🌷الحلقة 53🌷
مسرة : ماما شوفي
ايناس تلفتت وجت عينها في عين ماما مشي ضحكت ايناس بصوت عالي
قعدنا نسلمو عادي وطبعا فريال وعلا ماجيناش جيهتهم وايناس ومسرة نفس الشي
~~
تسنيم شبحتلي وابتسمت اني ابتسمتلها لكن بطرقة جافة
طبعا بيننا وبين ايناس ومسرة زوز كراسي بس جت رتاج واقفة بعيد شوية شبحت لماما وتكلمت بصوت عالي
رتاج : خويلة نجلاء طااااالعة تهبببببببلي
ماما بعتتلها بوسة من بعيد وقعدت تضحك
ديما : وريهالي حماتي التانية وينها
اني : ههههه مسرة
ديما : اي😂
اني : اهيا
ديما : فيكم شبه بسيييييط بس هي عيونها صغيرات وانتي مشالله
اني ضحكت
~~
المنشطة : هده للمكبدين هيا انشطوووو
نحبه نحبه الغالي مازلت نحبه..
وناضو البنات كلهم يهيجو ماعداي طبعا
المنشطة : ونحبه نحبه عويناته سماح نحبه
الكل : نحبه نحبه الغالي مازلت نحبه👏
ناضو ديما وماما يرقصو
المنشطة : اسمعو اسمعو من تحب ولد خالتها ولا خالها
قامو يديهم من ضمنهم ديما والعيون عليها
المنشطة : هي ردو عليا...ياخالة ياخالة ولدك داير فيا حااااالة
حطت ديما يديها واشرت علي ماما قدام الكل
ياخااااله ياخااالة ولدك داير فياااا حااالة
المنشطة : هده ع اللي تحب ولد عمها ولا عمتها
ياماما ياماما الغاااالي مانسيتاش كلااامه
جتني تسنيم لكرسيا وقعدت تجبد فيا وكلهم يشبحو
ونوضتني وقعدت نرقص اني وياها
المنشطة : تحيااا للصاحبااات هيااا👏👏ياعيووني ياعيووني والشباب السمر خدوووني
قعدنا نرقصو اني وتسنيم وهم يشبحو ولفتهم انها نزلت وجتني وبعدين حضنتني وقعدنا نرقصو وحاضنين بعض
المنشطة : وطلعووو الوشق...راهي العيين الطق
رتاج خدت المايك : وعوينة وطارت ف الجو👋...انشالله هدا حد السو😂👏
المنشطة : زيدنا وحدة هي
رتاج : ونشاكي فيها صاحبتي ونشاكي فيها..ونشاكي فيها حي علي طلع يبيها 😂
قعدنا كلنا نضحكو وطبعا اني وتسنيم غاصرتنا العبرة
مسرة خدت المايك : من تحتي مية ماتجري من تحتي امية نضحك ماينضحك عليا😏👏
المنشطة شبحتلي : شن اسمه الحلو هدا
ام تسنيم : لووونا لونا
المنشطة : من هو يالونا خلي نغنولك عليه
اني قعدت نضحك وتحشمت ورتاج وشوشت للمنشطة
المنشطة : هي تعاااند وانا نعاندها تعاند وانا نعاندها تعاند وانا نعاندها لين يسموني لولدها
اني : هههههه قوووية
مسرة فاهمة الموضوع وتسحن ومش قادرة تدوي
المنشطة : صاير فيه عنااد غلاهم صاير فيه عناد صاير فيه عناد نحبه مكره ف الحساااد ههههه
مسرة : مازال صغيييرة نتجكتر مازال صغييرة...مازال صغيرة يمشي هدا يجيني غيره
~~
خش قيس وعيونه قلوب قلوب ومبتسم وطبعا علي وجه تسنيم نفس الابتسامه
قيس : الف مبروك 💕
تسنيم : الله يبارك فيك
سما : معطلين 😂
قيس ضحك
لبسو الدبل وقصو التورته وقيس يشبحلها ودايب فيها ويتمنا يروح بيها اليوم قبل غدوا ❤
°
•
°
•
°
☀️⛅
ايناس : والله كان تقدر تجي اليوم يكون احسن
سراج : شن في انشالله خير
ايناس: مايجيش ع التلفون
سراج : توا مش فاضي لكن العشية عادي
ايناس : خلاص نتنا فيك العشية...وياريت مايعرف حد
سراج استغرب : علاش
ايناس : هكي احسن
سراج : به تمام
~~
~~
علا : وقعدو يغنو ع الخالة وناضت بنت خالت نادر تأشر علي خالتها وهم يضحكو
بلسم : قصدك تبي نادر
علا : تي اي هكي واضح
بلسم : اما وحدة هده...قنينة
علا : عادية لكن جسمها حلو
بلسم : امممم ونجلاء شن لابسة
~~
~~
قيس : طالعة تهببببلي البارح
تسنيم : هههه حتى انت طالع تهببل
قيس : تمنيت كان عرسنا مش بيان
تسنيم قعدت تضحك
قيس : دوم الضحكة الحلوا
°
•
°
•
°
مسرة : اهلا شن الجو
سراج : اهلين مسرة
مسرة : خش تفضل
ايناس : كيف حالك سراج
سراج : بخير..والله شغلتيني
نزلت من داري نسمع ف صوت راجل ماتوقتاش هو
اني : خالك هدا ولا مني
مسرة : سراج😏
اني نصدمت ومشيت للمربوعة لقيته مقعمز هو وايناس وابتسم لا اراديا اول ماخشيت
اني : اهلا
سراج : شن الجو
ايناس : خلي نخشلك في الموضوع
سراج : اي ياريت
اني : اا م موضوع شنو
ايناس : شن الوقاحة هده...شن دخلك
اني : ع فكرة لو المضوع نفسه ف مش حيصير خير ره
مسرة خاشة بصفرة القهوة : انتي اصلا اطلعي من المربوعة
اني شبحت لايناس : لو عندك شوية عقل شغليه وماتخبطيش العليلة ف بعضها
سراج : شكله الموضوع كبير
اني : لا موضوع تافه وفتنه وخلاص
ايناس : اقلبي وجهك اركبي انتي اسلوبك زفت زيك زي امك
اني : تؤ تؤ تؤ قداش مااميحارقتلك دمك...قصدي احني في موضوع وانتي تدوي في موضوع تاني
مسرة دفتني من كتفي : اركبي اقلبي وجهك انتي زي اللصقة
اني دفيتلها ايدها بقوة : اكسريها ايدك
سراج : تي غر خيركم ولعتو جايبيني بش تتعاركو
ايناس : فوتها الحشرة هده وخلي نقولك الموضوع
سراج : من هي الحشرة
ايناس : خلينا ف موضوعنا
سراج : قصدك علي ليال
ايناس اشرت عليا بصبعها اي هده
اني : سراج امشي وماتسمعهمش لان الموضوع تافه وبتصبح ف مشاكل
سراج : هكي رايك
اني : اي
سراج : به هي نستأدن
ايناس : تو علي كبري منادياتك
سراج طالع : ماعجبنيش اسلوبك مانبي نسمع منك شي
اني 😏
مسرة تعصبت : ماهو انتو اسلوبكم كويييس وخوك لما مشيت مد عليا ايده
سراج وقف من الصدمة
مسرة : واختك هديكا النجسة اللي بسببها اني عرسي التغي.... هده تقولك موضوع تافه لان مش هامها لكن اني خاطري نكسر بسببكم😭 ولما مشيت نشكي لبوك وامك لزوووني 😭وسمعوني وسخ وداني قدام خالتك
وخوك واختك ضربووني😭
اني : كدااابة ماحد ضربك
ايناس : غر علي شني تزمزكيلهم
مسرة : طامعة بياخدوك تي والله كلك علي بعضك مش شايفينك
اني : انتي وحدة بيئة عندك علم
سراج : كك كيف اختي شن دخلها فهميني
مسرة : اختك الوسخة النجسة....
سراج قص علي كلامها : حسني اسلوبك بش مانطلعش ونخليك زي الكلبة تدوي
اني : ياسراج امشي وتو نفهمك اني القصة
ايناس عيطت : اسكتوووو....شوف ياسراج بعد ما العرس قريب يبدا واختك جاية تعول وتضحك وتغني وجوها مليح نكتشفو انها مدايرة علاقة مع خطيب مسرة ومسرة سيباته وكل شي انتهي
سراج : غغ غر فهميني من اختي
مسرة : رنا 😭
سراج نصدم : رنامسرة : ومش مدايرة علاقة مع مؤيد بس...حتى مع خال هده وهم يندرو وداسين عليكم وخالها طلع صاحب مؤيد ولما عرف القصة فات اختك وهرب طفشششش
سراج شبحلي بصدمة : خالك
اني قعدت ساكتة
ايناس : ياسراج اختك خربت لبنتي فرحتها ولما مشت بتشكي لبوك خوك ضربها هو وعلا وشوف حتى رقبتها
اني : كداااابة والله مامسك علاش تتبلي هكي
سراج طلع من غير مايقول ولا حرف
~~
~~
سراج : فهمني القصة
احمد : به غر قولي من قالك 😠
سراج : الزززز### فهمني شن صاير تقول اطرش ف الزفة😠
احمد : اختك رنا....وحكاله
سراج يهز ف رجله بتوتر ويحك في راسه
احمد : ماتمشيش للحوش وترعش بوك مش ناقصه
سراج : وانت كيف تمد كسرتك علي بنت
احمد انهار وقعد يخبط : مامدييييتش ايدي الز#### مامديتهاااش وانتو قكلكم قلبتو جد امها عليا
سراج : تي رقبتها كلها دم
احمد : كداااابة ورحمة خالك عماد الا كدابة ومامسيتها لا اني ولا علا وكلهم شاهدين...شن الف### هده
سراج : وهدا علاش عمر ضاربها اختك
احمد : اني وعمر
سراج : واني ندافع عليها زي الغبي وانتو عندكم عادي لكن ماشي الحاااال نعرف لمن نمشي 😠
احمد : وين ماشي
سراج مشي من غير مايرد
~~
~~
ماما : اللطف منو يخبط هكي ؛ فتحت الباب ماما ونصدمت لما شافت سراج واقف
سراج : عبد السلام قاعد
ماما : خير شن في
سراج : قاعد هو
ماما : داخل دقيقة
~~
عبسي : اهلين
سراج : لا اهلين ولا سهلين
عبسي : انشالله خير
سراج : شن بينك وبين اختي😠
عبسي : غر اهدى شوية
سراج دفه بقوه : ادوييييي شن في بينك وبينهااااا مانبيش نهدى
ماما واقفة ورا الباب وتسمع وحاطة ايدها علي قلبها
عبسي متماسك اعصابه : ياسراج قعمز واهدى نفهمك القصة
سراج : ادوي هكي مانبيش نقعمز
عبسي : اي كنت نبيها وناويها بالحلال اختك وحتى حوشي واتي وقبل مايصير الموضوع بيومين كنت ناوي نخطبها لكن هي اللي داراته صدمني وشفت شخص تاني
سراج ضربه علي وجهه : انت عاااارف روحك شن تقووول....حلال قتلي حلال شني اللي تدوي علليييييه
عبسي قاعد متماسك اعصابه : ياسراج قتلك ناويها بالحلال وقايل حتى لنادر وليال ووالله العظيم قبل يومين بس كنت نبي نمشي ونطلبها منكم....غر قعمز واهدى ساولتك بالله
~~
ماما جايبة صفرة قهوة : تفضل
وشبحت لعبسي : هيييي خيره فمك 😨
عبسي : تي اطلعي النم
سراج يهز في رجله ومتوتر
عبسي : اني لو نكدب عليها ولا ضحكت عليها راهو كلمتها بالسر ومن غير ماحد يندري لكن اني قبل مانكلمها كلمت نادر ونادر يندري ع الموضوع كله والله خايف عليها كأنها ليال اخته
سراج : وبعدين
عبسي : بعدين هي هدمت كل شي
سراج : كيف
عبسي تنهد : مؤيد خطيب بنت عمك.........وحكاله
سراج مطبس راسه ويسمع
"طبعا عبسي حكي كل شي الا موضوع الصور "
سراج معاش قال ولا كلمة ومتحشم
عبسي : ياسراج والله انتو فوق العين والراس وولاد عيلة...لكن سامحني اني اختك معاش نقدر نكمل معاها
سراج : به هدا مؤيد وين حوشه ولا خدمته
عبسي : مختفي ليه قريب اسبوع...
سراج : من قالك
عبسي : اماليه يتصلو يسألو فيا...ونادر قالب عليه الدنيا
سراج : نستأدن اني
عبسي : ماشربتش قهوتك
سراج طلع من غير مايتكلم ووجهه اسود ومتمني الارض تنشق وتبلعه
~~
~~
ماما : انت وبنت عبدالله 😮
عبسي ساكت
ماما : ومشالله كلهم يندرو الا اني
عبسي : كنت بنقولك
ماما : وبعدين
عبسي : ماصارش منه الموضوع
ماما : حتى كان قلتلي مستحيييل نرضى...وجت منك ياجامع
عبسي : به ماتزيدينيش علي مابيا
°
•
°
•
°
سراج خش للحوش لقي امه وعلا مقعمزين ف المطبخ يقرضو ف الخضرا
سراج : السلام عليكم
فريال وعلا ردو السلام
سراج : رنا وين
علا ارتبكت لا اراديا : ااا د داخل
فريال : راقدة واخدها النوم
سراج كيف بيطلع من الكوجينة
علا لا اراديا: وين ماشي 😦
سراج : ممنوع نتحرك ولا شني
علا : ههه😅 نحسابك بتنوض رنا
سراج : اي بنوضها
ومشالها ف الدار ولحقوه فريال وعلا...خش لقاها متكية ع السرير وشادة كتاب ولما شبحاته حطت الكتاب وناضت قعمزت
سراج تلفت لعلا وامه بأستغراب ومادواش معاهم وسكر الباب بهدوء وخلاهم برا....رنا لا اراديا وجهها ولا احمر وقلبها يدق
سراج قعمز علي سرير علا وكيف بيدوي فتحت فريال الباب وعلا وراها
سراج : نعم
فريال : ممنوع نسمعو😅
سراج : اطلعو وسكرو الباب
فريال : اا...
سراج قطع علي كلامها : اطلعو يام
سكرو الباب وقعدو واقفين يسمعو
رنا ماقالتش حرف وتبلع ف ريقها حساته يتعامل بغرابة
سراج : كنتي اعز وحدة ف خوتي عندك علم...اعز من بلسم ومن علا ومنهم كلهم ونشوف فيك اقرب وحدة....تعرفي علاش ؟؟
رنا منزلة راسها وساكتة
سراج : تعرفي ولالا؟؟
رنا : علاش
سراج : لان نحس فيك اكتر وحدة تفهمي فيا واكتر وحدة تعرف كيف تتصرف...ولان نشوف فيك اعقل وحدة وانضج وحدة.....مانشوفش فيك اختي لان اختي بس شوية نشوف فيها...دايرك صديقة ونحب نهدرزلك ونحكيلك علي كل شي...ودايرك من ضمن الاشخاص اللي نحب نستشيرهم ونسألهم ونحب ينصحوني لان نحس ف عقلك كبير و من بينهم كلهم الوحيدة انتي اللي نحب نتكلم عليك تعرفي علاش ؟
رنا غاصرتها العبرة وتتكلم بالسيف : علاش
سراج : لانك مشرفتيني انك تكوني اخت...ورافعتيلي راسي بشخصيتك واخلاقك واسلوبك...لاني فخور بيك ونتمنى بناتي يطلعولك انتي... ومن بين خواتك انتي الوحيدة اللي لما ترفضي ف العرسان نقتنع حتى لو مافيهمش عيب لان نقول مزال في خير من هكي واي حد يجي نشوف فيه شوية فيك لانك رنا ومش مفروض ترضي بأي حد ومن اي عيلة...لانك بنت عيلة وناس و....وشريفة وكبيييرة ف عيني ونحبك بجديات نحبك اكتر من حبي لانك اختي
تعرفي...لما عرفت ان علا تكلم ف صاحبي ماوجعتنيش من علا زي ماوجعتني منك انتي...لان نقول علا صغيرة وعقلها صغير وفي امور ماتحسبش فيها لكن انتي ماكنتش نتوقع انك ترضيلها تحطني ف موقف زي هدا....
سراج تنهد : لكن اللي داراته علا حتى مايتقارنش مع اللي درتيه فينا
رنا تسمع ودموعها ينزلو ومن غير صوت
سراج : طحتي من عيني 💔....
رنا تبكي وتشهق ودموعها ينزلو
سراج شاد قبظة ايدة بقوة ويشبحلها وهي تبكي وخلاصسراج : طلعتي اوسخ ماخلق ربي....تعرفي رنا شن تنطبق عليك بعد ماكتشفت ؟؟
رنا ساكتة
سراج: جاوبيني تعرفي ؟؟
رنا هزت راسها بمعنى لا😢
سراج : نقولك اني شن تنطبق عليك...ق### هده الكلمة الوحيدة اللي تجسدك
رنا انهارت بالبكي وتمنت الموت تاخدها تمنت تنتهي تختفي ترحل من الوجود حست روحها زي الحشرة من كلامه
سراج طلع مسدس من تحته وجي قعمز جنبها ع السرير وشبحلها
رنا قلبا بيطلع من مكانه وتاخد ف نفسها بالسيف
سراج فتح مخزن المسدس وكانت فيه رصاصة وحدة وراهالها
سراج تنهد : شفتي الرصاصة هده ؟؟ حيكون في خيارين عندك واختاري واحد منهم
حط المسدس ف راسه : ياأما ننتهي اني
وبعدين حطه ف راسها : ياأما تنتهي انتي...لكن احني الزوز ف الدنيا مع بعض لا
رنا خدت ايده وحطت المسدس ع راسها وهي تبكي: اي اني...حطها فيا اني وريحني وارتاح😢....لكن المشكلة انك بترتكب جريمة وحرام اضيع علي خاطر وحدة زيني مانستاهلش اضيع علي خاطري سنين ف الحبس...
فتح ع عبدالله الباب وشاف سراج شاد المسدس علي رنا وهي تبكي...
فريال 😨😨
°
•
°
•
°
نادر : تي رقبتها كلها مخبشة
اني : تو عمي يكدب واحمد يكدب وعلا تكدب ومسرة صادقة
نادر : به اللي ف رقبتها من وين جي
اني : بالعقل تو حتى كان ضربوها بيضربوها بالشكل هدا...وبعدين هي تو نعجة هم يضربو وهي واقفة تتفرج
نادر : قصدك تكدب
اني : اي...لما نقوللكم ماتتسرعوش ماحد يسمع فيا😡
نادر تنهد وسكت
~~
~~
☀️⛅
بابا : ردو بالكم علي روحكم...وانت ماتخليش اختك هلبا في الحوش بروحها ولما تمسك ارفعها تبات في حوش جدها
نادر : برا بووووي زينة😑
مسرة : هي بابا
بابا : هي
اني : تعالي بوسيني
مناسك جت تجري وتكعبشت فيا وقعدة حاضنتني❤
اني امممممه😘
مناسك : امسي معانا
اني بستها : لالا اني عندي قراية
مناسك : تو نزيبلك ستلاته
اني : ههههه سلمهااالي ❤
نادر : واني ياقردة 🙊
مناسك : انت درد 🙉
اني : هههههه قوية درد
ومشو وقعدت اني ونادر في الحوش ناكلو ونضحكو وجونا يهبل
~~
~~
🌒
ليا يومين نتصل ب سراج مايردش وتوا عطاني مقفل وبالي نشغل...💔
ومش عارفة كيف نوصل فيه ومالقيتش حل غير مراد
~~
مراد : حبيبي سكري شوية مش عارف من خش انتظار
ميرا : توا😡...من يتصل بيك ف هالوقت
مراد : اهو بنشوف الزح خيرك
~~
مراد : تفضلي هي سببتيلي في مشكلة
اني نبكي ومش مركزة معاه : مراد خيره سراج مايردش😢
مراد : خيرك تبكي ولا مزكومة ولا شني
اني : اا شي..غر قولي ماكلمكش سراج
مراد : علاش ماتندريش انتي
اني : علي شنوو😮
مراد : سراج سافر امس
اني : ساااافر...وين
مراد : مشي للجزائر
اني : ااا ع علاش وخيره ماقاليش
مراد : ماحد يندري الا اني
اني : اها...به كويس هي باي
مراد : باي
~~
ميرا : مني خش انتظار
مراد : بنت عمي
ميرا : وتقول فيها بكل برود😑
مراد : اي 😂
ميرا : اماهي وعلاش متصلة توا
مراد : شن اماهي حسستيني تعرفيهم
ميرا: اي نعرفهم😒هم 5 وشفتهم كلهم ف البيان
مراد : اها هده قصيرة
ميرا : اللي عيونها كبار لابسة قفطان كلوش ابيض وفيه ورد موف ودايرا شعرها ع الجنب صح ولالا
مراد يضحك :😂😂😂 مفصلتيهم تفصيل مشالله...اول شي لما خشيت لبسو عبيات وماندريش عليها كيف دايرا شهرها وشن لابسه لكن اي هي عيونها كبار وبيضاء...
ميرا : ومتصلة بيك شن تبي😡
مراد : تبينا نرجعو...قتلها خلاص اللي بيننا انتهي
ميرا : قصدك في بينكم علاقة😡😨
مراد : 😂😂اي
ميرا : بجديااات ولا تتسهوك😡ماتخلينيش نسكر عليك
مراد : يامجنونة واحد عنده مشفشة زيك بيشوف لغيرها
ميرا : مشفشفة عينك...به علاش متصلة
مراد : اهو نحكيلك القصة
ميرا : نسمع
مراد : عندي ولد عمي اسمه سراج
ميرا : خوها
مراد : ولد عمها ياهبلة
ميرا : ت وين نندري
مراد : اي المهم يحبو بعض وكل مايتعاركو ينفخولي في راسي 😪
ميرا : ااه...وتوا متعاركين
مراد : شكلهم
ميرا : به علاش يتصلو بيك انت 😏
مراد : زي ماحني نافخين ليارا راسها...😑
~~
~~
#مصر
مسرة : بابا هي ننزلو نتمشو
بابا : اني تعبان من السواقة بنرقد...برو انتو
ايناس : مناسك جنبك راقدة ياعلي رد بالك عليها
نزلو يتمشو ويهدرزو ومواضيعهم كلها علي نفس الموضوع
مسرة : ماما...خطرت عليا فكرة شيطانية😏
ايناس : ماعييتيش
مسرة : لالا هده بدمر احمد تدمير
ايناس : بخصوص شنو
مسرة : مريم😏
🌷يتبع🌷
.
.
#__timOo__💛
