#__وتين__🍃
🌷الحلقة 85🌷
فريال : في موضوع ضروري ندوي معاك فيه
ماما : اللي هوا
فريال : بنتك 😏
خشت فريال قعمزت في المربوعة وملامح وجها ماتبشرش بالخير...وحاطة في راسها ان ماما تبيني ناخد سراج...ماتندريش عليها حتى هي رافضة الموضوع
ماما حطت رجل ع رجل : خيرها بنتي
فريال : اسمعي هما كلمتين لابعدهم لا قبلهم بعدي علي ولدي انتي وبنتك....لان اني ممكن ندير اي شي علي خاطر صغاري....ديريها في راسك ندير ايي شي 😏
ماما : هههههههه شنو شنو 😏...ياماما بنتي فايتته ليها قداش ره ....ومنحياته من راسها
فريال : لا لا ماتفوتيشي عليا 😒 ولو تحسابي الخطبة هده حتصير نفهمك ان حلم تحلمي بيه انتي وبنتك ره وحتفيقو منه في اقرب وقت انشالله 😊
ماما : خخ خطبة شني😨
فريال : خطبت شني ؟😏
ماما : اسمعي اسمعي اني بالك تحسابيني راضيتلها تاخده....لعلمك ولدك فوق الخمسة مرات نكلم فيه وبالك يستحي ويخليها فحالها لالا معشش فيها تقول مافي غير هيا بنات....واني لانندري علي خطبة لا شي وكانك انتي رافضة اني رافضة ونص ولو اخر بنادم في الدنيا مانخليها تاخده
فريال : اني ولدي راجل مصنع امنع مانقدرش نحكم فيه في الاخير بكل يتجوز حتى بالدرقة واني مانندريش لكن بنتك انتي ربيها واحكمي فيها وبعديها علي طريق ولدي لان....
ماما قصت ع كلامها : لا ياماما لا اني بنتي نحكم فيها لما قدام عيوني لكن هي الله غالب عايشة بعيدة عليا واللي يصير كله مانندريش عليه ولو كانت عايشة معاي قسما بالله مايحلم يمس شعرة منها 😏لو كان تطبق السمي ع الارض 😡
فريال : باهي كويس انتي اخدمي من عندك واني نخدم من عندي وكل وحدة تحكم ف عيلها
ماما : لعلمك اني مشيتله في خدمته ولدك وسمعته كلام بش يخليها في حالها ونحسابه بيعز نفسه ويقولي معاش نبيها لقيته شي يعاند فيا وخلاص يحسابني نلعب معاه
فريال : انتي خليك ف بنتك ب دس وبعديها علي طريقة😒واني نعرف كيف نتفاهم معاه
وكيف ناضت فريال بتروح
ماما : ولا نقولك...اني عندي حل
فريال تلفتتلها
ماما : اتصلي بليال وهزبيها وقوليلها اللي ف قلبك واجرحيها بالكلام انتو عاد فالحين فيه😏...بالك يجيب نتيجة
~~
درس بيا بابا قدام حوش جدي بالزبط وكيف نزلت فتحت ماما الباب وشبحها بابا وعبى عيونه منها والصدمة الكبرى لما طلعت فريال من الحوش
واني كيف ركبت من العتبة شبحتلي شبحة من فوق للوطا وضربتني بكتفها ومشت ودارت روحها ماشافتش بابا....ماما قعدت فاتحة الباب بش نخش وبعدين جت عينها ف عين بابا وكان يشبحلها بجرأة
خلتني خشيت وشبحتله زي الشبحة اللي دارتهالي فريال قبل شوية وقربعت الباب
~~
ماما خشتلي تعيط : خيييرك انتي😠...مش ناوية تتهني لين تجلطيني😠 لين تجيبيلي الضغط
اني انحي ف وشاحي ونشبحلها ومستغربة : شش شن في 😮
ماما : شن فييييي....شفتيها فريال ولاااا....جت مسحت بيا الارض وماخلت ماقالت وقريب اضاربت اني وياها (طبعا زادتها بهارات) وماخلت ماقلت عليا وعلييييك.....كله علي خاطر الفرخ سراج اللي ترعشي عليه انشالله ربي يرزيك فياااا وترتاحي باهي 😭 انشالله نموت وتفتكو مني وتعيشو زي ماتبو😭
قعمزت ع الصالون و قعدت...صبيت طاسة انية قربت منها بنشربها...ضربت الطاسة علي طول ايدها وتكسرت
..واستمرت في البكي والدوا....واني نسمع وخلاص وبعدين خشيت للكوجينة واتصلت ب بابا
اني : بابا بعدت ؟؟😢
بابا : علاش خيرك
اني : كانك قريب نبيك توليلي تروح بيا
بابا استغرب : علاش
اني : ماما عندها طلعة
بابا : باهي اهو جايك
°
•
°
•
°
نزلت مريم من حوشها لقت فريال كيف واصلة ودمها محروق
مريم : نزلت بكري مالقيتكش
فريال : اي كنت برا...توا كيف جيت
مريم حستها طايرتلها : اا ندير قهوة تشربي😁
فريال : تعملي فيا معروف حاسة راسي بينفجر 😡
مريم : باهي هي
خشت مريم للكوجينة وفريال اتصلت ببلسم وحكتلها اللي صار ومريم تسمع وبعدين جابت القهوة وجت جنبها وطبعا صوت بلسم واضح في التلفون
فريال : تي والله لما نوريهم اني
بلسم : خلاص مليح اللي امها ماتبيش...وزيدي كلميها انتي الفرخة😏
فريال : اي بنكلمها بنسمعها وسخ ودانها
بلسم : قوليلها كان عندك كرامة احني مانبوكش لولدنا وهزبيها يام
مريم تصب ف القهوة وتسمع
°
•
°
•
°
#بريطانيا
عمر خش للحوش
داليا : جيت حبيبي
عمر : جيت....وين سراج
داليا ضحكت : خوك يجي يرقد اهني بس...يوم كامل برا ههه
عمر يحول في دجاكته : هههه اي يهيج الاستاد.....
داليا جت تنحيله ف سوريته : شن صار معاك حبيبي
عمر : خديتلك ايجازة
داليا : نبي نستقيل بكل اني
عمر : علاش تستقيلي😮
داليا تنهدت : عمر اني قلتلك نبي نستقيل من البداية مش اجازة
عمر : تي باهي اهو اني نجي ديما اهني...تعالي معاي علاش تستقيلي
داليا وعيونها دابلات : معاش عندي خلوق للخدمة😔....وبعدين مش انت تخدم خلاص سادنا
عمر باسها ع جبينها : براحتك حياتي❤
°
•
°
•
°
في السيارة 🚗
بابا : شفت فريال طالعة من حوش جدك ولا يتهيألي
اني متكيا ع الروشن: اي هي اعتقد
بابا : شن ادير غادي
اني : اا مش عارفه ماسألتش ماما لقيتها مستعجلة بتطلع😳
بابا : غريبة 🤔
~~
وصلت للحوش واعصابي تعبانة....بدلت وصليت وظلمت الدار وخشيت بنرقد رن تلفوني
اني : الو
مريم : ايوا لونا شجو
اني : باهي شن جوك انتي
مريم : باهي...اسمعي باختصار بنقولك بتتصل بيك فريال مرت عمي ره وبديرلك جو مانبيكش لولدي والدوا هده...المهم انتي تفادي المشاكل وماترديش عليها
اني : من قالك انتي
مريم : نسمع فيها تهدرز هي وبلسم ومتعاركة هي وامك شكلها
اني : اي نعرف...باهي اللي قلتيلي ان بتتصل😶
مريم : اي فكيك ماترديش
اني : لالا مش حنرد...هما يديرو هكي بش يستفزوني اني والكلمة اللي نقولها يشدوها عليا
مريم : اي حااالة 😑
~~
سكرت من مريم ورقدت...نضت لقيت مكالمات من الخارج عرفته سراج
نزلت تعشيت وركبت لقيته يتصل رديت
اني : الو
سراج : حية 😑
اني : كنت راقدة
سراج : عشرين مكالمة مافقتيلهمش😒
اني : خلاص سراج اهو رديت ماتزيدنيش بالله عليك
سراج : ماهو قولي مانبيش نرد مش كنت راقدة
اني : لكن اني كنت راقدة مش مانبيش نرد خيرك هكي😡...شن نكدب عليك
سراج : تي باهي به
اني : باهي ايامك
سراج : يبي قصان لسانك
اني : انت مشكلجي شي طبيعي بنرد عليك
سراج : باهي شن جوك المهم
اني تنهدت : كويس...شن جوك انت
سراج : تمام...خيرك
اني : امتى بتروح💔
سراج : استاحشتيني😜
اني : هلبا ❤
سراج : اااخ ياقلبي قريب نركب اول طيارة ونجيك
اني : بجديات امتى بتجي
سراج : عن قريب
اني : حددلي يوم
سراج : لالا تو تتلفتي يوم تلقيني قدامك
اني ضحكت : به وين قاعد في فندق ؟
سراج : لا مع عمر
اني : علاش عمر وين قاعد
سراج ضحك : في حوشه...مستقر اكتر من ليبيا مشالله😂
اني : ههههه احسن ماداير كاني مكانه معاش نجي
سراج بهمس: نقولك سر
اني بنفس الطريقة : قول
سراج : متجوز وحتى قريب يجيه عيل
اني :😨😨
°
•
°
•
°
🌒
وليد : ااخ قداش مستاحشك يابنت❤
مسرة : اي واضح هلبا😑
وليد : وربي اللي ليك وحشة مش عادية
مسرة :باهي خيرا نتصل ماتردش😡
وليد : ياعمري انتي عارفة نظام شغلي تي والله مايجي الليل ونوصل للفراش لين يبدا جسمي مدقدق
مسرة : اها ع الحال هدا بننقطعو 😑
وليد : لا امهليني مدة صغيرونة بسسس ونجي لبوك نكلمه 💕
مسرة : انشالله 🙈😻
وليد : انشالله غر طبعه مش واعر 😂
مسرة : ههههه لالا مش هلبا....
وليد ضحك
مسرة : خلاص حبيبي كان بترقد عادي
وليد : والله مانقدرنرقد وعسلي زعلانة
مسرة ضحكت: مش زعلانة🙈💕
وليد : لالا مانبيش نرقد حتى اني مستاحشك❤
وليد : حقا ماحكيتيليش علي عيلتك بكل
مسرة : شن بنحكيلك
وليد : عندك عمام خوال وهكي
مسرة : عندي عم حي وعم متوفي وزوز عمات وخوال عندي هلبا 😂😂
وليد ضحك : عندهم ولاد😶
مسرة : اي مكدسين مشالله
وليد : تقولي فيها بكل برود 😑
مسرة : هدا الواقع...وزيادة قنينين بدات ولا عمامي😜
وليد : به فوتي الموضوع هي😒...قوليلي اختك كم مواليدها
مسرة : 95...علاش
وليد : قنينة مشالله عليها😊
مسرة : شن هيا😒
وليد ضحك : ياهبلة والله مافي نيتي حاجة وبعدين بتولي زي اختي
مسرة : علاش سألت ع مواليدها
وليد : تبي الحق عندي وليد صاحبي يخدم معاي وحالته كويسة ويدور في بنت...فكرت فيها قلت بالك تناسبه
مسرة : قنين هوا
وليد : عادي...لكن محترم هلبا
مسرة : علاش ماقلتش لغزل
وليد : غزل عاطيين فيها كلمة
مسرة : الله😀...لمنو
وليد : ولد صاحب بوي
مسرة : اها....حتى ليال شبه معطية فيها كلمة
وليد : والله..
مسرة : اي يبيها ولد عمي
وليد : باهي كل شي بالنصيب
مسرة : لكن عندي بنت عمتي مصلحة يعني مش حلوا ومش شينة كان تبي نكلمهم
وليد : شن اسمها
مسرة : نهى
وليد : خلاص عادي خلي نشوفه اني قبل ونرد عليك
°
•
°
•
°
ترررن تررر 📱
شفت التلفون لقيتها فريال ...تنهدت وحطيته ع الصامت وعاودت قريب 3 مرات مابيتش نرد
~~
~~
~~
فريال : اتصلت بيها المسخة ماتردش
بلسم : الله 😏...خافت
فريال : قريب نمشي لبوها نكلمه
بلسم : هييي😱...لالا فكينا بش بوي يقلب الدنيا بعدين
فريال : هالفانص هادي كان فيدي الموت نطلقها عليها😡
بلسم : مشي بوي كلم عمي؟
فريال : لا مامشاش وتو نزيد نعبيله راسه قبل مايجي سراج
بلسم : واااك يام انتي سراج خايفة منه تقول ابصر شنو😑
فريال تنهدت وسكتت
....
ع عبدالله: ياعيلة
فريال سكرت من بلسم وطلعتله : ايوا
ع عبدالله قعمز : شن الجو....وين عصوم
فريال قعمزت : ينسرف في الشارع
ع عبدالله: في عشي
فريال : اي دارت مريم فاصوليا بعتت
سكتت شوية وبعدين تكلمت
فريال : كلمته خوك 😒
ع عبدالله هز راسه بمعنى لا : مزال...قلت بالك نمشيله غدوا
فريال : مافهمتش علاش قاعد مصمم انت 😡
ع عبدالله: ولدك يبيها البنت يامرا افهمي...اني نبيه يستقر ونفتك منه ونرتاااح😠
فريال : باهي بنات الناس هلبا مالقيت كان هده😡...اني هده مانبيهاااش لولدي تخش هي نطلع اني ايوا
وخشت للكوجينة وقعد عمي يغلي
°
•
°
•
°
#كندا
تسنيم : بععد قيس صنتك افييييي 🤢
قيس : فددتيني انتي ره
تسنيم : ياقيس الصنة هده قتلك معاش تديرها ولا 😡
قيس : قبل ماتحملي كنتي تبخي فيها علي حوايجك اسكتي بلا كدب😑
تسنيم : اني نكدب😢...وخشت وقربعت باب الدار
قيس : صبرك ياربي 😑...ولحقها
قيس : ياسومتي والله ماقصدي لكن انتي...
تسنيم : بعععد من عليااا بعد صنتك زي الجيفة...نبي نروح لمالياا😭
قيس : ياتسنيم كلها مدة وتفوت وتلقي روحك جبتي ونضتي بالسلامة غر ماتنكديش بسس😑
تسنيم : انت منكدي مش اني😡
قيس : باهي اني منكدي غر معاش تتعصبي بس
°
•
°
•
°
☀️⛅
رتاج : صباح الخير
اني : صباح النور
رتاج : قداش عندك محاظرة اليوم؟
اني : زوز تعرفي نفخ😪
رتاج : امتى تطلعي
اني : الساعة #$ علاش تسألي
رتاج : اا شي 😁...قبل بنعزمك ع الفطور لكن تطلعي موخر😜
اني : احم احم اعزميني غدوا عادي😌
رتاج : باهي تمام
خشيت للمحاظرة التانية وراسي نتفخ وتعاركت اني والدكتور وطبعا اني الغالطة😑...المهم كيف طالعة من الكلية نلقى سراج متكي ع سيارته ويراجي فيا
حسيت انردتلي الروح لما شفته💕و ابتسامة ع وجهه حسستني بالحياة ولا اراديا لقيت روحي نضحك مع اني كنت منكدة من اللي صار امس وزيادة تعبانة من المحاضرات والقراية وعركتي مع الدكتور كله امتسح لما جت عيني في عينه ❤
أني: حييييي...الحمد الله ع السلامة😀
سراج مبتسم : الله يسلمك
اني : شن جوك شن اخبارك امتى جيت
سراج ضحك : اسألي بالسؤال 😂
اني ضحكت : امتى جيت
سراج تلفت وفتح باب السيارة : غر اركبي ونهدرزو في
السيارة
ركبت ومشينا للمكان الحلو هداكا 😍وقعدنا مقعمزين نهدرزو وخدالي كب كيك وعصير وهلبا حاجات زي البيبي حسيت روحي 😅
اني : شن الجو غادي
سراج : مليح بكل...
قمت حاجب واحد وشبحتله : انشالله غر بعدت ع المعاصي والذنوب😏
سراج يضحك : والله لو بتجي تشوفي هي مشيتي من الاساس معصية 😂
اني : 😒
سراج : مادرتش حاجة غلط ماتخافيش
اني : امتى روحت
سراج : توا مالياش ساعتين واصل
اني : مشيت للحوش
سراج : من المطار ليك انتي ❤
اني شبحتله وضحكت
°
•
°
•
°
ع عبدالله: شن صار في نساوينك
عمر : خيرهم😑
ع عبدالله: اللي غادي امتى بتجيبها واللي اهني امتى بتردها وامورك ملخبطة هكي مافهمت شي
عمر : تنحل تنحل انشالله
فريال : وين سراج
عمر : تو يجي
وعلي خشت سراج : السلام عليكم
فريال: اهلن اهلن حمدالله ع السلامة
عمر : ياعيني ياعيني ولدها جي😒
سراج سلم علي امه ويشبح لعمر : غايرة ياحلوا
عمر : 😒
خشت فريال ادير في الغدي وعمر طلع وناض سراج وبوه قعمزو في المربوعة بش امه ماتسمعش
سراج : شن صار كلمته
ع عبدالله: لا والله ماكلمته ياولدي
سراج: علاش 😑
ع عبدالله: والله ياسراج اني عندي راي تاني
سراج تنهد : شن هو
ع عبدالله: قصدي تو هي امك تعرفها وتعرف طبعها...تفادى المشاكل وخليها تخطبلك هي علي رايها
سراج شبحله وتعصب : تو انت يابوي تشوف في العرض قدامك وما شعفتش😠...تي شوف عمر اللي خطبتله هي كيف يعاني وطلاق وهم احرف علي راسه 😠
ع عبدالله تنهد : والله معاد عرفت نتفاهم معاكم اني 😑
سراج : بوي اني بنمشيله غدوا عمي بتمشي معاي باهي ماتبيش براحتك
ع عبدالله: تو انت مسكر راسك عليها هي وعارف المشاكل اللي بينهم...
سراج قص ع كلامه : امي تخلق في المشاكل مع الناس كلها 😠....انشالله نجيب امها من المريخ ادير معاها مشكلة نعرفها اني
ع عبدالله: توا كيف الحل
سراج : الحل برا معاي غدوا 😑...وهي تو ترضى بالامر الواقع
ع عبدالله تنهد: يصير خير
سراج : اعطيني كلمة مش يصير خير 😒
ع عبدالله: باهي انشالله
سراج : باهي كلمه اليوم قوله غدوا جايين
ع عبدالله ضحك : غر علي شن مستعجل بسس
سراج يضحك : تو مش كنت معشش فيا اخطب اخطب
°
•
°
•
°
ايناس : غدوا بنمشي للماليا جاي ولد خوي م السفر
بابا ياكل :بري
نادر : هداكا العبيط بيروح😂
ايناس شبحتله بنص عين😒
اني ومسرة 😂😂
تررن ترررن 📱
بابا : ترا مد التلفون
نادر شاف الرقم و مدهوله : عمي عبدالله
بابا : ايوا السلام عليكم
ع عبدالله: وعليكم السلام كيف حالك ياعلي
وسلمو ونشظو ع الصحة وهدرزو هدرزة عادية
ع عبدالله: والله الحق بنقولك غدوا جاي بنهدرز عليك كانك قاعد
بابا : تفضل قاعد
اني ناكل حسيت روحي نخنقت بالماكلة 😮
بابا : نستنوك ع الغدي امالا
ع عبدالله: باهي خلاص انشالله
بابا : انت ومني
ع عبدالله: لا بروحي
بابا : باهي هي نتلاقو
~~
ايناس : خيره😑
بابا : جاي متغدي اهني غدوا
ايناس تعصبت: اني غدوا طالعة😡
نادر : تو ادير ليال عادي😒
اني ف خاطري: زعما لاش جاي😶
بابا يشبحلي : اديري ولا شني
اني : اي عادي 😁
~~
كملنا الغدي وركبت لداري اتصلت بسراج ماردش وكنت متوقعة انه ميردش...لان مروح م السفر واكيد رقد طول..
ومنها معاش كلمته ومجرد ماظلمت العين صليت العشي ورقدت لان نايضة بكري هلبا وتعبانة م الجامعة
°
•
°
•
°
🌒
سراج راقد ع بطنه وغارس وجهه ف المخدة....جت فريال قعزت ع حاشية السرير
فريال : سروجا وليدي
سراج يتسهوك : نعم اميمتي 😑
فريال : والله بندوي معاك في موضوع الحق
سراج : يام ماعنديش جواجي للنكد😑
فريال : لا نكد لا سو....قبل بنقولك شن رايك ناخدلك مودة حمات اختك رنا قنينة مشالله عليها
سراج : اي حتى اني عاجبتني هلبا😍
فريال : حاااق😀
سراج قام راسه من ع المخدة وشبحلها: لكن خسارة قالي محمد عطوها 😔
فريال : عادي والله يفسخو كان نكلموهم وين بيلقو زيك
سراج : لالا خلينا علي ليال خير 😒
فريال : والله ماني راضية تاخدها هالبنت
سراج : ياسر اني راضي😂....وهي كلمة وحدة بنمشي نخطبها تبي تمشي معاي تفضلي ماتبيش تو نرفع خالتي خسماء ورنا وعلا سادين😒
فريال : واني بتفوتني
سراج : زي ما انتي فايتيني
فريال ناضت وخلاته
سرلج : ردي الباب وراك
°
•
°
•
°
☀️⛅
سرور : ليال...ليااال
اني : اا ششنو😨
سرور : وين سارحة الدكتور من بكري يشبحلك 😂
اني : حقااا...وحق ربي مافهمت منه حاجة قريب انوض نطلع😑
سرور : اللي واخد عقلك😂
....
والله ماواخد عقلي الا عمي اللي جاي اليوم وشن جاي يبي...وشن الجية المفاجأة هده🤔
طلعت من المحاظرة وروح بيا نادر وصلت اتكيت شوية وبعدين نضت انطيب ف الغدي
وجي عمي هدرز وتغدى وكلنا مقعمزين معاهم والجو تمام وبعدين...
ع عبدالله: توا سلم بنياتي نوضو وخلوني اني وبوكم ونادر شوية
مسرة : غر كملنا قصت العزوز ياعمي 🙁
ع عبدالله: بعدين نكملهالكم
نضت اني ومسرة وسكرنا الباب ووقفنا وراه وقعدنا نسمعو💃👂
بابا : شني انشالله خير ياعبد الله
نادر حاس ان الموضوع متعي اني وسراج
ع عبدالله:.....
🌷يتبع🌷
.
.
#__timOo__💛
