#__وتين__🍃
🌷الحلقة 74🌷
فتحت الباب بتنزل
وليد : مسرة
مسرة شبحتله : نعم
وليد سكت شوية ويشبحلها وبعدين تكلم : تصدقي ماتوقعتش منك تجي تعزي بكل
مسرة سكرت باب السيارة وتلفتتله : لهدرجة تشوف فيا سيئة
وليد : مش هكي...لكن مانحسابش تهتمي ...وضحك.... ومانحسابكش حتى دايرتيني ف راسك
مسرة : اا اني مش دايراتك ف راسي😳 لكن جي البوست قدام عيوني فقلت من الواجب نعزيك 😊
وليد : تعرفي يامسرة في داخلك بنت رقيقة وطيبة بجديات لكن مافهمتش علاش تحبي تظهري العكس
مسرة ضحكت : اني هكي
وليد هز راسه بمعنى اي
مسرة : ههههه اول مرة حد يقولهالي اني طيبة
وليد : الدنيا مافيهاش امان وفي الوقت هدا طبعك بيوديك ف داهية
مسرة : كيف مافهمتش
وليد : مثلا اني واحد نكره جد ام العناد وجيتي انتي كل كلمة نقولهالك تستفزيني فيها وكانت ردة فعلي اني نديرلك حاجة نوصلك لمرحله نشوفك ضعيفة وتترجي فيا
مسرة ساكتة وتسمع
وليد : اني نقدر نبتزك بصورك ونقدر ننشرهم نقدر ندير اي حاجة نخليك تجي تبوسيلي ايدي لكن اني مش هكي....تخايلي انتي اطيحي ف ولد حرام يديرلك خارقة معاش تطلعي منها وتخشي ف مواضيع كبيرة
مسرة : لكن اني...
وليد قص ع كلامها: ديما لما بتتعاملي مع الناس وخاصة راجل خليك لينه ماديريش جو العناد وتسكير الراس لان بيتعبك الشي هدا حتى بعد الجواز
مسرة : في ناس مستفزة....وضحكت...زيك انت
وليد : ههههه شوفي كيف تناشبي
مسرة : ماناشبش لكن هكي طبعي اللي ف قلبي ع لساني
وليد : اني من معاملتك معاي اول ماحكيتيلي انك نخطبني وفسختي طول حطيت ف راسي انك الغالطة
مسرة : غالطة😒
وليد : اي لان قلت هده معاي اني اللي مانعرفهاش هكي امالا مع خطيبها كيف...اكيد مدرهتله كبده مشي طفش😂
مسرة : طفش عينك يترجى فيا غر نرضى بس😌
وليد : المهم..اني نصحتك وانتي ديري اللي يريحك
مسرة ضحكت : شكرا يانصايح بننزل خير مايطلع بابا يشوفني
فتحت الباب وبتنزل
وليد ابتسم : خلينا علي تواصل ❤
مسرة عاطياته بضهرها...ابتسمت لما قالهالها ومشت من غير ماتتلفتله
°
•
°
•
°
سراج واقف هو مجموعة رجالة ف عمله ويتناقش معاهم وكمل كلامه كيف بيمشي لمكتبه
هنادي : بش مهندس
سراج تلفتت : اووو اهلا بالعروسة
هنادي ضحكت : شن الجو
سراج : تمام والله شن جوك انتي
هنادي : الحمد لله....تعالى نعزمك ع قهوة ف مكتبي😊
سراج : ايااا مكتبك بعيد خشي اهني 😅
هنادي : كسول 😶
سراج : اي هلبا
وقعمزو يهدرزو من موضوع لموضوع
هنادي : وانت شن جو حبيبتك😊
سراج : باهي....شني قالو سافرتي
هنادي : اي كنت في تركيا
سراج : كويس
هنادي : مزال انت مافكرتش تتجوز
سراج : لا مزال😑.... وين قعدتو ف تركيا
هنادي : في انقرة ومشينا حتى اسطنبول
سراج : اها مليح بكل.... قداش قعدتو
هنادي حست انه مايبيش يدوي علي مواضيعه...معاش سألاته
°
•
°
•
°
نادر : علاش ماتبيشي سراج
ماما : من قالك ع الموضوع
نادر : هو قالي وجاد ويبيها 😒
ماما : اسمع فوته الموضوع اني ماصدقت هي فاتاته بتنوضلي انت
نادر : تي شن دايرلك الولد شن بينك وبينه
ماما تنهدت : اني تعبتوني خلي نقولك الزبدة طول بش ماتناقشنيش هلبا 😑
نادر : اي ياريت تخشي ف الزبدة
ماما : بالك تحسابها فاتاته لان اني مانبيشي...هه لالا اني زايد ناقص فاتاته لان هي تبي تفوته
نادر : به علاش تبي تفوته
ماما تلخبطت : ااا مانعرفش
نادر : تي كيف ماتعرفيش
ماما : المهم فاتاته هدا المطلوب
نادر علا صوته : اي قولي انك انتي ضغطي عليها وخليتيها تسيبه 😡
ماما تنهدت وناضت
نضت مشيتلهم في الصالة : خيركم تعيطو
نادر ناض وقف : ندوي معاك يااام😡
ماما : ماعندي مانقولك
نادر شبحلي اني وماما : اني ما اطلعوش جد عمي عيل قدامه 😠
اني : اني حرة معاش نبي مش بالسيف
نادر : تو انتي مدايرا معاه علاقة ولما جي طلبك مني طلعتي معاش تبي بش اني نطلع ماعنديش كلمه😠
اني : لا انت مادخلكش
نادر : مادخليش قتيلي😠...خلاص بري اللي يعجبك اختاريه...احني زااااايد ناقص بااااهي 😠
اني انهرت بالبكي : انيييي معاااش نبي شن بالسيييف هو الموضوع معاااش نبي نتجوز معاش نبي شيييي😭
نادر : مش بمزاااااجك انتي يوم تبي ويوم ماتبيييييش😠
اني بديت نعيط ونبكي ونشبح لماما: قوووليله علاااش درت هكي😭 قوووليله
ماما خافت عليا : اسسس خلاص 😦
نادر : مش خلاص علاااش قولي علاش😠
ماما: مافي شي ماتبيش وخلاص هي حرة
نادر: لا مش هكي وخلاص😠 ادوووي علاش هكي درتي هو غلط فيييك انتي غلطتي فييه العلة في مني بالزززززبط فهميني😠
اني : العلة فياااا اني باااهي اني مانقدرش نتجوزه لاهو ولا غيييره 😭 اني مانقدرش نتجووز بكل😭
ومشيت خشيت للدار وسكرت علي روحي وقعدت نبكي
نادر واقف مصدوم ويشبح لماما : خيرها 😮
ماما: غر قعمز تو نفهمك
نادر قعمز : فهميني هي كيف ماتقدرش تتجوز علاش قالت هكي
ماما : تدكر لما رقدت في المستشفى وطلبو عليها تحاليل
نادر هز راسه بمعنى اي
ماما : التحليل طلعو.....
وحكتله القصة
°
•
°
•
°
☀️⛅
فاقت رنا الصبح لقت محمد مش جنبها ع السرير طلعت لقاته مقعمز في الصالة
رنا : صباح الخير
محمد قام عيونه فيها وكانو عيونه فاضحينه : صباح النور
خشت غسلت وجهها توضت وصلت ودارتله قهوة وحطتها وقعدت مترددة تقعمز جنبه ولا تحطها وتمشي وقبل ماتقرر شبحلها محمد: قعمزي
قعمزت جنبه وحاسه روحها متحشمة ومتوترة ومخلطة عليها
محمد : ماتحبيهاش القهوة
رنا : لا عادي نشرب فيها
محمد : خيرك ماصبيتيش
رنا معاش عرفت شن تقول : اااا😳
محمد زبطها متوترة مدلها طاسة امية وضحك : حتى هده يشكرو فيها
رنا خدتها وضحكت
محمد : لقيت حوش بنقعدو فيه الفترة هده
رنا : ايجار
محمد : اي
رنا : امتى بنحولو
محمد : والله كانك عليا نبي اليوم قبل غدوا
رنا : عادي تو انادي علا وبلسم انضم اني وياهم الدبش
محمد : به تمام
رنا : اا بنسألك
محمد : شنو
رنا : ماقدرتوش تعرفوه الخانب اللي خشنا
محمد : لالا ماعنديش خلوق نحرق دمي
رنا : مش شاك في حد انت
محمد حسها تلمح علي حاجة: زي مني😒
رنا : نعرفش نسأل فيك اني...
محمد : لا مش شاك وانتي شاكة ف حد
رنا : مافي حد فيه ثقة نشك حتى في روحي
محمد شبحلها : كان في حد شاكة فيه قوليلي ماتقعديش تلمحي واني مش فاهم شي
رنا : اني نقدر نوصفلك شكله اللي لمحته وانت فكر كويس مرات تعرفه
محمد : كيف شكله
قعدت رنا توصف فيه وكل شوية تقول تلقيحة تحسسه ان خوه مرتضى
محمد : شكلك دايرة حد في راسك
رنا : مرات
محمد شبحلها
رنا : ولاحظ ان الشخص هدا يجي لما انت مهناش بس يعني زابط امتى تمشي وامتى تروح
محمد : ساهلة هده اي حد يشوف سيارتي يزبط😑
رنا قامت كاتفها بتعجب
°
•
°
•
°
مقعمزة مسرة وتفكر في كلام وليد
" اول مرة شخص يقولي كلام هكي... هلبا ينعجبو بيا ويغازلو فيا لكن كلهم يقولولي مغرورة وعنيدة...اول مرة شخص يقولي داخلك بنت طيبة ورقيقة ....حلو كلامه❤ غير الولاد اللي كلمتهم قبله....به معقولة كلهم نظرتهم ليا غلط وهو الصح...زعما نعب بيا زي ماقالت هيام🤔 اي مرات علاش لا😌"
~~
~~
نادر مقعمز يدخن وجوه متنكد وبين عيونه الكلام اللي قالتهوله ماما وتنهد
" مفهمتش علاش البنت هده هكي حضها...كل ماتفرح بحاجة تتسكر في وجهها....سبحان الله ع قد م مسرة مدلعة ومحضوضة ع قد م ليال مليعتها الدنيا من جميع النواحي 💔....معقولة مستحيل تجيب صغار ف حياتها...معقولة لين تموت مش حتحسه الشعور هدا
اااه....به سراج شن نقوله وكيف نبررله موقفها "
شوية وشرين تلفونه شاف لقاها ديما ابتسم ورد : اتصلتي ف وقتك💞
ديما : اصلا ديما وقتي😌 ولا عندك كلام تاني😜
نادر ضحك :علاش يقدر الواحد يقول معاك كلمة انتي😍
ديما: استاحشتك ❤
نادر : حتى اني...حبي بنقولك
ديما : قوول
نادر : بنجي نطلبك...عييت بروحي اني
ديما ضحكت من عيونها وحطت ايدها ع قلبها الي بيطلع من الفرحة : تعالى من شادك🙈
نادر ضحك : بتهبليني بصوتك ره
ديما تضحك
نادر : تضحكي ياشينة ❤
°
•
°
•
°
🌒
عمر : خيرك انتي وراجلك
بلسم : مد ايده عليا المسخ😭
عمر: حتى انتي لسانك طويل وماتهنيش ف روحك 😠
فريال تعصبت : ديماااا خووواااتك غالطين وديما الحق علينا احني ماعمره واحد جي ف صفي لا اني لا بناتي 😠 شني ملوحين في الشارع تحسابوهم
عمر : بننتك قليلة ادب نعرفها اني 😠
فريال : تي ياااسر ياسر امس سراج مسح بيها الارض علي خاطر عقاب مفعوصة وتوا انت بتزيدها
احمد تنهد : يام خليك ف موضوعك ماتصبحيناش في مشاكل تانية😒
فريال : لا مش مشاكل تانية اني مانرضاش علي خاطر وحدة عيلة مفعوصة يرعشني ويرعش خواته 😡
عمر : وهم علاش يدخلو في روحم في مواضيعه
فريال : مش مواضيعه😒احني نعرفو البنت اللي تصلح بيه ونعرفو بنات الناس مش هو
عمر : تي هووو يبيها انتو شن دخلكم نبي نفهم هي حياته ولا حياتكم
سندس : عندها حق عمتي خواته لازم يختاروله البنت المناسبة وهم يعفرفو النساوين كيف يفكرو
عمر ماباش يعبرها بكل وقعد يكلم ف امه : المشكلة البنت المحترمة ماتبوهاش ماطيحو الا ع البنات اللي يدرهو الكبد😡
فريال: توا هديكا بنت المطلقة طلعتلك بنت ناس
عمر : تي معاش تدوي ع المرا حرام عليك ره تلقيه ف بناتك
سندس : والله ياعمر هدا الواقع امها مطلقه وماتشرفش تكون كنة صراحة
علا شبحت لسندس : انتي اسكتي وماتدخليش في مواضيع ظاتخصكش😒
سندس نصدمت برد علا لان تحسابها بتجي معاها
بلسم : اي عندها حق سندس ماتشرفناش وحدة زي هده
علا : يابلسم انتي قرري لما بتخطبي لولد لكن في موضوع سراج ماليكش الحق تدخلي
بلسم : خيرك حتى انتي قلباتك علينا😏
علا : لا ماقلبني حد لكن مادخلكمش فيه هده حيااااته هو خاصة بيييه هو
عمر تنهد وناض : عليك عيلة غبرة😒
ناض عمر روح هو ومرته وبنته وطول الطريق وهو يغلي من سندس اللي تزيد تولع ف النار وماباش يدوي بكل لين وصلو
سندس : نديرلك تتعشى
عمر شاد ماريا يلعب فيها وماباش يشبح لسندس بكل
سندس : عمررر نحطلك تتعشى
عمر عيط عليها : مانبييؤيش نتسمسم فوتي جد امي ترا
سندس تتكلم ببرود : غر بالشوية البنت خلعتها😒
عمر حط ماريا وناض : اعود بالله منك ومن التقعميز معاك
طلع وقربع الباب قريب طيره ونزل قدام حوش سراج واتصل ب داليا لقاها خارج الخدمة زاد ولع 😡
°
•
°
•
°
هناء : ماقدرتش نجي المدة اللي فاتت كنت مضغوطة 😢 وجعتني خويلة سهيلة هلبا 😢
وليد تنهد وسكت
هناء : غزل شن دايرا
وليد : صابرة شن بدير💔
هناء حطت يدها ع يده : وانت 💕
وليد صارتله قشعريرة وشعور غريزي زي اي راجل لان طريقة لمس ايدها لايده كانت مليانة خبث
سحب ايده بهدوء وحط ايديه ف جيبه ولفت وجهه للجيهة التانية
هناء : خنخش نشوف غزل
وليد : تمام ☺
خشت هناء ومشي وليد قعمز في سيارته ركب سكر الباب تكى راسه ع مسند الكرسي وطلع باكو الدخان جبد سبسي ولعه...
كان حاس بغيبة امه وحس الدنيا صاغرة بيه 💔 حاس روحه وحيد رغم وجود غزل بس امه كانت قريبة منه هلبا هلبا
زغللو عيونه وقعد يخبط ف راسه بالشوية ع المسند وضاغط سنونه وشاد قبضة ايده...
خدي التلفون فتحه قعد يتفرج ع رقم مسرة بيتصل ومتردد
ولا شعوريا نسي انها مغرورة متغطرسة شايفة روحها نسي كبريائه نسي كل شي لقي روحه حاط التلفون ع ودنه ضاغط عليه ومسكر عيونه ويسمع في توووت توووت وموتره صوت التلفون وهو ينادي وكل ماينادي قلبه يزيد ينقبض...
وفجأه ردت بصوت هادي : الو
وليد سخن مع بعضه وخدي نفس عميييق وحاول يتمالك نفسه وتكلم بنبرة صوت فيها رعشة وتوتر غريب : ايوا❤
مسرة : اهلين
وليد : اهلا بيك شن الاخبار
مسرة توترت من صوته وحست فيه غرابة : تمام شن اخبارك انت
وليد بحرقة : مش مليح بكل 💔
مسرة حست روحها مسؤله عليه وكأنها امه اخته او حبيبته❤ او شي اكبر من هكي
مسرة : علاش خيرك
وليد فاق لروحه : فوتي فوتي...المهم اتصلت نسأل عليك بس لقيت روحي نشكي😂
مسرة : عادي ولا يهمك فضفض لو تعبان ❤
وليد : من امتى الحنية 😂
مسرة : الحق فيا اني اللي بنسمعك 😒
وليد همس بهدوء : مش قتلك داخلك بنت رقيقة وطيبة 💓
مسرة ضحكت
وليد في داخله " محلا ضحكتها 😍"
وليد : اختي غزل حباتك
مسرة ضحكت : والله 😊
وليد : اي قتلي قلها تجي تاني
مسرة : حتى اني حبيتها وخشت خاطري...قلها هي تجيني
وليد : عادي هي مأتر فيها غياب امي هلبا وحسيته ارتاحتلك ياريت تخليك علي تواصل معاها مرات علي ايدك انتي تولي زي قبل 💕
مسرة : اكيد مش حنجي زي امها لكن بجد لو هي ارتاحتلي عادي تجيني ولا نجيها مرات نهون عليها شوية...هي واضح عليها حساسة هلبا
وليد : اي...ومشكلتها ماتنسجمش مع اي بنت...تصدقي لحد الان عندها صاحبة وحدة بسس ومسافرة
مسرة : خلاص عطيني ايميلها ولا رقمها ونهدرز معاها 🙂
وليد : تم 💕
~~
سكرت من وليد وحاسه قلبها بيطلع من مكانه...فرحت لاتصاله حساته بدي يرتاحلها وهي بدت تتعلق بيه...واول مرة يعاملها شخص بالشكل هدا💕...عادة اغلبهم معرفة سطحية وباقيهم معاديتهم وتكرههم 🖤(يعني مسرة وطبعها الواعر )....لكن هو ولاول مرة يحسسها بأنوثتها...طلع هلبا حاجات مدسوسة داخلها حتى هي ماكانتش تعرفها...طلع منها بنت تانية بشخصية تانية حببها ف نفسها وحببها ف الدنيا وحست قلبها رجع يقوى بعد ماكسره مؤيد💛
~~
سكر وليد وقعد يشبح لمدة المكالمة ومبتسم وحس المكالمة انتهت بسرعة....
"خيرني اني...معقولة حبيتها ولا هدا مجرد اعجاب ولا شني اللي صاير بالزبط...خيره عقلي يتلخبط لما نتكمل معاها...خيرني نبدا انسان تاني لما نتكلم معاها💕 خيرني ننقلب لواحد تاني ؟!!"
°
•
°
•
°
🌒
ترررن 📱
شفت لقيتها علا بنت عمي استغربت كانت الساعة 9 في الليل "شن تبي هده...زعما في حاجة😳...انصالها غريب...خلي نرد وخلاص "
اني : الو
علا منحرجة : اا اهلا
اني ببرود : تفضلي
علا : بنهدرز معاك شوية لو فاضية
اني جي قدام عيوني طريقة دوتها ف حوش رنا وتهزيبها وكيف هانتني هي واختها : لا مش فاضية الحق 😊
علا تنهدت : به عارفة روحي غلطت وعارفة كلامي يجرح لكن خليك خير مني واسمعيني 😢
اني : شني انبك ضميرك امالا😏...شوفي اني طيبة طيبة لكن وقت مايفيض الكيل ننقلب وحدة تانية
علا : لا انتي مش طيبة ياليال وسامحيني فيها بس عندك قلب من حجر و اللي دايرتيه ف سراج مايديراش حتى عدو لعدوه
اني خنقتني العبرة...علا الحرفة الواعرة تكلم فيا وواجعها معناها واصل لحالة احرف من حالتي
اني : مش قلتولي ماتبونيش ولو اخر بنت في الدنيا خلاص واني مانبيشي خوك ولو اخر بنادم ع وجه الارض
علا انفعلت: سرااااج شن دنبه احني تعاركنا معاك علاش تردي فيه لسراج...ياليال سراج بيهبل وكل يوم حالته التالي 😢💔
اني جتني ضحكة هستيرية : ههههههههه انتي مريضة ولا عندك انفصام ف الشخصية وحدة من التنين....يوم تقوليلي مانبوكش ويوم تقوليلي حرام عليك تي انتي شني بالزبط
علا : اني غلطت ونعترف اي بس ماكنتش نحسابه يحبك هكي...ماتوقعتش هكي يصير فيه...
اني سكرت عيوني ونزلت دمعه حارة ع خدي وقلبي تقول من يقطع فيه بسكاكين من كلامه عليه و ع اللي صاير فيه 💔
اني : الله غالب كل شي بالنصيب 😔
علا : بجديات تدوي
اني : اي شن نلعبو احني
علا : وسراج
اني : ربي يرزقه ببنت الحلال 😢
علا تنهدت : تمام واسفة ع الازعاج وياريت تنسي اللي صار في حوش رنا ونرجعو زي قبل
اني : هههههه من عقلك تدوي😢
علا : اني لعبتلي براسي بلسم وهي اللي خلتني نطلع كلام يجرح...لكن والله فقت علي روحي وعرفت روحي غالطة واحني بنات عم ع قولتك
اني : باي 😢
علا : باي 😔
°
•
°
•
°
مقعمز في مكتبه ويلعب بلبيرو وسارح...
عايش في صارع بين قلبه وعقله...مايبيش يعيش دور الحبيب الضعيف مايبيش يترجى ويبكي ويدير اللي يديرو فيه العشاق المتفارقين💔 مايبيش ينزل كرامته ....مايبيش يحس انه محتاجني انه يبيني مايبيش يعترف لنفسه انه واصل لحالة الادمان...مش متعبه فراقي زي مامتعبه انه يعيش ع قناعة زيها زي غيرها...يقنع بروحه ف حاجات في داخله عارف ومتأكد انها كدب...يضحك يهدرز يغني وحتى بدي يراسل ف بنات ويهدرز ويشغل في روحه ويكابر كاتم داخله الدموع ويقنع في روحه ان مايبكيش ع بنت...كاتم الحزن ويقنع ف روحه ان مايخليش ضحكته تتلاشى ع خاطر بنت...بس الي داخله....
اللي داخله يهد جبال 💔
°
•
°
•
°
فريال تنقرز بروحها : اني والله لما نمشيلها اللي سماها نجلاء ونوريها هي وبنتها ونقوللها تخلي ولدي ف حاله السحارة المسخة 😠
علا : ماما البنت فاتاته خلاص وهو اللي يبيها وبعدين انتي ماقدرتيش علي ولدك بتمشي تكلمي نجلاء تي والله لو يديرها فراسه وبياخدها لما ياخده بالسيف علينا وعلي امها
وعلي خشة سراج
علا : وحتى لو خداها عادي البنت نفسيتها كويسة
فريال : هده انتي هكي تقووولي😠 سحرتكم كلكم شورها
علا ناضت: ماما تبوها ولا تكرهوها انتو اللي متع مشاااكل ومهما صار حيطلع الحق عليك انتي وبلسم لان ليال محترمة وانتو عارفين الشي هدا لكن لا ماتقدرووش اطلعوها كويسة مستحيل لازم تنزلو فيها 😒
وطلعت علا لقت سراج متكي ع طاولة الاكل ومربع يديه ويسمع
علا فرحت انه سمع كلامها لان كانت تبي تكلمه ومش قادرة...قعدت تشبحله بخوف : حمدالله ع السلامة 😳
سراج : الواحد يجي اهني خلوقه تطبق للنم 😒
وطلع وهو مغلول من كلام امه ركب سيارته ومشي في المكان اللي يحب يمشيله لما يبدا متعصب ...نزل من السيارة وقغدف قدام البحر قام يديه وغرس انامله ف شعره وقام راسه شبح للسمي ورجع شعره لتالي وتنهد بحرقه ومع التنهيده : ياااااارب 💔
°
•
°
•
°
#السبت "في شقة تسنيم💕"
اني : امتى بتسافرو بالزبط
تسنيم : الفجر
رتاج : ياقلبي بنستاحشك😢
اني : تعرفو بكيت بما فيه الكفاية خلاااص ماتبكونيش😤
تسنيم خانقتها العبرة : حتى اني ماتبكونيش بليييز 😢
ع سعاد : السلام عليكم
اني : اهلين عميمة
مسرة : عمتوو شن الجو
ع سعاد : شن جوكم شن حالكم
رتاج : بخير الحمد لله
طق الباب ناضت تسنيم فتحت
تسنيم : اوووو اهلا اهلا خشو
علا : شن الاخبار
تسنيم : الحمد لله وشبحت لمريم : مريوومة شن الجو
مريم وجهها اصفر وحالتها حالة : باهي🤢
رنا : هاااي
تسنيم : اهلا رنوش تفضلي
سلمو وقعمزو اني كنت نصلي وبعدين جيت...طبست علي علا ومديت ايدي وهي جبدتني وسلمت عليا بحرارة (سلمت بالبوس ) خليت روحي عادية مابيتش نطنش وهكي
وقعمزنا نهدرزو وقهوة وشاهي ومشي الجو
رنا : مريم منضرك مزري 😣 كرهتيني ف الغار والجياب 😂
علا : لالا هي تدلع
مريم : ندلع ودانك ياكلبة🙁
مسرة: وجهك زي الليمة
مريم : تعرفي مانتحملش ف ريحة شي...
اني : شن بيفوتهملك هالشهور😣
رنا : يفوتو يفوتو وتلقي ف ايدك بيبي عسل زي بوه😌
علا : ولا زيني متلا😌🙈
مريم : تعرفي علا كرهتك الفترة هده من كتر مانشوف ف خليقتك شكله البيبي بيطلعلك 😅
علا : اما وقاحة بعد هكي ماريتش 😶
تسنيم : مرت خوكم صريحة فوق اللزوم😂😂
وقعدو يهدرزو ع البيبي والوحم والجياب والدوا هده
قعدت نتفرج ع مريم كيف تعبانه وواضح عليها التعب بس رغم هدا في ف عيونها فرحة الامومة وواضح عليها انها تستنى في البيبي...
ماننكرش😢 اني حسدتها 💔
ع سعاد : من جابكم انتو
رنا : اني جابني محمد
مريم : اني وعلا جابنا سراج
بيني وبين نفسي : سراج ؟؟😳 واااك انشالله نطلع ومنشوفاش😣
~~
تررن تررن 📱
شبحت مسرة للتلفون ابتسمت وحطاته صامت
شبحنالها كلنا وكانو عيونها فاضحينها
اول مرة في حياتي نشوف مسرة هكي...اول مرة نشوفها تبتسم في ابتسامة صادقة وبريئة😇
متغيرة كلياً ومتغير طبعها هلبا هلبا حتى معاي اني
مريم شبحتلها وضحكت : شنو منو 😜
مسرة : ههههه الهي ف روحك😌
~~
~~
~~
نادر : الفجريات طالع ؟
قيس : بادن الله
سراج : من بيوصلك
قيس : والله بيمشو امي وبوي معانا وممكن صاحباتها ديما وهم منبتينه😂
نادر : فوق تعشيش ولا ماتفهم شي بالدات رتاج 😂
قيس يضحك : علي ساس اختك ليال ماتعشش😂 تي تتصل بيها في الدقيقة سبعميت مرة
سراج وجهه تغير لما نجبدت سيرتي ووصل لحالة انه معاش قادر يسيطر ع روحه قدام الناس...اول مايسمع اسمي يبان عليه العداب والحزن وحتى اللي مايعرفش يعرف
نادر شبحله لقاه منزل راسه ويهز ف رجله...اتصلت تسنيم بقيس تبيه يجيبلها حاجات ناض مشي وقعدو هما الزوز برحهم
نادر كيف بيتكلم : ااا
سراج قص عليه : بنرقد النم قريب نمشي ونخليهم 😑
نادر زبطه انه مايبيش يتكلم في موضوعي اني وياه
نادر : كلمهم ينزلو
سراج : مايردوش درهولي كبدي...خلي نركب نقلهم هيا
~~
~~
كنت لابسة بلوزة عنابية سمبل وسروال جسكار جلد لاصق هلبا ودايرة شعري ضفره ع الجنب وكان واصل لنهاية خصري وحاطة ميك آب خفيف
طق الباب طلعت بنفتح والصدمة 😳....
🌷يتبع🌷
.
.
#_timOo_HA💛
