#__وتين__🍃
🌷الحلقة 78🌷
داليا بعدتله وجهه شويه وحطت خشمها ع خشمه : عندي ليك خبر حلووو
عمر : خبر شنو ؟؟
داليا حطتله ايده ع بطنها وشبحت لبطنها وضحكت
عمر نصدم 😮 : حامل
داليا هزت راسها بمعنى اي
عمر مصدوم ومش عارف يفرح لان جايه بيبي من الانسانه اللي يعشقها ولا يحزن ع اللي بيصيرله من مشاكل في ليبيا قعد واقف يشبحلها وساكت
داليا تلاشت الابتسامة من ع وجهها: مافرحتش
عمر : قداش ليك؟
داليا: ليا اسبوعين وشوية
عمر : ومرضك..عادي مايأترش
داليا تلخبطت وتوترت وبان الحزن ع عيونها : عمر مانبؤش اي عدر....حنجيبه البيبي😢
عمر : لكن...
داليا قطعت ع كلامه وحطت ايدها ع بطنها: هدا فرحتي في الدنيا وماتكونش انت سبب في نزع هالفرحة😢💔
وخشت لدارها تبكي
قعد عمر مقعمز وحاط ايديه ع وجهه ويفكر
" اااخ ياربي كيف بنتصرف وشن بندير....حرام نجبرها اطيحه حتى هي ليها حق تفرح وتحس الشعور زي اي مرا....لكن العيلة وسندس ومرض داليا....افففف "
°
•
°
•
°
☀️⛅
رتاج : اسمعي بنطلب منك طلب لولو
اني : شنو
رتاج : ماتحسسيش خالك انك تندري ع القصة
اني : اي اكيد مش حنحسسه....اصلا لو حس اني نعرف حياخد فكرة مش حلوا عليا اني وياك
رتاج : اي صح خلاص موضوع وانتهي 💔
اني : ماتقوليش هكي...كل شي نصيب ماتعرفيش نصيبك وين
ضحكت رتاج بهزوة والحزن في عيونها💔
رتاج البنت اللي كلها فرفشة وضحك وجوها حلو💛 وضحكتها ماتمشيش من ع فمها...اول مرة نشوفها بالحالة هده...البسمة مسحوبة من ع شفافها والضحكة اللي ديما ف عيونها غايبة....كانت الكآبة مسحويا ملامحها البريئة 🖤 والحزن لابسها بالكامل...
رغم ان فسخت خطوبتها قبل والشخص اللي وثقت فيه طلع ماينفعش بس ماكانتش بكل هالحزن هدا😢
ماعرفتش كيف نواسيها ماعرفتش اصلا شن نقول
صعب الحب 💔 بجد صعب بمعنى الكلمة واني مجربة عدابه 💔
~~
~~
جاني بابا روح بيا من حوش رتاج وبيرفعني لحوش جدي لان صفاء جاية زايرة
بابا : امتى بتبدى قرايتك
اني : مزال
بابا : صار راحة
اني :هههه اي راحة
شوية وشرين تلفوني رديت
اني : الو ماما
اول ماقلت ماما بابا سكر المسجل وبدي هدوء في السيارة ولما تتكلم ماما صوتها واضح كأني فاتحة مايك 🔊
ماما : وينك عطلتي
اني : اهو قريب نوصل
ماما : من جايبك
اني : بابا
بابا يسمع في صوتها ويحاول ايدرق ابتسامته
" صوتها...اسلوبها...طريقة دوتها هي نفسها 💕 ماغيرهاش الزمان بكل....مش عارف كيف ماكنتش مركز عليها من قبل "
°
•
°
•
°
احمد : اركب تغدى
سراج : مانبي شي فوتني بالله عليك😑
احمد : ليال روحت ره
سراج : مش جعان ياأحمد مانبي شي
احمد : باهي اهو مخلينلك غداك امتى ماتبي اركب المهم ليال روحت
سراج : به
~~
مريم : ااه بنرجع 🤢
جميلة شدتها من يدهت : تعالي للحمام بسرعه
مريم خشت للحمام
احمد : شن قصتها هده ماتاكل ف شي واللي تاكله ترده
جميلة : والله مافهمت خيرها هالبنت😔...جبت مراد وجبتها هي وماصرليش هدا كله
احمد : قصدك حالتها مش طبيعية😯
جميلة تنهدت : والله ماني عارفة ياولدي
°
•
°
•
°
🌒
خش محمد لقي رنا متكيه في سريرها وتبربش ف التلفون...ماشبحلهاش بكل...فتح الدولاب طلع حوايجه وطلع خش للحمام بدل واتكى ع الصالون
" طبعا هو كان يرقد جنبها ع السرير لكن من بعد ماتعاركو رجع يرقد ع الصالون ويعامل فيها زي اول ماتجوزو 🖤 "
رنا :" زعما انوض نحطله عشي 😶...ولا نفوته...اففف اني غلطت لما قلتله خوك خناب 💔...لكن هو خوه خناب هدا الواقع😒 لكن هو شن دخله ؛ اني جرحته بالكلام هلبا ؛ زعما نتأسف منه 🙁 اي مفروض نتأسف...لكن حتى هو حقير وحيوان ويعامل فيا بمزاجه😡 كل مرة نوصلو للحظات حلوا 💓وهو يتراجع😑...
كل مرة يشبحلي ويحسس فيا بحاجات حلو ولما نستسلمله يفوتني💔 معقولة لينا شهور متجوزين ولتوا مامسنيش...لكن اني السبب😔 اني صديته هلبا في البداية ؛ لكن عادي اني البنت ومفروض يترجاني 😒 مش يفوتني هكي "
°
•
°
•
°
وصلت لحوش جدي نزلت من السيارة وقعد بابا مدرس ويشبح للباب لين فتحولي وخشيت...
قعزنا وهدرزنا وجو قنين وخلاتي كلهم وجي مطلب نكد عليا بشبحاته 😑 وبعدين خش عبسي وقعدنا نهدرزو وموضوع جاب موضوع لين لقينا روحنا نهدرزو ع الخطبة والجواز
ماما : اني مانرتاحش لين عبسي يجبلي وحدة تونسني
عبسي ياكل : من طيبها الرشدة حلوا
ماما : خزي عليك 😒
شهد : خالي نخطبلك صاحبتي😁 حلوا
اني : هو غر يوافق بسس وكتر ربي غير الحلوات 😜
عبسي شبحلي : علاش عندك وحدة معينة 😏
طبعا زبطته يلقح علي رتاج ودرت روحي عبيطة وعرفت نمثل🙈😜
اني : شوووق بنات
عبسي : ترا سميلي وحدة متلا
اني : امممم🤔...ونطيتله...عندي وحدة😀 اسمها ميسون تهبببل تعرف
عبسي : نوضي قيمي الصفرة نوضي😒
اني : الحق مش فيك...في اللي يدورولك في عرايس😑
خ ليلى : فوتيه فوتيه هدا مش وجه جواز
°
•
°
•
°
وليد : ماهدرزتيليش علي عيلتك بكل انتي
مسرة : شن تبي نهدرزلك بالزبط😊
وليد: خوتك امك وبوك وشن رقمك في العيلة
مسرة : امممم...عندي 3 خوت اولهم ولد وبعده اني وبعده بنت وبعدها بنت
وليد : عندك خو كبير 😮
مسرة : اي نادر اسمه...هو خوي من بوي
وليد : بوك متجوز زوز
مسرة : لا امهم مطلقة و........حكتله ع قصة العيلة كلها
~~
~~
بعد ماروحت من حوش جدي وضحكت وهدرزت وغيرت جوي.....كالعادة قعمزت ع سريري وهارب مني النوم 💔 افكار ادور في راسي ومواضيع وقصص شاغلتني....وعنوان هالمواضيع سراج💔...نحبه 😢 نحبه ياربي نحبه....كيف بنعيش من غيره كييييف😣كيف بنكمل حياتي وكيف بنتحمل لما يجو يقولولي خطب...وبعدها دار فضانية وبعدها تجوز 😭 كيف بنتقبل فكرة انه مع بنت تانية...يغازل فيها يقوللها الكلام اللي يقولي فيه😭 كيف بتقبل ان تجي وحدة تغار عليه مني...لا والاسوأ ان لو يكون معاي يعني يخون فيها....كيف بنتحمل لما يقولو سراج جاه بيبي😭 كيف بنصبر بلاه كيييف ياربي كيف😭
