#__وتين__🍃
🌷الحلقة 69🌷
مسرة : الو 😳
وليد : ههههه والله شكلك ماتبي تخليني في حالي
مسرة كانت بتنفعل وبتهزبه زي كل مرة وبعدين ادكرت انها تبي مصلحة منه ..
مسرة : قتلي هناء مسحت الصور...خاطري نصدق
وليد : انتي واثقة في روحك لدرجة انك تحسابيني بنحتفظ بصورك😂
مسرة : باهي به المهم اني متصلة نبيك في موضوع تاني
وليد يضحك : موضوع ؟
مسرة : اسمع يا ادوي معاي بجديه ياخليني نسكر
وليد : توا انتي تهزبي وتستهزئي بالناس وخشمك في السمي وبكل برود جاية تقوليلي نبيك في موضوع😒
مسرة : به خلاص سوري ع الازعاج 😑
وسكرت في وجهه الخط...قعد وليد شاد التلفون ويشبحله : اغرب مخلوقة نشوفها😶
ايمن : خيرك تدوي بروحك
وليد : الها ف عمرك
~~
~~
هيام : كيييف ؟؟
مسرة : شني كييف...معاش تقوليلي كلميه المخلوق هدا يخش للجنة اني نمشي للجهنم 😡
هيام : بري حتى اني مفضاني اللي ندولك في حل 😒
مسرة : اي مفضاك ونبي معاش ادوريلي حلول 😑
°
•
°
•
°
بلسم : وين راجلك
رنا : يروح موخر
علا : شفته بكري هو وسامي في سيارة سراج
رنا : اها
علا ادور في الحوش : اسمعي هدا الحوش جايبنا ليه سراج قبل ولا
رنا : اي هدا حوش صاحبهم اياد
بلسم بهزوة : هه ولامتى بتقعدو في حوش صاحبه😒
رنا : يدور في حوش للايجار
بلسم : وبتعيشو بالايجار 😑
رنا : بيبدا يبني
علا شبحت لبلسم : عادي الناس ظروف
بلسم : راجل مصنع امنع بيسكنك بالايجار
رنا انفعلت : عنده حوش اني قتله معاش نبي نقعد فيه...وبعدين انتي تتهزي حسستيني انتي ساكنة باهي
هداية ومحمد مقعمزين ويشبحو لامهم
علا : نوضو خشو داخل هدو وحمودي 😊
بلسم : ع الاقل اني راجلي حوشه باسمه مش دايرهوله بوه
علا : خلاص بلسم خيرك عششتي
رنا : شي يحرق الدم 😑...تي حتى هو عنده ارض وبيبني
بلسم تنهدت وسكتت
علا تحاول تهدي الجو : امتى بتعزمي البنات
رنا : الجمعة انشالله وانتو تعالو من الخميس ساعدوني
بلسم : غدي ولا عشي ولا شنو
رنا : عشي..
بلسم : من بيجي بالزبط
رنا ربعت رجليها : شدي عندك كناينا الزوز
علا تعد بصوابعها : به
رنا : ونجلاء صاحبتنا و اختها
علا : به
رنا : وحلا بنت خالتك وليال بنت عمك
بلسم وعلا فنصو عيونهم : لياااال😡
رنا : اي خيركم قريب تاكلوني😒
علا : بعد مالزيتيها بتجي 😏
رنا : كلمتها اعتدرت منها اكتر من مرة
بلسم : غر كان نفهم شن اللي مخليك تدحنسيلها بس😠
علا شبحت لرنا : قصدي خالها وسيبك علاش التزمزيك الزايد
رنا انفعلت : والله اني غلطت فيها وظلمتها وعادي الاعتدار مش غلط وهده سيورها بتبدا مرت خوك لامتى بنقعدو متعاديين 😡
بلسم : مصح وجهك ناقص غر ناخدوها لخوي وسخة زي هده😏
رنا : وسخة ولا مش وسخة سراج يبيها واني نعرفه وانتو تعرفوه كلمته يمشي فيها قصدي اول ع اخر ح تبدا كنه علاش تعادو فيها...وبعدين طيبة هي واحني اللي نخلقو في المشاكل معاها 😶
بلسم : تجي هي اني مش جاية😑
علا غمزت لبلسم : لالا عادي نجو نجو علاش لا 😏
بلسم سكتت
رنا : مانبيش مشاكل ره😒
°
•
°
•
°
🌒
ام تسنيم : هي تعالو تعشوو
تسنيم : اني ماعنديش نية 😑
ام تسنيم : هي لونا ورتاج تعالو
اني : والله حتى اني ماعندي نية ياخويلة
ام تسنيم : تسنيم نقولو جايها خناق العرايس وانتي شني
رتاج تاكل : خناق صاحبة العروسة😂
اني وتسنيم 😂😂😂
ام تسنيم : ههههه فيكم غر التلقيح
ورقدو العيلة وقعدت اني وتسنيم ورتاج ساهرين نهدرزو
تسنيم تنهدت : بدي العد التنازلي يابنات 😖 جايني احساس غريب
رتاج : تي باهي وانتي درتيلنا احرف من اختي نوال في عرسها 😑
اني : اي اي عروسة هكي بيصيرلها
رتاج : مزالك اسبوع وتنتلفي ياتسنيم
تسنيم : ننتلف ياحيوانة😒
رتاج : ههههه...انتي بتسافري طول
اني : اي حقاا بعد العرس علي طول بتسافرو
تسنيم : لالا بعد اسبوع من العرس
رتاج : اها
اني شبحت لتسنيم وتكلمت : تسنيم !
تسنيم شبحتلي وتكلمت بنفس الطريقة : نعم!
اني : معاش عندك مشاعر اتجاه سراج ؟؟
رتاج : شن السؤال العبيط هدا😒
اني : عادي نهدرزو 😊
تسنيم : لا سؤال عبيط الحقيقة 😑
اني : عادي مرات في مشاعر ماماتتش
تسنيم : اولا لو في شعور حتى بنسبة 1 من المية اتجاه سراج مستحيل نكلم قيس ومستحيل نقعمز ونهدرز معاك عادي وانتي تتكلمي ع غرامياتك معاه لان حنكون ميته بالغيرة وتانيا صدقي او ماتصدقيش والله العظيم اللي حسيته اتجاه قيس ماحسيتش حتى ربعه اتجاه سراج لان لما تحبي من طرف واحد مش زي لما تتبادلو الشعور واني بعد علاقتي بقيس عرفت ان اللي حاساته اتجاه سراج مجرد اعجاب لااكتر ولا اقل
اني : به اللطف انتي فتحتيلي محاضرة 😶
تسنيم : ماهو اني بعد اسبوع بنكون عند قيس وانتي تسألي فيا علي سراج
اني : عارفاتك تحبي قيس لكن هكي سؤال وخلاص..
رتاج : نسألكم اني سؤال 😁
اني وتسنيم : شنو
رتاج : هكي نبيكم تفسرولي الحب..شن يعني كلمة حب وشن هو اللي حسيتوه بش عرفتو روحكم حبيتو 💛
تسنيم : تبدي تحسي روحك لو مافكرتيش فيه حتى للحظة كأن نقطع عليك النفس كأن روحك مش فيك ولما تشوفيه او حتى تحلمي بيه بس دماغك يتشوش وهلباحاجات تصير في داخلك ماتقدريش تفسريها❤
تبدي لا ارادياً ادوري علي كل شي يخصه وكل حاجة يحبها حتحبيها بدون ماتحسي وادوري في ابسط حجة بش تشوفيه وابسط سبب بش تتكلمي عليه...
تبدي تتمتعي لما تتخايلي المواقف اللي صايرة بينكك
وبينه وحتى لو مافيش مواقف تبدي ادوري في ابسط شي يصير بينكم حتى ولو نضرة 💓
🌼🌼🌼🌼🌼🌼🌼🌼🌼🌼
بكلامها كأنها تقولي ماتسيبيش سراج وخليك معاه رغم انها ماتندريش اصلا اني مقررة بنسيبه...💔
كنت سارحة في كلامها ومر قدامي شريط فيه اللحظات اللي عشتها معاه من اول ماحبينا بعض
متكية ع كتف رتاج ونسمع في كلام تسنيم وقدام عيوني سراج وضحكته وصوته واسلوبه...قدام عيوني طلعاتنا وتهدريزنا وعركاتنا 💜
قدام عيوني لما يغازل فيا ولما يجاكر فيا ولما يلقحلي قدامهم...
اما رتاج 💫
كانت اطبق في كل كلمة قالتها تسنيم علي روحها وع اللي حاساته اتجاه عبسي 💞
كانت حاسة بشعور غريب ماعمرها حساته...
وكانو عيونها قلوب قلوب مع انه هو ماعبرهاش بكل لكن مادورتش طبعه واسلوبه معاها وكل اللي ف بالها انها ادير سبلة وتمشي للمحل تاني❤
°
•
°
•
°
#وليد 🌟
