#__وتين__🍃
🌷الحلقة 89🌷
رتاج : الاااا بري يطلعك خالك...قتلك م البداية ماتجيبينيش اهني قتلك مانبيش نتلاقا معاه ولا انتي خليتي الموقف هدا يصير
كان عبسي واقف في الممر و سمع اللي قالاته كله...
قعد واقف شوية وبعدين خشلنا للمربوعة...
اني ورتاج😨😨
عبسي شبح لرتاج : ولعت سيارتك كان بتطلعو اطلعو
اني : هيا هيا رتاج ونبي😁
رتاج 😑
طلعت نساوي في وشاحي وكيف بنطلع رتاج وراي
عبسي : رتاج
رتاج شبحتله : ااا نعم😳
عبسي : يا دخلي شعرك يانحي الوشاح لكن المنظر هدا اللي مش مفهوم مايمشيش حاله😒
رتاج : هكي نلبس فيه اني 😊😒
...
طلعت اني ورتاج وركبنا في السيارة
رتاج : وااااك المفتاح عند خالك
اني : افف😑
رتاج : انزلي جيبيه
نزلت بنجيب المفتاح وكان عبسي جاي بيعطيهولنا وتخاطيت اني وياه يعمي اني مشيت للحوش وهو جي للسيارة وماتلاقيناش
اني : عبسييي
ماما : مشالكم بيعطيكم المفتاح
اني :الهم واني جاية بناخده
ماما: ياقعادك يامادي 😑بين جاي وغادي
اني : مافيك من تلقيح ياماما😑
.....
جي عبسي وقف ع روشن رتاج ومدلها المفتاح : شدي
رتاج كيف مدت ايدها بتاخده عبسي رجع ايده لتالي وشبحلها : خطيبك مخليك براحتك شكله 😒
رتاج : كيف ؟
عبسي : مطاعم ولبس مشحط وفري....ولا طالعة وهو مايندريش 😏
رتاج : لا يندري وهكي جوه مايعدلش😒
عبسي ضحك بهزوة : والله حاسده
رتاج ببرود : علي شني ؟؟
عبسي : هههه ع الرجولية
رتاج : ...
😏..وممكن نكون حاسدة عليك
رتاج سخنت مع بعضها ووجها ولا احمر : ااا اع اعطيني المفتاح 😳
عبسي مدهولها ومشي
°
•
°
•
°
داليا : باهي دكتورة المرض مش مأتر ع الجنين
الدكتورة : لالا نهائي...بس الموضوع فيه خطورة عليك انتي الحق
عمر شبح لداليا وبعدين رجع شبح للدكتورة : ماتقدرش تنزله دكتورة
داليا : شن انزله 😶
الدكتورة: والله الموضوع يصعب لان البيبي كبر وهي توا قريب تخش الخامس وكل ماتزيد المدة كل مايزيد الموضوع خطورة علي حياتها ره...اني متأسفة م الكلام اللي نقول فيه لكن لازم نوقضكم
داليا : احني عارفينه الكلام هدا واني توا جاية نبي نطمن ع حالت البيبي بس وحالتي اني مش ضروري كل مانجي تقوليلي 😒
عمر : داليا 😐
°
•
°
•
°
سراج : اوووو ميرو عندنا
ماريا مشتله تجري وحضناته: عمووو
سراج باسها : تي وين وين هكي مادوريش بكل
ماريا : انت دورث بتل
سراج : هههه ياودي والله الا ليك وحشة ياميرو
ماريا : بنبات عندتم اني😊
سراج : والله
ماريا : اي
سراج : معناها اليوووم نرفعو عروستنا ندهورو بيها شن رايك
ماريا هزت راسها بمعنى اي
سراج : وين تبي نمشو
ماريا : اممم🤔..ملاحي الاعاب
سراج : باهي نمشو للملاحي😂...بري وتي روحك هي
ماريا : به 😀...
علا طلعت م الدار : اهلا
سراج :اوو حتى انتي اهني
علا : بترفعني للملاهي 😁
سراج : بنرفعك للمولى عز وجل 😂
علا : تفو 😒
فريال : التلفون الارضي يشرين ردووو
☎️
علا: الو
سندس: الو
علا : اهلا سندس كيف حالك
سندس : باهيا😑
علا : شن امورك كويسة
سندس : تمام...ترا اعطيني ماريا نكلمها كان جنبك
علا استغربت من اسلوبها وتكلمت بنفس طريقتها : ماريا تلبس فيها امي بتطلع 😒
سندس: وين بتطلع
علا : شني وين بتطلع ؟😒...مش ف الشارع هي ره مع عمامها وعماتها
سندس : ماقلتش ف الشارع اني لكن عكر قلي بنرفعها لامي تشوفها مالقالش بتطلع
علا : واهو بتطلع هي شني عندك مشكلة😏
سندس : خيرك تتكلمي هكي انتي ياعلا 😒
علا : والله شوفي روحك كيف تتكلمي قبل ماتسأليني...وجو تطنفري وتقيمي خشمك علينا مايمشيش ره احني نعاملوك كويس لكن وقت تولع تولع
سراج : تي خيرك انتي ف من تكلمي
علا : هي سلام 😒
وسكرت ف وجهها الخط
طبعا سندس من اول ماتجوزت عمر كانت معاملتها لخواته وامه كويسة وكانت تبي رضاهم ديما وماصارتش بينها وبينهم مشكلة بكل يعني ماتعرفش وجههم التاني😏...لكن لما عمر تجوز عليها حملت علي العيلة كلها وقررت بتستكردهم وطبعا هما م الاصل مادوروهاش والوحيدة اللي كلمتها وواستها بلسم...
....
سراج : من الىي تكلمي فيه
علا : مرت خوك المريضة هده...تجوز عليها عمر جاية بتستعرض عضلاتها عليا هه😏
سراج : تي شن قتيلها😡
علا : الوقحة نسلم عليها تتكلم من راس خشمها مشي هزبتها
سراج : خير امك انتي متع مشاكل هكي 😡
علا : تي شن تبيها تطنفر عليا ونسكتلها 😡
سراج : لاش رادة ع التلفون بكل انتي...وبعدين شني عمر تجوز بتنقلبو انتو علي سندس😒..عليك عيلة الزح ماعندكمش صاحب
علا : اي هو هدا انتو ديما احني غلط وماننفعوش ماعمره واحد فيكم وقف معانا 😒
سراج : تبي بري وراس امك انتي لسانك ملوي علي رقبتك...بري خير مانجي نقصهولك 😒
~~
~~
~~
📞رنا : معليشي ياسندس تعرفيها انتي علا ديما هكي
📞سندس : لا مش ديا هكي😭انتو كلكم تغيرتو بعد ماتجوز عمر ولا كأنكم تعرفوني...ومافي حد دورني ولا اتصل بيا 😭
رنا : غر اهدي ياسندس..كيف تغيرنا قصدي انتي اللي صاحبتنا ونهدرزولك ونرتاحولك وعارفة معزتك عندنا واتصلت بيك مرتين لعلمك لكن انتي ماترديش وانتي اللي نقلبتي علينا من لما عمر تجوز
سندس : لا مانقلبتش والوحيدة اللي تتصل بيا بلسم معقولة عيلة كاملة مايدورني حد ولا يسأل عليا ولما اني اتصلت اختك مسحت بيا الارض
رنا : معليشي ياسندس حصل خير...وعلا حامل وموليا اعصاب هلبا ومادريهاش ووالله العظيم كلنا وجعتينا لما سمعنا بالموضوع ولمنا عليه عمر
سندس : لالا كلكم فرحانين ودايرين حتى اعشي واني ماحد دارلي حساب بكل😭
وقاعدة سندس تشكي وتبكي ورنا شادة التلفون ع ودنها وواقفة وماحستش غير ومحمد حاضنها من تالي وجبد التلفون سكره ولوحه ع الصالون
رنا : هييي خيرك هكي درت😮
محمد حط راسه ع كتفها وايديه ملتفات ع بطنها: نفختهم للنم مرت خوك 😑
رنا حطت ايدها ع ايديه : لكن والله وجعتني😔
محمد : به انتي شن دخلك متصلة تحكيلك ف همومها
رنا : تفش ف غلها وخلاص
محمد قرب راسه ويحول ف شعرها بخشمه وحط شفايفه ع رقبتها وباسها 🔥❤
رنا : نازل عليك الحنان حسيتك😂
محمد قام راسه وشبحلها : تبي نمشي ناخده من وحدة تانية😉 زي عمر
رنا : بش نخليك عبرة لمن لم يعتبر 😌
محمد طبس وقامها : تهددي حسيتك 😏
رنا : اااه يابارد نزلني
محمد ماشي لدار النوم : مش منزلك
°
•
°
•
°
اني : باهي احكيلي شن قالك
رتاج : ما قالي شي ليال😒 مد المفتاح وانتلف
اني : خالي اللي تدوي عليه ره😊
رتاج : انشالله يموت...وتلحقيه😊
اني : اصلا هو ميت من لما نخطبتي 😜
رتاج : كولي كولي صحة 😒
اني : ع فكرة ماتفوتيشهاش عليا متع مد المفتاح ومشي ره...لان عطل وهو واقف عليك 😉
رتاج : ليال اني مخطوبة كانك ناسية...واللي تقولي فيه ماليشي لزوم بكل
اني تنهدت
ترررن ترررن📱
اني : الو
سراج : اهلا
اني : اهلا بيك
سراج : كيف الامور
اني : تمام...شن جوك انت
سراج : باهي...وين شكلك مش ف الحوش 😶
اني : اي فرجت😂
سراج يضحك : كان نعرف نزغرط بس 😂
اني : تو نعلمك 😂
سراج : بالله عليك😒
سراج : ...وين ادوري ؟
اني : طالعة اني ورتاج
سراج : باهي كويس غر دخلي شعرك وراس امك
اني : من قالك مطلعاته 😂
سراج : مانعرفكش علي اساس 😑
اني : باهي تخايلني دخلته 😂
سراج : نتخايلك 😒
اني : باهي المهم وانت وين 😑
سراج : اني في ملاهي تصدقي 😑
اني : شدير ف الملاهي😂
سراج : نلعب هههه
اني : مقنينتك 😂
سراج : ولا 😂
اني : غر بجديات شدير غادي
سراج : رافع بنت عمر
اني : حي ردها مرته ؟
سراج : اي ولو عنده زوز😂😂
اني : شكلك حاسده ؟😒
سراج : لالا..اني مانحسدش كان نبي ندير زيه عادي مش واعرة 😒
اني : وانت تبي 😶
سراج : تو اني قلت نبي 😑
اني : لا نسأل فيك تبي ولالا
سراج : لا مانبيش
اني : حقا 🙈💓
سراج : تي غر نوصل فيك انتي لين بنفكر ف المرا التانية 😂
اني : والله 😒
سراج : تو من عقلك بعد حرق الدم هدا كله بناخد وحدة تانية اني
اني : يعني علي خاطر حرق الدم مش علي خاطر تحبني🙁
سراج : ماهو هو حرق الدم لاني نحبك...كان مانحبكش راني ضارب علي قلبي اربعة نساوين مش زوز
اني : باهي ماتبيش تفول علي خاطر نحبك هكي بالحرف الواحد🙁
سراج يضحك: علي خاطر نحبك
اني : هكي من غير نية...هدا قاعدة ماتجوزتمش وهكي تي شكلها ماما عندها حق 😑
سراج يضحك : توا ماما عندها حق ولا ماعندها باطل بناخدك بناخدك غصبا عنك وعن امك وبوك وجدودك والعيلة كلها
اني : ياواثق انت 😌
سراج : به اسمعي يا نفاخة...نبي نشوفك
اني : هييي مستحيل 😶
سراج : تي مش برا انتي
اني : اي لكن نقدرش
سراج : ديما وانتي مسكرة جد امها...غر قوليلي ف اما مكان مقعمزين
اني : قصدك بتجي😮
سراج : بتكتري دوا تو نكلم صاحبتك نسألها
اني تكلمت بهدوء : باهي علاش تبي تجي 🙈
سراج بشكل لا ارادي نبرة صوته هدت : ...نبي نشوفك ❤
اني :امممم علاش تبي تشوفني 🙃
سراج : علي خاطر مستاحشك....
اني : حقا 😌
وتغيرت نبرة صوته الى نبرة مخيفة فجأة: ...ادوي وين المكان نفختيهم😡
°
•
°
•
°
" غلط اللي درته غلط 💔....شن اللي خلاني ندير هكي بسس...علاش تكلمت معاها بالطريقة هده علاش حسستها اني نبيها علاش هكي علاااااش 😡....خيرني هكي قتلها وكيف طلع مني الكلام هدا...معقوله حبيتها 💔"
وقعد عبسي ع الحال هدا ساعات وهو مشوش ومتعصب ونادم ع الكلمتين اللي قالهم لرتاج 🖤🌑
~~
~~
~~
ترررن ترررن 📱
ماما : الو
جميلة: ايوا السلام عليكم
ماما : وعليكم السلام اهلين جميلة كيف حالك
جميلة: كويسة كيف حالك انتي وحال الصغار
ماما : يبرزو الحمد لله مبروك ماتعولو
جميلة: الله يبارك فيك العقبة لنادر وليال انشالله
ماما : سلمك سلمك واخيرا بتجيبي كنه تسايرك
جميلة : هههه اي والله...شني حتى انتي نقولو مبروك ولا مزال😜
ماما : علي شنو
جميلة: علي ليال
ماما ضحكت مجاملة : ربي يقدم اللي فيه الخير وخلاص...
جميلة : ههه انشالله
ماما: شني كملتو عوالتكم ولا مزال
جميلة : لا شبه كملنا...تبي الحق والله مانبي ندير حاجة كبيرة الفليسات اللي عندي بنديرهم ف المحظر وخلاص...مانبيش حوسة كبيرة ف الحوش
ماما : اي والله احسن فكيك من كترت الحوسة تلقي روحك بعد العرس تاعبة وحالتك حالة
جميلة : اي هدا هو...المهم بنقولك باش تتفضلي يوم المحظر انشالله
ماما : امتى اما يوم
جميلة : يوم#$# وقولي لخواتك حتى هما بش يتفضلو 🤗
ماما : ربي يتمملكم علي خير انشالله كل شي بالبركة
جميلة: سلمك العقبا لصغارك يارب
ماما : سلمك انشالله😊
°
•
°
•
°
