عينك ...باي
ماما كيف خشت : شني بتروحي
رتاج : اي جاني بابا
ماما : باهي صحيتي رتوجة
رتاج : ايااا علي شنو
اني : وين كنتي ماما
ماما : مع الدكتورة
اني : طلعو التحاليل
ماما : بعتوهم برا يوصلو بعد شهر
اني : شهر😮...شكله الموضوع كبير واني مانندريش
ماما : لا كبير لا سو
°
•
°
•
°
🌘
عمر : حتى اني مستاحشك موت 😍
داليا : امتى بتجي
عمر : الفترة هده مضغوط...لكن تو نحاول ندير هربة ❤ لان معاش قادر نصبر
داليا : ديرها بسرعة الهربة باهي
عمر : هههه انشالله
ديما : دير بالك علي روحك
عمر : وانتي اهتمي بصحتك وخدو الدوا في وقته
ديما : حاضر ❤ باي
سندس : شن ادير في البلكونة
عمر: شي...خيرك طلعتي في الصقع
سندس : نشوف فيك
عمر : تو نجي
سندس جت قربت منه وشدتله ايده بهدوء : لينا فترة بعاد علي بعض...واني استاحشتك❤
عمر تنهد : ااا اني تعبان نبي نرقد
~~
~~
قيس : حسيته موعد العرس عطل الهم
تسنيم : ههه تو دورة نلقوه جي وتم
قيس : ووليتي متاعي 😍
تسنيم ضحكت
قيس : انشالله ربي ينزل عليا الصبر بسسس❤
~~
~~
اني : وين انت
سراج : في الحوش....مزال مادارولكش خروج
اني : غدوا
سراج : اه...بتروحي لحوش بوك
اني : لا بنروح مع ماما...لين نصحصح كويس
سراج : ايااا😑😑
اني : هههه خيرك
سراج : معناها مستحيل نقدر نشوفك
اني : اممم
سراج : باهي ماتعطليش عندها
اني : به
سراج : نحبك ❤
اني : حتى اني ❤
سراج: حتى انتِ شني
اني : ههه حتى اني نحبك💕
سراج : حبيبي
اني : همم
سراج : بنهدرز معاك في موضوع
اني انشالله خير 😞
سراج تنهد وسكت
اني : موضوع بخصوص شنو
سراج : موضوعك انتي ورنا
اني : ااه ...والله ياريت مانتكلمو فيها القصة هده😑
سراج : ياريت...لكن لازم نتكلمو...قصدي صح رنا غلطة فيك و..
اني قصيت علي كلامه : مش غلطة فيا بس...خلت كرامتي في الارض ولو تفكر تقولي نكلمها ولا حاجة زي هده حنعتبر انك درت زيها
سراج : غر هدي اعصابك خيرك ولعتي😂
اني : نفهم فيك بس 😒
سراج : به قصدي بتقعدو متعاديين لامتى
اني : عادي مش هامني انشالله حتى للابد
سراج : به لو اعتدرت منك
اني : سراج جوي رايق وماعنديش نية انكد ره
سراج : باهي نهدرزو عادي😒
اني : هدرز في حاجة تانية
سراج : تمام...اني بنسكر باهي لكن بنقولك كلمتين فكري فيهم من اهني للصبح....اني جتني امك لخدمتي وقالت كلام ورب العزة كان قالاته مرا تانية لما نمسح بيها الارض والمشكلة مادوتش مرة مادوتش اتنين كل ماتشوفني تعاود نفس السيناريو ومفيش مرة غلطت فيها...كله بش حضرت جنابك ترضي ووين ماتنوضي تقوليلي ماما ماتتكلمش عليها و ماما خط احمر وماما وماما...وانتِ مادرتيليش اي اعتبار ولا فكرتي تاخدي وتعطي علي عيوني اني...
المهم براحتك مانقدرش نقولك ديري شي بالسيف...سلام
◇ ◇ ◇ ◇ ◇ ◇ ◇
ماقلتش ولا كلمة لين سمعت الخط فصل حطيت التلفون وحطيت راسي ع المخدة ونزلت دمعتي من غير مانحس...💔
رنا غلطت فيا هلبا وهانتلي كرامتي مع اني عاملتها كويس ولو وحدة غيري كانت فضحتها....
المشكلة ان سراج عنده حق...هو دار هلبا حاجات علي خاطري وعلي قد ماسمع من كلام فوت وما دورش بش يرضيني لكن حتى كرامتي ليها دور 😔
°
•
°
•
°
☀️⛅
تسنيم : صباااحو
قيس : صباح الورد ياوردتي💕
تسنيم : شن الجو حياتي
قيس : بعد ماسمعت صوتك ولا كويس
طاحت الكلمة في ودن عمتي وهي تكنس قدام دار قيس : الله الله ع الحب
قيس تحشم وجهه ولا احمر
تسنيم : سمعت صوت امك
قيس : بعدين نكلمك ...وسكر عليها
°
•
°
•
°
هناء: قصدي ياوليد عيب اللي درته 😑
وليد : خيرك حارقة دمك تقول اختك 😂😂
هناء : لان بنت ناس حرام هكي
وليد : ياتافهة تعرفيني اني شن هو اللي بنديرهولها
هناء : به امسحها صورتها
وليد : مستاحشها علي اساس اني...تي مشنا منظرها الزح
هناء: به بتمسح صورة البنت ولا شني
وليد : ولا شني 😂😂
هناء: خيرك هكي😠
وليد : ياهناء اني تعرفيني والله ماعندي فيه الجو هدا ولا عمري فكرت نبتز بنت لكن هي وحدة امسخة ووقحة واني مايمشيش معاي الجو هدا
هناء : تي شن دخلك فيها انت لاش تكلم فيها اصلا
وليد : ماكلمتهاش هي كلمتني ولما درتلها الاستكراد حطتني في الحظر
هناء: به افتكيت منها
وليد : لالا نفتك منها بطريقتي مش هي تحظرني
هناء : ااخ وخلاص 😪
وليد : تي فوتيها تو ندرهلها كبدها شوية ونفوتها
هناء : لا فوتها خلاص درهتلها كبدها بمافيه الكفاية
°
•
°
•
°
ترررن ترررن📱
رنا : الو
سالمة: صباح الخير بنتي
رنا : صباح النور عمتي😑
سالمة : وراس بنتي انزلي ديري فطور لعمك غر مودة مهناش واني رجليا بنيتي
رنا اتمتم بالشوية : النهار الحرف الاسود العيلة اللي بلاني بيها ربي 😡
محمد من الدار : خيرهااا امي
رنا : تبيني ننزل ندير فطور 😑
محمد : علاش مودة وين
رنا : مهناش
~~
سالمة : اهو بتنزل رنا ادير الفطور
مرتضى : باهي غر بسرعة وراي خدمة
بوه : حسه الباب يطق
فتح مرتضى الباب : اووو اهلا
مرام : اهلين شن الاخبار
سالمة : وين الصغار
مرام : ينزلو في الساكو من السيارة...😥
مرتضى : بايتة شكلك
مرام : اي راجلي ماسك
رنا : السلام عليكم
الكل رد السلام
رنا : كيف حالك مرام
مرام : باهي كويس
سالمة : خشي بنيتي ديري صفيرة ونبي
رنا : باهي هي
مرام شهقت : هييي...قعدين مافطرتوش😮
سالمة : اي اختك مودة مهناش
مرام بصوت عالي : وشني كان مودة مهناش تموتو بالشر 😒
كان محمد نازل في الدروش ويسمع فيهم
رنا : اهو بندير فطور
مرام : وناقص غر ماديريش...المفروض نازلة من بكري ومدايرة لبوي الفطور مش توا 😒
رنا ملامحها تغيرت : ع فكرة حتى خواتي مايدووش معاي بالاسلوب هدا واني نازلة بأرادتي مش لين تأمريني انتي 😒
سالمة : خيركم اللطف صبح
مرام بصوت عالي : احترمي نفسك سلم ماما وادوي كويس
خش محمد : خير جد امك اناي جيتي زي الشيطان 😠
مرام : شوف مرتك اللفعة اللي تبي رباية وبعدين تعالى كلمني
رنا شبحت لمرام : انتي تكرهيني شي يرجعلك لكن اني مش مستعدة نتحمل دوتك كل ماتجي ره
وركبت رنا وخانقتها العبرة ومحمد يتبع فيها بعيونه
بو محمد : خيرك ع البنت انتي😡
مرتضى : ماخيرها شي...عادي حماتها الكبيرة كلمتهما ومفروض ماتعليش صوتها
محمد قعد ساكت وبعدين طلع وقربع الباب بقوة
~~
ركب محمد لحوشه يسمع فيها تبكي قعد واقف قدام باب دار النوم ويشبحلها وهي مقعمزة ومنزلة راسها وتبكي
يقرب خطوة ويوخر خطوتين...
ومش قادر يقرب ويواسيها ولا قادر حتى يكلمها...اكتفي بأنه يشبحلها بحزن من غير اي كلمة 💔
