#__وتين__🍃
🌷الحلقة 100🌷
🌷والاخيرة 🌷
#الجزء_الأخير
________________________________________⚘
الممرضة : انتي جاهزة
اني : اي جاهزة
الممرضة: هما بيجهزو الغرفة دلوقتي...ثواني وهيندولك خليكي جاهزة
اني : تمام
الممرضة : تقومي بالسلامة يارب
اني : شكرا😊
كان سراج واقف ف نهاية الممر ومتلفت للروشن..
مشيت وقفت جنبه : بنخش
سراج تلفتلي وتنهد
اني : مفيش تنوضي بالسلامه
سراج : تصدقي ماعمري عرفت الخوف ولا جربته....
اني :....
سراج : توا خايف...خايف بشكل ماتتصوريشي
اني خنقتني العبرة : اللي كاتبه ربي بيصير 😢
سراج : لو نندري هكي بيصير ماكنتش خديتك بكل عندك علم
اني ضحكت والدموع ف عيوني : بجديات
سراج قارن حواجبه : شن البرود اللي عندك😡
حطيت ايدي ع ايده : ادعيلي
سراج قرب خطوتين وشدلي يديا : اني نبيك انتي بصحتك ؛ مانبيهمش المفرخ
اني ضحكت : اني نبي مفرخ
سراج : تعرفي لو تصيرلك حاجة بعد العملية ، مش حنسامحك طول عمري....لو تكحي ؛ تكحي بس بسبب العملية هده اني مش مسامحك باهي
الممرضة : ليال ال...
اني تنهدت...تنهدت من وسط قلبي وعطيت بضهري💔
سراج : وانشالله تنوضي بالسلامة
كملت طريقي من غير مانتلفتله
°
•
°
•
°
•
نادر : زعما شن صار معاهم
ديما : اكيد قعدا ف العملية
نادر : زعما نتصل بسراج
ديما : حبيبي اكيد يكون توا باله مشغول وماعنداش نية يدوي
نادر تنهد : علي اساس اني بالي مش مشغول😑
ديما : اتصل بمسرة شوفها
نادر خدي التلفون وكلمها
مسرة : الو
نادر : اهلين مسرة شجو
مسرة : تمام ندور شن جوكم انتم
نادر : مية مية...اسمعي متندريش شن صار ف ليال
مسرة : اخر مرة كلمت سراج قالي قعدة ف العملية
نادر : اها...زعما طلعت
مسرة : لالا مزال
نادر : باهي به تمام
مسرة : تمام...سلم علي ديما
نادر : يوصل
~~
~~
~~
ترررن ترررن📱
سراج : الو
ماما : ايوا سراج شن الجو
سراج : باهي
ماما : مزال ماطلعتش
سراج : اتصلتي بيا ستين مرة خلال دقيقتين عندك علم😁
ماما : شني زعجتك😒
سراج : للحقيقة اي...والمشكلة كل ماتتصلي تقوليلي لماتطلع قولي ههههه
ماما : والله نتصل نطمن علي بنتي مش مستاحشاتك 😒
سراج : باهي توا شن المطلوب بالزبط😅
ماما : اقلب وجهك فيك غر طولت اللسان تحسابني نديدتك
سراج يضحك : واني نقول ليال منين جايبة كترت الدوا😂
ماما : اقلب وجهك هي
سراج : ماهو عيب انتي متصلة واني نسكر 😑
°
•
°
•
°
•
محمد : قعدة تدهش البنت ؟
رنا : لالا ليها يومين تتنفس مرتاحة
محمد : قتلي الدكتورة مع الايام تتحسن حالتها
رنا : اي صح كل يوم للاحسن هي
محمد : انشالله
رنا : ماكلمتش صديقك 😁
محمد : من صديقي😕
رنا : سراج
محمد : البارح نهدرز اني وياه فايبر
رنا : اها...مزال مش مروحين
محمد : قال يبو اسبوع تاني
رنا : مشالله شهر عسل علي اوصوله😂
محمد : اكيد امك تغلي😂
رنا : امي تقول مرته التانية مش امه😂
°
•
°
•
°
•
☀️⛅
الممرضة : الحمدالله على سلامتك
اني : الله يسلمك 😊
الممرضة : من البارحة عمال بنستناك تفيقي...جوزك خايف عليك اقوي😉
اني : وينه هو😶
الممرضة : كان هنا من شوية...معرفش راح فين
طلعت الممرضة وشوية وجي سراج والضحكة ف عيونه : الحمد لله ع السلامة
اني : الله يسلمك...وين كنت
سراج : طلعت ندخن....خوفتيني عليك
اني : من امتى طلعوني م العملية
سراج : من البارح ومافقتيش بكل
اني : اهو فقت غر انت محملها زيادة احرف من ماما
سراج : اياااا...امك قداش نفاخة الزح😶
اني قعدت نضحك
سراج : شوره كاتر عليها الرصيد ولا مفهمتش
اني : 😂 ونبي كلمها اكيد مشغولة
سراج شاد التلفون ويتصل : اي والله شكلها مارقدت بكل...الساعة 3 تتصل بيا تصدقي
اني : ههههه نعرفها نعرفها
........
سراج : الو
ماما : ها سراج طمني
سراج : فاقت
ماما : الحمد لله😪
سراج : هاك كلميها
ماما : لونا😢
اني : اهلين ماما شن الجو
ماما : باهي شن حالك انتي
اني : الحمد لله كويسة
ماما : حاسة بوجع ولا حاجة
اني : اي مكان العملية شوية يوجع...لكن طمنتني الدكتورة
ماما : الحمدلله الحمدلله....كلمي خوك نادر والله مارقد حتى هو
اني : باهي به تو نكلمه
ماما : هي باي
اني : باي
°
•
°
•
°
•
🌒
فريال : شن صار ف الموضوع هداكا
ع عبدالله: موضوع شنو😕
فريال : بنت اخت نجلاء 😏
ع عبدالله: تي خيرك انتي هبلتي😒
فريال : هبلت كان نبي ولدي يعيش مرتاح....كان نبيه يدير صغار
ع عبدالله: تو هو يبي...ولا هكي منك ليك تلكلكي
فريال : حيبي غصبا عنه...مش حيتحملها الحياة من غير صغار وغدوا بعد غدوا يبدو يطلعو عليه ف الدوا ويقولو هوا عقيم ومايجيبش
ع عبدالله: الكلام هدا قوليه لولدك وكان قالك باهي عادي اني نمشي نخطبهاله المهم هو راضي
فريال : انت برا ونحطوه ف الامر الواقع
ع عبدالله: لا هكي لا😡
°
•
°
•
°
•
☀️⛅
ماما : اهي طائرة الاسكندرية نزلت
نادر : اهوني اهوني جو
ماما : وينهم😀...لونااا🖐
نادر : اسسس يام درتينا العار النم😑
ديما : مستاحشة بنتها شن فيها😂
نادر : تستاحش وهي ساكتة😑
جيت لقيتهم يستنو نادر وديما وماما ومسرة وقعدنا بالأحضان وماما دارتلي درامة البكي كالعادة🙄...
واحني واقفين ونسلمو شفت بابا واقف بعيد ويشبحلنا
اني : بابا 😮
كلهم تلفتو
سراج شاورله بأيده يبيه يجي
واكيد ماستنيتاش لين يجي ومشيتله اني
بابا حضنني: الحمد لله ع السلامة بنتي
اني : الله يسلمك بابا
بابا شبح لسراج وسلم عليه : الحمدلله ع سلامه
سراج : الله يسلمك عمي
(طبعا بابا مايعرفش اني كنت ندير ف عملية والعيلة كلها مايندروش ويحسابوها مشية عادي...من غير نادر وماما ومسرة وديما )
قعدنا واقفين كلنا مع بابا وماما واقفة بعيد وعاطية بالضهر...
طول ماحني نهدرزو معاه وهو عيونه يهربو لجيهتها وكلنا لاحضنا...بس بعد ماحست انه يشبحلها مشت قعمزت ف السيارة
°
•
°
•
°
•
🌒
فريال متكيا ف سريرها : ياعبدالله غدوا لما يجي هدرز عليه
ع عبدالله : معاش تجبديهولي الموضوع هدا يامرا😠....قتلك باهي الف مرة...لما نعرف اني الوقت المناسب تو نكلمه
فريال : الوقت المناسب توا قبل مايفوت الاوان
ع عبدالله: اوان شني بالله عليك....اسمعي هي كلمة 😡 غدوا لما يجو خلي النهار يمشي علي خير ومانبيش نسمع دوا ولا تلقيح منك ولا من بنااااتك...
فريال : بناااتي حشاهم🙄
ع عبدالله غطى وجهه بالورغان : لا حشاهم الباهيات....اطفي اطفي الضي بنرقد
°
•
°
•
°
•
☀️⛅
سراج يسوق: ردي بالك تتحركي ولا تبدي تلودي اهني واهني...فوتيه جو الفلاحة قوليلهم مريضة ولا اي موضوع
اني : به
سراج : مش غادي تقوليلي تحشمت نضت نضم 😒...نعرفك اني
اني : باهي وكان طلبو مني حاجة شن بنقوللهم...بنوض وخلاص
سراج : تي قنالك قولي مريضة ولا اي حاجة
اني : باهي به
سراج : ماتتحركيش هلبا ليال اهو قتلك...شفتي الدكتورة كيف قعدت توصي ولا 😡
اني : باهي حبيبي وحق ربي ماني متحركة 🙄
سراج : انشالله
اني : سراج اكيد بلسم مش غادي ؟
سراج : اي مش جاية
اني : مش علي حاجة لكن ماعنديش خلوق نسمع تلقيح ودوا
سراج : لالا مش غادي
°
•
°
•
°
•
احمد : تعالى يابهيم قيم البنت م التراب😡
معتصم : بنتك ولا بنتي😒
سراج :😂😂ف السنووون
عمر واحمد :😂😂
ع عبدالله: هي ياشباب واحد منكم يقعمز يشوي
عمر : اشوي انت ياحاج
ع عبدالله: حاج اني وياك امالا ياولد الكلب
احمد :😂😂تي شن بتاخد عمرك وعمر غيرك يابوي
.........
علا : شن جو مصر مليحة؟
اني : اي يهبل جوها
مريم : عاد دلع ف دلع😉😂
اني قعدت نضحك
رنا: سمعتي ب سندس
اني : اي قالي سراج...مش مفكر يردها
رنا: مسكر راسه
اني : لاحول ولا قوة الا بالله
رنا: نحسابكم تندرو اني...لان هو الموضوع صار يوم اللي سافرتو
قعدت ساكتة وخلاص
علا : الله محلاها ريحة الشوا
اني : شني تتوحمي امالا😂
علا : لا ي وخيتي مزال اللطف😶
اني : نحساب😂
علا : شن تحسابني ارنب امالا😂
كريم: غر شوفو شوفو داليا تبدل ف خطواتها😍...
علا : ديدش ديدش
داليا تمشي بالشوية لين وصلت ف علا
علا قامتها ف غمرها : اوبااا حلاتها حلاتها 😘
عمر يشبحلها من بعيد ومبتسم...
مبتسم ابتسامة حزييينة💔
داليا مقعمزة ف غمر علا ومادا ايديها لمريم تبي تمشيلها
مريم : تعالي هي
اني شبحت لمريم وابتسمت : كبدتي عليها مريم
مريم : هلبا تعرفي تموت فيها...كان يرفعها عنر من اهني ممكن نهبل😂
اني : ماتغارج جمانه
مريم : لالا بكل...يخي هي تجيبلي فيها تقولي هاك بنتك😂...ماهو تعودت عليا نرضع فيها
ماريا : علاش كلكم جيتو وماما ماجتش
رنا : ماهو ماما في حوش جدك حبيبتي
ماريا : ماما معاش بتجي معانا😢
فريال حضنتها : لا بتجي يابنتي بتجي
ماريا : كلكم هكي تقولولي😭تكدبو عليا
اني : ياروحي تسخف😔
رنا تنهدت : مش عارف كيف يعطيها قلبها تخلي بنتها
مريم : خيرها بلسم ماجتش
فريال : هدا السيد سراج مايبيهاش تجي😏اشبح علاش
علا : اصلا هي شيبانيها مريض ماشيتله
°
•
°
•
°
•
🌒
وليد : تي علاش يامسرة الزح
مسرة : شن تبيني ندير😒 هدا اللي صار
وليد : مش قتلك خليك دايرا احتياطات
مسرة : خديت احتياطات وحملت و هدا اللي صار...شني انت ماتبيش مني صغار ولا كيف😒
وليد قعد ساكت وقارن حواجبه
مسرة : خلاص تو ناخد حبوب نطيحة ماتحرقش دمك...ولفت مشت للدار وتمتم : حارق دمه وبيتفجر حسسني جايباته بالحرام
خشت مسرة للدار واتكت ف سريرها وخانقتها العبرة...
قعد وليد مقعمز يدخن ولما كمل ناض خش واول ماخش للسرير حسها تبكي من صوتها....قرب ولف ايده عليها وحط وجهه ف رقبتها : حبيبي مش قصدي نزعلك لكن اني ممبيش من البداية نبدو فيها صغار ومسؤوليات وحرق دم و....
مسرة قصت ع كلامه ولفتتله : تلوم عليا اني علاش...هكي صار اني شن دنبي
وليد باسها من خشمها : اني اسف ❤
مسرة : به توا شني....تبيني ناخد حبوب😢
وليد حضنها : لا طبعا 😒....نخاف تصيرلك حاجة
°
•
°
•
°
•
اني : بطني مش عارف خيرها توجع فيا😑
سراج : بالك حامل😂😂
اني شبحتله : تتسهوك انت😒
سراج : لا نحلل بس 😂
اني تنهدت وتلفت للجيهة التانية
سراج قعد يخربشلي ف شهري : نبصر يامشفشفة
اني : حول ايدك😒
سراج : وكان ماحولتهاش
اني : بتحولها😌
قعد ينخص فيا ف جنبي
اني : سرااااجااي😂 يابارد
قلبني ع السرير وجي فوقي : بنحولها قتيلي😏
اني نصحك : اسمع العملية توجع فيا بلا براده
سراج : لا تسخين مش برادة وانتي الصادقة😉😂😂
اني : بعععد ياسخيف...مانحسابكش هكي طلعت منحرف🙄
سراج محاصرني بايديه : حتى مانحسابكش هكي...كنت نقول عاقلة😏
اني : به بعد هي يالصقة
سراج : منيش😏
اني : تي حول وانت تدحنس 😒😌
°
•
°
•
°
•
1 رمضان🌙
مراد : خير ياعمي كل سنة وانت طيب
بابا : اهلييين مراد تفضل ينعتد عليك انشالله
مراد : اجمعين
مسرة : اهلين كيف الحال ميرا
ميرا : كويسة سروو كيف حالك انتي
مسرة : مشالله البطن كبرت😂
ميرا قعدت تضحك
ايناس : كيف حالك جميلة
جميلة : الحمدلله الحمدلله
منتسك: اهي ماريا جت
ايناس بالشوية : جو زي الشياطين
مسرة : بلا نكد ماما 😒
فريال : أهلا 🙄
ايناس : اهلين😒
بابا : تفضلو تفضلو خشو
........
رنا : شكله خوك ومرته مش جايين
علا : اي شوره
رنا : بالك لونا علاقتها مش تمام مع ايناس
علا شبحت لمسرة : مش جاية ليال
مسرة توتي ف الصفرة : لالا قالت بتفطر ف حوشها
علا : غريبة خلو لمت العيلة
مسرة : بيجو بعد الفطور قالو
بلسم : وعلاش هدا كله 😏 ماهو يجو ع الفطور زينا زيهم ولا غر هي تحب تتجكتر
مسرة شبحتلها : ماهو سراج قالها اول يوم نبيك انتي اطيبيلي مانبيش يعزمنا حد😌....هدا علاش
بلسم : 😒
°
•
°
•
°
•
سراج : قصدي تو انتي كل ما تبدا بلسم ف مكان تقوليلي مانيش ماشيا
اني : سراج اني ماعنديش خلوق نتحمل دوتها وم الاخير اختك لسانها حار....نمشو بعد الفطور شوية وخلاص
سراج : خليني من اليوم...قصدي اكيد مش حتقعدي تتهربي منها تي شن ولت هي
اني شبحتله : اني مانتهربش ولعلمك لو نبي نمشي حنمشي وتقول كلمة نرد عشرة لكن مانبيش يطيح القدر وننقطعو بكل
سراج جي وقف جنبي ف الكوجينة: كان الناس كلها تفكر زيك راهي ليبيا مشت لقدام
اني : ههههه لا اني مانفكرش هكي لان هدا الصح....لو كانت وحدة تانية ف مكان بلسم واتصلت وسمعتني الكلام اللي قالاته اول ماتجوزنا كنت مسحت بيها الارض وماسكتلهاش
سراج : وعلاش هي مادرتيلهاش هكي
اني : لانها اختك..
سراج : اي به اني حوليني من راسك ومعاش نبي كل مشكلة نخش اني وندافع عليك....انتي خودي حقك بروحك ومعاش تقوليلي علي خاطرك
اني مشيت بنطلع المية م التلاجة :حبيبي لو بنفكرو هكي معناها من اول مشكلة حنتعادو مع اماليك كلهم لان كلهم بيقوقفو مع بعض هما هكي طبعهم
سراج : ونتعادو عادي....مدامهم مش مدورين نديرو زيهم
اني : بتعادي انت اماليك علي خاطري
سراج : نعادي الدنيا كلها علي خاطرك ❤
كنت واقفة قدام التلاجة وفاتحه بابها ونهدرز مع سراج وبعدين خديت منها شيشة المية وفجأة حسيت الدنيا كلها دارت بيا وفقدت توازني و طحت علي طول ومعاش نندري ع شي بعدها
سراج : لونا...لوناااا
جاني بسرعة وقعمز ع ركابه وقعد يخبط ع وجهي بأيديه وفتح الشيشة قعد يصب ع وجهي
°
•
°
•
°
•
📞ماما : فاطرة غادي حتى انتي
📞ديما : اي اني ونادر لكن لونا ماجتش
📞ماما : اي قتلي بتفطر ف حوشها...ماتبيش تتلاقا مع حماتها العبيطة هديكا😒
📞ديما : اها
📞ماما : باهي هي باي توا خلي نتصل بلونا نشوفها...سلميلي علي نادر...
📞ديما : سلمك يوصل وانتي سلمي عليها لونا
📞ماما : يوصل باي
سكرت ماما من ديما واتصلت بيا...بس ناده اكتر من مرة وما فيش رد...
فوتت شوية واتصلت بسراج
~~
~~
~~
تررررن ترررن📱
سراج : الو
ماما : ايوا سراج شن الجو
سراج : تمام الحمدلله
ماما : خيرها لونا ماتردش
سراج : اه...نسينا التلفون ف الحوش
ماما : علاش انتو وين
سراج : ف المستشفى
ماما : هييي😱 علاش
سراج : غر تو نكلمك بعدين الدكتورة تنادي فيا
ماما : ليال فيها حاجة 😢
سراج : شوية ونعاودلك....وسكر ومشي للدكتورة
الدكتورة : حالتها كويسة ماتخافش
سراج دكتورة هي دايرا عملية الفترة اللي فاتت و....
الدكتورة قصت ع كلامه : اي شفتها العملية بس ماليهاش علاقة بكل
سراج : به امالا علا علاش هكي صارلها
الدكتورة : هههه ياأستاد ماتخافش بكل...هي صارلها هبوط لانها صايمة
سراج : به شن السبب قصدي هي...
الدكتورة قصت ع كلامه : المدام حامل هدا علاش هكي صار معاها
سراج : حح حامل ؟؟؟
.........
كان عمي عبدالله اليوم مقرر انه لما نجو بعد الفطور بيفتح لسراج موضوع الصغار والجواز وطبعا كله من الحاح فريال
وكان ناوي يقوله ان بيخطبله شهد.بنت خالتي...
بس مالحقش يفتحله الموضوع وسمعو ان اني حامل
صح الحياة عدبتنا شوية بش وصلنا لبعض وبش وصلنا للي نبوه بس كان الحظ ديما معانا
وشاء القدر ان اول حفيد يحمل اسم العيلة هو ولدنا ❤
°
•
°
•
°
•
#بعد_مرور_تلات_سنوات💛
ميرا : تعالي ماما نساويلك قفطانك بش نمشو هي
ميس : الا نبيث
مراد : تي بري تساويلك قفطانك شوفي منظرك كيف
ميس : اثكت انت😒
ميرا : هدا الدلع اللي مدلعولها تستاهل
مراد : تي تعالي يابنت البكل خير مانوض نجيبك من شعرك
ميس : اهو زيت😨
ميرا :😂😂 اهو طلعت تعرف تكشخ
مراد : بلا تمهتيك انتي التانية 😒
~~
~~
~~
علا : عبدو جيب اختك خلي نرضعها
سامي : نوضي انتي تو يطيحها ياعلا
علا : حبيبي بطني اني نوض جيبهالي
سامي : قصدي حرتتي عليا هلبا انتي ره😒
علا : مش تقووولي احملي واني تو نعول عليك خلاص اني حامل ومانقدرش نتحرك هلبا 😡
سامي : غر راه ينطلسلك عرق 😂
علا : جيبهالي البنت تعيط
عبدو : ماقدرتش نقيمها 😑
سامي : تي غر قيم روحك انت
علا : تعرف بعدين بنمشو لحوش عمك سراج ..... والله العظيم ادير دوشا انت لما نحبسك ومانخليك تطلع فاهم
عبدو : ديما تقولي هكي انتي😂
علا : شن هيا😡...خلاص تو نحبسك من توا امالا ومافيش مشي معاي
عبدو : تي شن درت 😒
~~
~~
~~
محمد : هيا يارنا شحطيني الزززح 😠
رنا : باهي هاك ارفع الساكوات خلي نجيب رزان ونجي
محمد : انتي ماشيا للجامعة علاش تكركري ف ساكوات مافهمتش😑
رنا : تي ماهو بعدين بتحطني ف حوش سراج
محمد : اني بنحطك ف الجامعة وبنمشي الراجل يستنى فيا
رنا : خلاص تو نمشي مع سراج امالا كان سيارته فاضيا
محمد : هيا انتي
رولا واقفة ع المراية : باهي نساوي ف شعري😌
محمد : تي اطلعي يافرخة 😡
رولا حطت ايدها ف خصرها : شن تبي عبدو يشوفني هكي شعري😏
رنا : 😂😂😂 ووه قوية
محمد : مش تمام الفرخة اهيا😒
~~
~~
~~
عمر : بتنزلي
ماريا : لالا نستناك ف السيارة
عمر : باهي مانعطلش
ماريا : به
.....
داليا : اهوا بابا جي
عمر : السلام عليكم
اريج : وعليكم السلام
داليا : ليا ساعة نستنى كلهم روحو 😡والروضة فاااضية والابلة قعدت علي خاطري
عمر ضحك : سامحينا انسة داليا زحما الطريق
اريج : انت بو داليا
عمر : اي....اسفين شحطناك معانا ابلة
اريج ابتسمت :لالا عادي معندكش مشكله....هههه مشالله بنوتك شطورة
عمر ضحك وشبح لدليا : حقا
داليا : اي اني اشطر وحدة ف الفصل😌
اريج وعمر ضحكو
عمر : انتي مدرستها
اريج : اي
~~
~~
~~
#كندا
قيس : انت خود هادي وانت خود هادي 😑
جواد : اني نبي الصفراااا😭😭
رواد : الا اني الصفرا 😡
قيس : اني البهيم اللي نشريلك انت وياه
تسنيم : خلاص انت وياه هاتوهم الزوز تو نعطيهم لحلا تاكلهم
رواد : شني كل شي لحلا كل شي لحلا 😠
قيس : سكر فمك...اللي نجيبهولك تتعارك عليه انت وياه تو مزال نجيبلك حاجة
رواد : خلاص اني ناخد الحمرا
جواد : لالا خلاص اني تو ناخدها الحمرا
رواد : اني قلت قبلك
جواد : انت قلت تبي الصفرا😡
قيس : اااه ياراسي😪
~~
~~
~~
مسرة : تعرف من لما غزل تجوزت حسيت الحوش اللوطي ولا كئيب
وليد : اي ماهو فاضي
مسرة : قوللها تجي تسكن فيه هي ورجالها
وليد : تو من عقلك اياد بيرضا يسكن اهني وهو ساكن ف فيلا
مسرة : وخيره حوشنا حتى هو كبير مشالله
وليد : تي مش قصة كبير...مش حيرضى يسكن ف حوش اماليها خيرك عبيطة
مسرة : عادي مرات يرضى😒
وليد : نوضي نوضي شوفي ولدك شن يدير
مسرة : يلعب بالتاب
وليد : من الصبح لليل وهو شادة مايعياش الهم
مسرة : اي خايفة علي عيونه تعرف...مفروض مرة مرة ناخدوه منه
وليد : اي
مسرة : هي وتيت اني
وليد : لالا مش رافعك اني بنرقد بري بالسيارة بروحك
مسرة : هييي 😱 تي ليال عازماتك
وليد : والله الا تعبان يامسرة...باركيلها علي لساني وتو ف الليل نلحقكم ف الحوش
مسرة : عيب والله لما تحرج منك😒
وليد : تو نتصل بيها يانفاخة...
مسرة : هيا ياحمودي بنمشو حوله التاب من ايدك
محمود : شوية بسسس بنربح
~~
~~
~~
معاد : بابا افتح مسجل
عبسي يسوق : تعرف دمي محروق من الزحمة لامسجل لاخرا😑
رتاج : به حبيبي البلاد كلها زحمة خيرك حارق دمك
عبسي : لا كان طلعنا قبل نص ساعة راهو لقيناها فاضية لكن انتي ساعة بش تطلعي😒
رتاج: كله لازم نطلع اني غالكة قريب تقولي الزحمة دايرتيعا انتي🙄
معاد : كيف شكله الجامعة ؟
رتاج : اهو ماشيلها تو تشوفها
معاد : في ماكلة فيها
عبسي : انت هدا اللي هامك...وانت رايح زي البقرة
رتاج : اي بنديرلك ريجيم يافرخ ياسرك ماكلة
تررررن ترررن 📱
عبسي : الو
نادر : ايوا عبسي شجو
عبسي : الجو نو وعالق ف الزحمة زي النهار الحرف😑
نادر :😂😂 غر هدي اعصابك
عبسي : تو شن متصل تبي انت 😒
نادر : مزال ماوصلتش للجامعة
عبسي : لالا قريب وانتو وصلتو
نادر : تي احني كيف طلعنا م الحوش
عبسي : باهي نتلاقو
ديما : وصلو ولا 😡 كلهم وصلو الا احني موسع بالك
نادر : تي ماوصلوش وانتي اعصابك ف حكة..مزال الوقت
ديما : انت علاش هكي بالك واسع نافهمتش🙄 ليا ساعة متشحطة ولابية
نادر : به اني نسوق شن تبيني نطير ولا كيف
بتول : ديما وانتي متعفلقة ياماما😒
نادر : اي بكل مشناها ولا
بتول : بكل لكن مش مشناها😂
ديما : ف السنون😏
نادر : الله🙃
~~
~~
~~
مريم : خيرك عطلتي اليوم
داليا : هدا بابا جاني موخر🙄
عمر : تحرشي فيا ولاشني😏
داليا : اي بش مرة تانية تجيني بكري
مريم تضحك
عمر : شن حاله انس قاعد مريض
احمد : لا نزلت حرارته اليوم
عمر : باهي الحمد لله
احمد : وين ماريا
عمر : حطيتها ف حوش جدها قالت بتشوف امها
جمانة : معناها داليا بتباتي معاي اليوم😀
مريم : اي باتي عندنا مستاحشينك
••••••••
سبحان الله كيف الدنيا ادور ....
كانت طفولتي تشبه طفولت ماريا بنت عمر
كنت نقرا ويجي بابا يروح بيا ومرات يحط فيا عند حوش جدي بش نشوف ماما لان نبدا مستاحشتها
وكان بابا يدرسلي بعيد بش مايشوفش خوالي وماكانش يحب يمشي غادي بكل وكان مش طايق ماما ولا هي طايقاته
ماريا نفس الشي ونفس المشاعر الباردة اللي كانت بين ماما وبابا توا بين عمر وطليقته سندس وكانت ماريا الضحية زيني 💔
كان جواز ماما وبابا تقليدي وعبارة عن اتفاق بين اهله واهلها وماكنش في حب بينهم...اما طلاقهم ف كان سببه فريال وايناس.
وسندس وعمر نفس الشي
كان جوازهم عن طريق فريال....ماتحسابش روحها ترسم لولدها ف نفس المصير اللي عاشه بابا.
اللي داراته ف ماما دفعت ثمنه في ولدها وحفيدتها
°
•
°
•
°
•
يزن : علاش ماما لابسة طاقية كحلا
ماما : ههههه هده متع التخرج انشالله تلبسها انت واختك
سراج : تسأل هلبا انت اليوم
يزن : به بابا...اعطيني امية عتشان
سراج : هاك امية ريقك يبس م الدوا ولا
يزن : لالا مش م الدوا م االشكلاته ماهو بكري ولا كليت شكلاته اللي شريتهالي انت وماما لما جينا الصبح ولارين قعدت تعيط تبي منها
سراج : تي باهي ياودي المهم عطشان فهمت😑...هاك اشرب مكتر دوتك
..........
رنا : مبرووك انشالله نشوفوك ف اعلى المراتب 💓
اني : الله يبارك فيك رنو عقبال بنياتك انشالله
مريم : لوونتي الف مبروك انشالله صغارك يطلعو زيك واحسن
اني : سلمها😘 انشالله حتى انتي تشوفيهم دكاترة
نادر : دكتورتنا مبرووك مبرووك
اني : مصح وجهك جاي اخر واحد😒
ديما : اوسع من باله مافيش تعرفي😑
نادر : تي باهي النم فهمنا
يزن : هيا جعاااان 😣
اني : تعالى بوسني وقولي مبروك واضبطني خيرك هكي
يزن جي حضنني : به عيد ميلادك هو ؟
اني : ههههه لالا مش عيد ميلادي
يزن : امالا شنو 😕
اني : تو نقولك.....ماما وين لارين
ماما : رقدت حطيناها ف السيارة
مسرة : بابا جي
اني تلفتت : اهلين بابا
بابا مبتسم : مبروووك مبروووك
اني : الله يبارك فيك 😘
مناسك : مبروك يادكتورة لونا😌
اني : الله يبارك فيك عقبال عندك انشالله
مناسك : ايااا اني مش متع قراية😂
اني : عارفة عارفة 😂غر جاملتك
مناسك : حبيييبي استاحشتك
يزن : مش قتيلي بتجيبيلي لعبة....تكدبي عليا😒
مناسك : نسيتها ف الحوش😅
اني : ياعيلة وين سراج
ماما : مش قتلك لارين رقدت... مشي يحط فيها ف السيارة
اني : خلي نمشي نشوفه
يزن : بنمشي معااااك
اني : تعالى هي
مشيت للسيارة وكان سراج كيف جاي وتلاقينا
سراج ضحك : كملتي
اني : اي خيرك عطلت
سراج : فاقت قعدت نرقد فيها
يزن : بابا قول لماما مبروك كلهم قالولها
سراج ضحك : به سكر ودانك نبي نقولها بروحي مانبيكش تسمع
يزن : هههههه زبطتك بتقوللها حبيبتي 😂 ياصايعيين
سراج قعد يضحك : تحشم
يزن : انت تحشم😂
اني : نسخة مصغرة مشالله 🙄
سراج ابتسم وقرب لودني وتكلم بهمس: مبروك ياأحلى دكتورة ف الدنيا ❤
اني : الله يبارك فيك ياعمري ❤
شديت يزن من ايده وسراج شده م اليد التانية ومشينا
يزن : بنغنيلك ماما.....وقعد شاد في يدينا ويحرك ف راسه ايمين وايسار
............... حبينا دكتورة....دكتورة دكتورة ؛💛
................ معروفة ومشهورة...معروفة ومشهورة💫
................. لطيفة مهضومة..نعومة صغيورة 😇
................. بحاكيها بالحب❤ تحاكيني بالطب 💉
..................خليها ياعمي ياعمي. خليها مستورة 🔐
#The_end ✨
#وتين_للكاتبة_تِمار
___________________________________________________________________
أول تجربة ليا ف عالم الروايات وماكنتش متوقعة نهائي ان يجي يوم ونكتب رواية ❤
وتوفقت واثبتولي انتو اني ناجحة في الشي هدا😍 انشالله عجبتكم النهاية ولنا لقاء في رواية تانية انشالله 🙈
.
.
#__timOo__💕
