#__وتين__🍃
🌷الحلقة 70🌷
سراج : واخيرا رديتي
اني : كنت راقدة 😪
سراج : هههه ونوضك سراج المزعج
اني : سراج مش مزعج بكل 💔
سراج ضحك : نجيهولي العسل وخلاص❤
اني : وين
سراج : في فراشي وين بنكون يعني
اني : علاش الساعة كم
سراج : الساعة 2 ياانسة
اني : حي ع الجو
سراج : به حبيبي بري كملي نومك ❤
اني : سراج بنقولك...
سراج : شنو
اني خنقتني العبرة : نحببببك 😢
سراج : نموت فيك 💕
وبكوون جايي ودعك وبكوون....🎵
وقلك حكي بيوجعك وبكوون...🎶
وفجأة القلب بيلين..وينسى وجع السنين..وبصير كلي
حنيين...واحلى كلام بسمعك....وبكوون جايي ودعك💔
°
•
°
•
°
رنا : شن قلتولها البنت...علاش روحت بسرعة 😡
بلسم: خيرك تعيطي علينا تقول عيلات قدامك
رنا : لان اديرو في تصرفات عواويل😠
بلسم : هه😏 تو تنفعك ليال اللي تزمزكيلها
رنا : ادوي باهي بالله عليك وانتي اسلوبك يجيب القداد
علا : نقصو صوتكم 😶
رنا : مافهمتش كيف الواحد بيتفاهم معاكم 😑
°
•
°
•
°
ترررن ترررن 📱
هناء شافت التلفون وابتسمت وبعدين ردت : الو
وليد : الانسة هناء موجودة 😜
هناء : اي من نقوللها😌
وليد : قوليلها يبيك المدير 😌
هناء : مدير ف عييينك😂
وليد ضحك : شنج.
هناء : تمام
وليد : وين معاش ادوري ياتافهة
هناء : نستنى فيك انت ادور❤
وليد ضحك : بنسألك
هناء : شنو
وليد : البنت العبيطة هديكا
هناء : من هي🤔
وليد : متع الصور يازهايمر
هناء ضحكت : اها.... مش زهايمر لكن اللي يتكلم معاك عقله يتشوش..
وليد : تعاكسي ولا كيف😉
هناء ضحكت : اي خيرها البنت
وليد : كلمتني تاني
هناء : شن تبي
وليد : صاير معاها موضوع وتبيني نساعدها
هناء : قصدك قصة خالها😏
وليد : تندري؟؟
هناء : اي شكلهم عيلة وخالها ميلاد😂
وليد : هههههه موقحك النم
هناء : شن قلتلها
وليد : اني ماقلت شي بروحها كلمتني وبروحها تعفلقت وبروحها قتلي معاش نبي منك شي كله بروحها😂😂
هناء تكلمت بسم : مريضة😑
وليد : خيرك انتي شكلك طايرتلك منها
هناء : باردة حسيتها
وليد ضحك
هناء : انت مسحت صورها؟
وليد : ماهو سألتيني وقتلك
هناء : نزيد نتأكد
وليد : اي مسحتهم شني ماتعرفينيش 😒
هناء : اني اللي نعرفك❤
وليد : والله اني الحق قبل بنساعدها
هناء انفعلت : علااش😡
وليد : هكي عادي من غير سبب
هناء : لالا فوتها بدخلك في مشاكل ره
وليد : مشاكل شنو هو خالها محبوس وموضوعه مش كبير عادي فيها كيف نطلعه
هناء : به علاش ادير في هدا كله
وليد : هكي من غير علاش
هناء : لا مافي شي يجي من غير سبب
وليد : لا اني ندير في هلبا حاجات من غير سبب😉
هناء : عجباتك😒
وليد : ههههههه قصدي في قاموسكم ساعدتني معناها تحبني...تي عادي طلبت مني نساعدها ساعدتها شن فيها
هناء : باهي براحتك لكن اني بديت نغار ره
وليد : تغاري ؟؟...لالا انتي مكانك محفوظ يا...صديقتي😏
هناء : به شن تبي مني توا
وليد : اني مانبيش ندوي معاها هي لكن نبي نطلعه خالها...ونبيك تجيبيلي معلومات علي اسمه ووين محبوس والدوا هده
هناء : هدا ماناقص...برا دور بروحك😒
وليد : ماهو ياهبلة مدامك تغاري كلميها انتي واسأليها خير مانكلمها اني صح ولا 😉
هناء : لا مش حنكلمها
وليد : به تمام...تو تنحلها بطريقتي
°
•
°
•
°
اني : الو سراج
سراج : ايوا حبيبي شن الجو
اني : نبي نشوفك ضروري 💔
سراج : في حاجة
اني : نقدر نشوفك ولالا
سراج : اي عادي وين انتي
اني : في الكلية
سراج : نجيك غادي
اني : اي وخلينا نمشو للمكان اللي رفعتني ليه
سراج ضحك : عجبك
اني : نستنى فيك...😔
~~
~~
#بعد_ساعتين
اني مقعمزة ف سيارته وشابكة يديا ف بعض وساكتة وسراج يشبحلي ومستغرب
سراج : حسستيني في مقابلة شرعية النم
اني ضحكت
سراج : واخيرا تواضعتي وضحكتينا
اني شبحتله وتنهدت و بعدين تلفتت للروشن وعيوني تعبو دموع بشكل لاارادي
سراج : علاش تبيني ضروري
تلفتتله وكان وجهي احمر واول مارمشت عيوني نزلت دمعة حارة ماقدرتش نسيطر عليها💔
سراج يشبحلي ومصدوم : خيرك
قرب وحط انامله ع خدي ومسحلي دموعي❤
للحظة حسيت روحي بنستسلم بين يديه 💕...كان خاطري نبكي نبكي ونطلع اللي داخلي كله وبعدين فقت علي روحي 😔 وادكرت ان لازم نبان قوية قدامه رغم ضعفي ورغم حزني ورغم التعب اللي داخلي لازم نبينله العكس ومانخليشي يحس اني مكسورة...
حولتله يده من علي خدي ومسحت دموعي وهو يشبحلي ومستغرب : حبيبي في حاجة
اني : اي في...
سراج هز راسه بمعنى شنو
اني تكلمت بحدة وبجدية غير كل مرة: سراج اني حبيتك واللي حسيته معاك في حياتي ماحسيته اتجاه ولد ولا عمري حنحسه...لكن😢
سراج بصدمه : لكن شنو ...
اني الدموع غطو وجهي : لكن اني معاش نقدر نكمل معاك...
سراج يشبحلي وساكت والصدمة في عيونه
اني : سراج قدامنا مشوار طويل وكله مصاعب وحنتعب ونتعبك معاي...💔
سراج : الكلام هدا عارفينه وقلناه من البداية لكن اتفقنا ان مايوقف في طريقنا شي وشكلك نسيتي وجاية توا بعد اللي صار بيننا تعاوديلي في نفس الكلام 😒
اني : مش نعاود في نفس الكلام لكن صارت هلبا هاجات تانية خلتني نعيد النضر 😢
سراج ضحك بهزوة : هه تعيدي النظر ؟؟😏
اني : حتتعب صدقني لو كملت معاي وحتى لو قعدنا مع بعض حيجي يوم وبروحك تجي تقولي اني معاش نبي.... واني ياسراج مانبيش نوصل للنقطة هده خلينا نبعدو من توا احسن 💔
سراج انفعل : اني مش عييل وماتورينيش انتي شن بنحس وشن بندير😡..... والكلام اللي تقولي فيه عارفه...ومن الاخير هكي انتي معاش تبي عادي صارحيني قوليلي اني معاش نحبك ولا اني ماحبيتكش من الاصل لكن بش تجي تقوليلي انت بتتعب وانت بتزعل وعلي اساس خايفة علي مشاعري والكلام الفاضي هدا كله مايخشليش دماغ
قعدت ساكته والدموع ينزلو وماقدرتش نقول شي وهو طلع باكو الدخان وولع سبسي حطه في فمه وبعدين نفخ الدخان 💨 من فمه مع تنهيده من وسط قلبه وحواجبه مقرونات و حاط ايده التانية ع الستيرسو متع السيارة (الدومان) ويخبط عليه بأنامل ايده بهدوء بس بطريقة توتر وفاتو قريب 5 دقايق واحني ع الحال هدا...💔
اني : متمنيا ان الموضوع ماينتهيش بعداوة بيننا حتى علي عيون العشرة اللي صارت و...
سراج قص علي كلامه : ههه بالله عليك....كيف تبيني متلا نشوفك نسلم عليك عادي زيك زي اي وحدة من العيلة...ولا تبيني نكون معاك صداقة ولا كيف...😒 تحسابي الناس لعبة في ايديك انتي ولا شنو
اني نسمع وساكتة
سراج : تعرفي الكلام اللي قلتيه في الربع ساعة هده مسح كل كلمة قلتهالي قبل 💔 كل شي صار بيني وبينك حتى لو ابتسامة طلعت منك اكدتيلي توا انها كدب
اني خانقتني العبرة : ماتجرحش بالكلام😢
سراج : ولو متوقعتيني بنترجاك وبنبكيلك والجو الزايد هدا... انتي غالطة اني لما حبيتك حبيتك من قلبي و بجد.... ولما بننساك حننساك بجد وماتستنيش مني شي
اني : مش مستنيا منك شي يكفي انك تكون بخير 💔
سراج حط ايديه علي عيونه ونزل راسه : انزلي من السيارة
شبحتله وعيوني مزغللات بالدموع : سامحني لو جرحتك لكن هدا اللي لازم يصير 😢
سراج ابتسم : نسامحك ؟؟....لا اسف والله مانقدر نسامحك ولا حيجي يوم وتسمعيها مني
اني : لو عرفت السبب اللي سيبتك علي خاطره حتغير كلامك
سراج : في حياتي ماحنسامحك ياليال وفي حياتي ماحنتمنالك الخير مهما كان عدرك 🖤
اني : براحتك
سراج : تقدري تنزلي 💔
فتحت باب السيارة ونزلت وسكرته بهدوء وعطيت بالظهر وقلبي يتقطع بالطرف وهو يشبحلي من روشن السيارة ....
°
•
°
•
°
🌒
ع عبدالله : عمر امتى مروح
سندس : علي اساس بيروح امس لكن ماصارلاش
ع عبدالله شبح لمريم : وانتي راجلك وين
مريم : في الخدمة اكيد قريب يوصل
ع عبدالله : باهي ربي يعاونهم
فريال : ياعلااا كلمي سراج شوفيه وينه العشي بنحطه
علا : تي عطل اكيد بايت في حوشه هو وصحابه ياماما😑
فريال : تو نقطعله مرات يروح عقاب الليل
سندس : بالله يامريم مديلي ماريا
مريم : تعالي ميورة هي
فريال تشبح لمريم وبعدين نادتها : تعالي يامريم شوية
مريم ناضت خشت معاها للكوجينة
فريال ضحكت : تو شني مافيش حاجة جاية في الطريق😉
مريم تحشمت : هههه مزال
فريال : عاد شدو الهمة نبو عيل 😜
مريم وجهها ولا احمر
فريال : اني بنسألك ع المنجوهة اللي سماها ليال
مريم : خخ خيرها 😳
فريال : حق يبيها سراج ؟؟
مريم : ااا نن نعرفش اسألي رنا ديما سراج عندها واكيد يحكيلها
فريال : عاد هي صاحبتك 😏 اكيد مادسش عليك شي
مريم سمعت صوت احمد استغلت الفرصة : ااا احمد جي خنطلع نشوفه 😁
طلعت مريم بسرعة وقعمزت جنب احمد وبدت تنخص فيه تبيه ينوض
مريم : هيا نركبو
احمد : باهي اصبري
ع عبدالله : تي وين العشي يافريال
علا : ماما كان طيبت العشي خودلك ساعتين تشحيط😂
احمد : ونوضي حطيه انتي ياسموحة 😒
مريم : هي نركبو احمد بالك العشي شوية
احمد: تي جعان نبي ناكل 😑
ع عبدالله : اقعدو تعشو يامريم خيرك
مريم : والله ياعمي حتى اني عشاي طايب فوق
علا وشوشت لمريم : معاش قادرة تصبري 😂😂
مريم قرصتها : سكري فمك ياحيوانة اني نبي نهرب من امك اللي شادتني وتقصقص فيا علي سراج وليال
علا : 😂😂 لا عندك حق نصيحة انفدي بجلدك
مريم : خوك معاش بي ينوض الهم 😑
مريم فنصت في احمد بمعنى هيا...ناض احمد : هي تصبحو علي خير
علا شبحت لاحمد : إن اللبيب من الاشارةِ يفهمُ😂
احمد شبح لعلا و ضحك
~~
احمد راكب في الدروج : خيرك بصلتك محروقة
مريم : عشانا طايب علاش انزيدو فيهم... زحمة
احمد : هدا علاش ؟😒😒
مريم : وامك شادتني وتقولي مافيش حاجة في الطريق حسستني اني خاشة في جسمي من داخل ونشبح
احمد :😂😂😂
مريم : لا وتقولي حق سراج يبي ليال....تعرف اني بديت نتخضر ونتصفر😂
احمد يفتح في باب الحوش : والله الا مسكين سراج دايرين راسهم وراسه
مريم تنحي ف بدلة الصلاة : حتى لونا تسخف والله مافهمت علاش يعاملو فيها هكي
احمد : اي
مريم : كان تشوف خواتك كيف يشبحولها في حوش رنا قريب ياكلوها اني بروحي خفت😂
احمد تنهد وقعمز ع الصالون وخدي الريموت : خواتي هادو مايقدر عليهم غير ربي
مريم : نحط العشي حبيبي
احمد : لا خليه تحفه
مريم : فيكم غر التلقيح ياهمي
احمد : اي هدا الموجود 😊
~~
~~
~~
#بريطانيا
عمر راقد ع ضهره متكي ع السرير وداليا راقدة علي صدره وهو يلعبلها بشعرها: غدوا عندك مراجعة ولا
داليا : اي
قعدو يهدرزو شوية وبعدين داليا حطت كلينكس ع فمها وكحت ولما نحاته كان كله دم قعدت تشبحله
عمر جبده منها ولوحه : حتواجهي الحاجات هده ديما ماتركزيش هلبا 💔
داليا خنقتها العبرة وحضناته : تعبت اني😢
عمر رقد ع جنبه و قربها ليه لف ايديه عليها : سلامتك من التعب ❤
داليا : نحبك
عمر : نموت فيك اني
°
•
°
•
°
وصل سراج لحوشه والدنيا مظلمه في وجهه ومش عارف روحه حتى كيف ساق ووصل للحوش..
خش قعمز ع الصالون من غير حتى مايفتح الضي طلع دخانه وولع سبسي ويهز ف رجله بتوتر وبعدين سند ضهره ع مسند الصالون وتكى راسه وسكر عيونه وتنهد بحرقة
كان حاس بالوحشة وحس الدنيا صغرت بيه💔 حاس روحه كأنه سافر لبلاد تانية ونقطع ع عيلته وناسه حاس روحه وحييد واكبر شعور كان مستوحيه هو الصدمة..
كان مصدوم بشكل مش طبيعي ومش مصدق اللي هو فيه لدرجة انه مش واعي ع روحة شن يدير وفاتت ساعة واتنين وتلاته وسراج بنفس التقعميزة ويدخن في واحد ورا التاني... ماوقفش تدخين بكل
~~
~~
اما اني...روحت للحوش وكانت الوسيلة الوحيدة للهروب من اللي اني فيه هو النوم رقدت ساعات طويلة ومافقتش نهائي لين سمعت صوت دوشا لوطا..
فتحت عيوني بتعب😪 نسمع في صوت ايناس ومسرة يضحكو وواضح ان جايهم خبر حلو...ماهتميتش للموضوع ومانضتش من مكاني لين خداني النوم مرة تانية
~~
~~
ايناس : كلمي خالتك قوليلها😀
ترررن ترررن 📱
مسرة ركبت تجري لدارها : تي كلميها انتي ياماما تلفوني يشرين اني
ايناس خدت التلفون واتصلت بأختها : ايوا امل شن الجو سمعتي....حكيم غدوا يطلعو...اي الحمد لله موضوعه ماطولش....شكله طاح ف ولد حلال ساعده
~~
مسرة شبحت الرقم مازبطاتاش ردت : الو
وليد : حمدالله علي سلامته
مسرة ضحكت : شكرا ❤
وليد : ولو
مسرة : مش رقمك هدا
وليد : اي نكلم فيك من المركز
مسرة : اها....والله مش عارفة كيف نشكرك بجديات
وليد : ههههه ياسر بلا نفاق وراس امك
مسرة : هههه لا والله مانفاق
وليد تكلم بصوت هادي : مفروض نحبسك انتي في مكانه
مسرة ضحكت : علاش
وليد : ع الكلام اللي قلتيه في القهوة...وكيف خليتي خالك يضرب خطيبك
مسرة : البادي اظلم 😏
وليد : ههههه ياخوفي تطلعي انتي البادية
مسرة : تؤتؤ...لو اني البادية كنت قلت مش حنخاف😌
وليد : عارفك
مسرة : تصبح علي خير
وليد : وانتي من اهله
°
•
°
•
°
☀️⛅
شمس جديدة خشت من بين فتحات الستار وضوت داري اللي مسيطر عليها الظلام الدامس والكآبة مجتاحتها 🖤 فتحت عيوني بالسيف...
فقت من النوم واني جثة ملوحة ع السرير 💔
جسد من غير روح....حتى النفس ناخد فيه بالسيف
من اول ما فتحت عيوني الدموع نزلو وكانت الدار هادية ومسيطر عليها صوت شهقاتي واني نبكي ودموعي عبو المخدة ومش قادرة
~~
~~
~~
كانت رتاج تتردد ع محل عبسي وصرفت فلوسها كلهم وهي كل مرة تشري حاجة من المحل رغم انه مش كل شي شراته عاجبها لكن كانت تشري في سبيل انها تشوف عبسي
وبعدين معاش لقت سبب تمشيله علي خاطره فقررت انها تشري قفطان عرس تسنيم منه مع انه قفاطينه مش حلوات هلبا ورتاج ماتلبش الا في الموضة لكن مشية لعبسي في المحل كانت تسوى الدنيا كلها عند رتاج ❤
رتاج : السلام عليكم
باسم ضحك : جت
عبسي عيونه في الوراقي ويحسب : من هي
باسم اشر بعيونه علي رتاج : اهيا
عبسي قام عيونه شبحلها وضكك: بنستغنو منها البنت هده😂
باسم : اي 😂
رتاج خدت القفطان وشبحت لعبسي : في اصغر برقم
عبسي شبحلها وبعدين شبح للقفطان : شوفلها ياباسم
باسم داير الضحكة الصفرة : قداش رقمه هدا
رتاج مدتهوله وعيونها علي عبسي وباسم معاها ع الخط : اي في اصغر ....اهوا
رتاج خداته منه ومشت مداته لعبسي : اعطيهولي هدا
عبسي مد ايده بياخد منها القفطان ومست ايده ايدها
رتاج صارتلها قشعريرة في كل خلايا جسمها حولت يدها بشل لا ارادي وعبسي ماركزش بكل ع الموقف
حط القفطان في الكيسة ومدهالها
رتاج تشبحله : شكرا ❤
عبسي قام عيونه وشبحلها : تبيدي بالهني
رتاج ابتسمتله
عبسي شبحلها باستغراب
كانت رتاج مأتر فيها الموقف لما ايدها مست ايده وقامت الكيسة وطلعت وهي متوترة ونست جزدانها ع البنك...
ماركزش عليه عبسي ولا الولد اللي معاه
~~
~~
~~
فاق سراج من النوم وطبعا مارقدش حتى ساعتين علي بعضهم💔
حول اليرغان من فوقه وخدي باكو دخانه وطلع سبسي وقعد يدخن وبعدين ناض بيخش للحمام خطم من قدام المرايا وبعدين ولا وقف قدامها وحط ايده اليمين ع الحيط وأيده التانية رجع بيها شعره لتالي وقدم وجهه للمرايا وقعد يشبح لوجهه وبعدين ضغط سنونه ع بعضهم و ضغط قبضة ايده بغل غله وضرب المريا بقوة دشدشها وايده تغطت بالدم...زغللو عيونه بالدموع : ااااه اااه 💔
°
•
°
•
°
🌒
رتاج : ماما جيبيلي معاك شنطي
امها : باهي
مدتلها امها الشنط فتحتها مالتش الجزدان
رتاج كشخت : منييي فتح شنطييييي 😠
بوها : صكري فمك ياحيوانة
امها : من بيمسهالك شنطك😒
رتاج : تي مالقيتش جزدااااني😑
دورت دورت وبعدين وقفت وادكرت لما طلعاته في المحل ودفعت وخلاته ع البنك..
ضربت علي راسها بإيدها🤦♀️ : حي ع النسوة 😶
مافاتتش ساعة وكانت رتاج مدرسة قدام محل عبسي وكان عبسي يسكر في المحل بيروح
رتاج جاته منحرجه : مساء الخير 😳
عبسي ينزل في سرانتي المحل ويشبحلها ومستغرب
رتاج : ااا اني العشية جيت وو ونسيت تزداني اهني
عبسي : اي صح لقيناه ع البنك توقعنا مولاته تجي بكري هههه
رتاج تشبحله كيف يضحك ومبتسمه ونست روحها لين شبحلها فاقت علي روحها 😳
عبسي : خنخش نجيبهولك
رتاج : به
عبسي : ااا هو في الخزن خشي للمحل استني خير من واقفة في الشارع
رتاج خشت وكان المحل مظلم..
خش عبسي للمخزن جابه وطلعلها : تفضلي
رتاج : اسفة تعبتك معاي 😊
عبسي : لا عادي
رتاج كانت تبي تفتح موضوع بأي طريقة: اا بنسألك
عبسي : تفضلي
رتاج : تردو ولا لا؟؟
عبسي : لا والله مانردوش لكن بدلو
رتاج : اها
عبسي : انتي تبي تردي حاجة
رتاج سكتت شوية ودورت كدبة وبعدين تكلمت : اا اي خديت منكم بلوزة لكن بعد ماروحت ماعجبتنيش
عبسي : والله الحق دايرين حجرة قياس مفروض قستي قبل ماتروحي بيها
رتاج ضحكت : اني قلت صاحبت لونا اكيد يساعدوني
عبسي مباش حتى يبتسم : عادي تعالي غدوا تو نردهالك
رتاج : شكرا 😍
~~
تدق ب بالي اسويها💕شيوخ كبار امشيها💕على بيته اوديها واخطبه💍...
واغير الكون قانونه💕واذا يقولون مجنونه💕جنوني مصدر عيونه احبه💛
وكانت رتاج معليا صوت المسجل وادربك ع دومان السيارة وعيونها قلوب قلوب مع انه ماعبرهاش لكن فرحانة لمجرد انها شافاته وتكلمت معاه وسمعت صوته #والحب_اعمى💔
°
•
°
•
°
#ومرو_يومين ☀️⛅
فريال : كان نعرف خوك وين مشي بسس😓
احمد : مافهمتش خيره حتى التلفون مايردش عليه
فريال : نشغلت عليه اني
احمد : تو نمشي نشوفه بالك في حوشه
علا مقعمزة تسمع في امها واحمد يدوو علي سراج وتدكر في الكلام اللي قلتهولهم في حوش رنا..
"#توا_اني_حنطلع_من_اهني_وحنكلم_سراج_ونقوله_ان_معاش_نبيه_وحنسيبه_وباش_ماتقولوش_اكيد_هواللي_سيبها_واكيد_معاش_يبيها_في_دليل_واحد_وهو_ان_سراج_الليلة_وغدوا_بالكتير_راقبو_جوه_وحتلقوه_يضحك_ويهدرز_وتعالو_شوفوه_بعد_تلاته_ايام_بس_وحتلاحضو_انه_تحول_لشخص_تاني..."
ناضت علا واتصلت بسامي
علا : حبيبي❤
سامي: اهلين حبي شنج
علا : تمام بنسألك
سامي : همم
علا : ماكلمكش خوي سراج اليومين هادو
سامي : اتصلت بيه البارح ماردش
علا : الله😓
سامي : والله...علاش شن في
علا : لا مافي شي لكن لينا قريب يومين ندورو فيه ومايرد علي حد
سامي ضحك : شكلها البيلا مزعلاته😂
علا : هههه علاش حاكيلك حاجة هو
سامي : تؤتؤ مايهدرزش في المواضيع هده لكن دكرني بروحي لما نتعارك معاك معاش نبي نكلم حد
علا تنهدت : وحتى هو شكله هكي صاير معاه
سامي : يبي بنت عمك هو ولا
علا : اي كيف عرفت
سامي : مراد يلقحله قدامنا مرات وبعدين قالتلي يارا
علا : شن قتلك
سامي : ياقصقاصة😂
علا : ههههه خوي مش حد غريب
سامي : يارا مرة هدرزتلي قتلي بنت عمه امها مطلقة وحاجاة زي هكي...زبطتها اخت نادر
علا : مشالله فاهم القصة كلها 😂
سامي : هههههه حاجة زي هكي
علا : تعرفها انت شخصيا
سامي : البنت ؟؟
علا : اي
سامي : شن جابني ليها اني من وين بنعرفها😑
علا : نسأل بس
°
•
°
•
°
🌒
وليد مقعمز يتعشى مع عيلته شرين تلفونه ناض خداه وطلع للجنان
امه : ولدي كمل عشاك
وليد : دايمة يما شبعت
طلع قعمز في الجنان
وليد : ايواا
هناء : ويلا شنج
وليد : تمام شنجك انتي
هناء: مليح 😊...قتلي هيام طلعت خال مسرة😑
وليد : من هيام حسيتكم تدوو عليها هلبا
هناء : بنت خالتي وصاحبتها
وليد ابتسم : صاحبتها؟
هناء : اي خيرك
وليد : شي...باي تلفوني بيتسكر من الشحن
هناء : باي
سكر من هيام وبشكل لا ارادي لقي روحه فاتح رقم مسرة وبيتصل
لكن شد روحه في اخر لحظه وقعد يفكر
" شن قصتي اني اىيومين هادو...خيرني نفكر فيها هلبا البنت هده وهي شكلها وحدة لفعة...
مش كل شي جسم وشكل حتى اخلاقها ليها دور وهده باين عليها اخلاقها مش زي مانبي
احسن حل نفك روحي من هالمشاكل"
خدي تلفونه وحط رقم مسرة في الرفض 🚫
°
•
°
•
°
سندس مقعمزة توكل في ماريا وطبعا عمر مسافر شوية وطق الباب
سندس ناضت فتحت : اووو اهلا زارتنا البركة 😊
احمد : اهلين سندس شنج
سندس : خش تفضل
احمد : لا غر بنسألك سراج في حوشه لوطا؟؟
{#ملاحظة عمر يسكن فوق سراج لو مدكرين😁 }
سندس : اي لوطا اعتقد لان سيارته ليها يومين ماتحركتش من قدام الحوش
احمد : اها به تمام
سندس : كان لقيته اركبو تعشو مدايرا كسكسي
احمد : صحيتي سندس
~~
كان سراج كيف نايض من نومه وقاعد ماصحصحش طق الباب ناض من غير حتى مايفيق علي روحه فتح
احمد واقف مصدوم : 😮....
🌷يتبع🌷
تفاعلكم ضعيف ياريت تنشطو شوية
.
.
#_timOo_💛
